ናትናኤል ተስፋጽዮን ዕዉት ብጫ ማልያ ዙር ርዋንዳ ኮይኑ

ካብ ዕለት 23 ለካቲት ጀሚሩ ንሽሞንተ መድርኻት ክካይድ ኣብ ዝቐነየ ዙር ርዋንዳ 2020፡ ሎሚ ኣብ ከተማ ኪጋሊ 89.3 ኪሎ ሜትር ዝሸፍነ ሻሙናይ መድረኽ ተዛዚሙ'ሎ።

ኣብዚ ሎሚ ዝተዛዘመ ውድድር ናትናኤል ተስፋጽዮን ዕዉት ብጫ ማልያ፡ ንመንእሰይ እትውሃብ ጻዕዳ ማልያን ንዝበለጸ ኣፍሪቃዊ ተቐዳዳማይ እቲ ዙር ንዝውሃብ ማልያን ክዕወተሉ ክኢሉ።

እዚ ኣብ ዝሓለፈ ዓመት ናብ 2.1 ደረጃ ክብ ዝበለ ዙር ርዋንዳ፡ ብደረጅኡ ምስ ዙር ጋቦን ትሮፒካለ ኣሚሳ ቦንጎ ዝመዓራረ ኮይኑ ሓደ ካብ በዳህቲ ዙራት ኣፍሪቃ'ዩ።

ዙር ርዋንዳ ናብ ደረጃ 2.1 ክብ ምስ በለ ምስ ጋንታ ኣስታና ዝወዳደር ኤርትራዊ መርሃዊ ቅዱስ ኣብ ዝሓለፈ ዓመት (2019) ተዓዊትሉ ምንባሩ ዝዝከር'ዩ።

ዙር ርዋንዳ ደረጅኡ 2.2 ኣብ ዝነበረሉ'ውን፡ ኣብ 2010 ኤርትራዊ ዳናኤል ተኽለሃይማኖት ነዚ ውድድር ተዓዊትሉ ነይሩ'ዩ።

ኣብ ኣፍሪቃ ኣብ ዝካይዱ 2.1 ደረጃ ዘለዎም ውድድራት ዙር ጋቦንን ዙር ርዋንዳን፡ ናትናኤል ብርሃነ ኣብ 2014 ምስ ጋንታ ኢሮፕ ካር ብምኻንን ንዙር ጋቦን፥ መርሃዊ ቅዱስ ከኣ ምስ ጋንታ ኣስታና ብምዃን ንዙር ርዋንዳ ኣብ 2019 ክዕወትሉ ክኢሎም ነይሮም እዮም።

ናትናኤል ተስፋጽዮን ኣብ ወርሒ ጥሪ ኣብ ዝተኻየደ ዙር ጋቦን ትሮኦፒካለ ኣሚሳ ቦንጎ፡ ኣብ መወዳእታ መዓልቲ ብሓንቲ ካልኢት ተበሊጹ ዕዉት ብጫ ማልያ እቲ ውድድር ካብ ምዃን ከም ዝቦኾረ ዝዝከር'ዩ።

ኣብ ናይ ሎሚ ዓመት ዙር ርዋንዳ ሃገራውያን ጋንታታት ኤርትራ፡ ርዋንዳ፡ ኢትዮጵያ ከምኡ'ውን ጋንታታት ዳይርክት ኢነርጂ፡ እስራኤል ስታርት ኣፕ ኔሽን፡ በንዲክሽን፡ ስኮል ኣድርያን ንኣሽቱ ኣካዳሚ፡ ኣንድሮኒ ጅዮካቶሊ፡ ኒፖ ዴልኮ ዋን ፕሮቬንስ፡ ባይክ ኣይድ፡ ግርፕመንት፡ ኖቫ ኖርዲክ፡ ቪኖ ኣስታና ሞቶርስ፡ ባይ ሲካሳል፡ ፕሮ ታች ከምኡ'ውን ቲኤስጂ ሳይክሊንግ ቲም ብሓፍሻ ዓሰርት ሽዱሽተ ጋንታታት ተሳቲፈን።ኤርትራውያን ተቐዳደምቲ ብዘይካ እቶም ምስ ሃገራዊት ጋንታ ዝተሰለፉ ሓሙሽተ ተቐዳደምቲ፡ ምስ ባይክ ኣይድ ዝወዳደር መኽሰብ ደበሳይ፡ ምስ ቲኤስጂ ሳይክሊንግ ጋንታ ዝወዳደር መትከል እዮብ ከምኡ'ውን ምስ ኒፖ ዴልኮ ዝወዳደር ቢንይም ግርማይ ኣብዚ ውድድር ብምስታፎም ቁጽሪ ኤርትራውያን ተቐዳደምቲ ናብ ሸሞንት ክብ ኣቢልዎ።

ብዘየካ'እዚ ምስ ጋንታ እስራኤል ስታርት ኣፕ ኔሽን ዝወዳደር ኤርትራዊ ሽወደናዊ ዓወት ገብረመድህን'ውን ኣብዚ ውድድር ተሳቲፉ እዩ።

ውጽኢት ዝሓለፈ መድረኻት

ቅድሚ ሕጂ ነዚ ውድድር ዝተዓወትሉ