#కోడిపందేలు: కోడి నెమలి ఎలా అయ్యింది?

- రచయిత, వరికూటి రామక‌ృష్ణ
- హోదా, బీబీసీ ప్రతినిధి
11 జనవరి 2018

కోడి పందేలంటే ఆషామాషీ కాదు. ప్రతి చిన్న విషయానికి ఎంతో జాగ్రత్త తీసుకుంటారు.

పందెంలో రెండు అంశాలు కీలక పాత్ర పోషిస్తాయి. ఒకటి కోడి జాతి. రెండు దానికి ఇచ్చే శిక్షణ. ఇక్కడ జాతి గురించి మాట్లాడుకుందాం.

తెలుగు రాష్ట్రాల్లో కాకి, సేతువ, నెమలి, కౌజు, డేగ, పర్ల వంటి రకాలకు ఆదరణ ఎక్కువ. ఈ కోళ్లన్నీ దాదాపు అసీల్ జాతికి చెందినవి. రెక్కల రంగు, ఇతర శారీరక లక్షణాల ఆధారంగా వీటిని వర్గీకరిస్తారు.

ప్రపంచవ్యాప్తంగా చూస్తే రెండు జాతుల కోళ్లకు మంచి ఆదరణ కనిపిస్తోంది. అవి అసీల్, షామో.

అసీల్: వీటికి పుట్టినిల్లు భారతే. పాకిస్తాన్, బంగ్లాదేశ్, శ్రీలంకలలో కనిపిస్తాయి. పోరాట పటిమకు అసీల్ పెట్టింది పేరు. ఈ జాతి కోళ్లు చాలా అందంగా ఉంటాయి. ఎంతో చురుకుగా కదులుతాయి. ఈ లక్షణాలే వీటికి ప్రపంచ గుర్తింపును తెచ్చిపెట్టాయి.

అసీల్ అంటే స్వచ్ఛమైన అని అర్థం.

1660-1680 మధ్య అసీల్ జాతి బ్రిటన్ వాసులకు పరిచయమైంది. భారత్, పాకిస్తాన్ నుంచి వలస వచ్చిన వాళ్లు వీటిని తీసుకొచ్చారు.

రెజా, కులంగ్ అసీల్, షామో జాతులు ఇక్కడ కనిపిస్తాయి. 19వ శతాబ్దం నాటికి అసీల్ జాతి యూరప్ అంతటా విస్తరించింది. నేడు అమెరికా, జపాన్, థాయిలాండ్ వంటి దేశాల్లోనూ ఉన్నాయి.

Skip ఎక్కువమంది చదివినవి and continue reading

ఎక్కువమంది చదివినవి

End of ఎక్కువమంది చదివినవి

అసీల్‌ జాతిలో అనేక రకాలుంటాయి.

రెజా: ప్రపంచవ్యాప్తంగా దీనికి ఆదరణ ఎక్కువ.

బరువు దాదాపు 3 కేజీలు ఉంటుంది.
మంచి కండపుష్టి ఉండటంతోపాటు కళ్లు చురుకుగా ఉంటాయి.
కాలి గోళ్లు చాలా బలంగా, మొనదేలి ఉంటాయి.

ఫొటో క్యాప్షన్, పాకిస్తాన్‌లో కనిపించే జావా అసిల్

కులంగ్: అసీల్ జాతిలో కులంగ్ రెండో రకం.

రెజాతో పోలిస్తే ఇవి పరిమాణంలో పెద్దవి.
బరువు 3.5-6 కేజీల మధ్య ఉంటుంది.
దక్షిణ భారత్‌లో కనిపించే వాటి ముక్కు చిన్నగా బలంగా ఉంటుంది.
ఉత్తర భారత్‌లో ఉండే కులంగ్ ముక్కు పొడవుగా ఉంటుంది.

మద్రాస్ అసీల్: తమిళనాడులో ఈ జాతి మూలాలు ఉన్నాయి.

జర్మనీ, హోలాండ్, బెల్జియం, ఇంగ్లాండ్, బోస్నియా, రష్యా వంటి దేశాల్లో ఈ జాతి విస్తరించి ఉంది.

బాంటమ్ అసీల్: జర్మనీ, హోలాండ్, బెల్జియం, ఆస్ట్రియా, ఇంగ్లాండ్, హంగేరీ వంటి దేశాల్లో ఈ బ్రీడ్ కనిపిస్తుంది.

జపాన్‌కు చెందిన కో షామో, రెజా అసీల్ కలయిక ద్వారా ఇది పుట్టింది.

మియన్వాలి అసీల్: ఇది పాకిస్తాన్‌లో కనిపిస్తుంది.

ఎరుపు, తెలుపు, నలుపు ఈకల్లో ఈ కోళ్లు ఉంటాయి.
వీటి కాళ్లు చాలా బలంగా ఉంటాయి.
జావా, ముస్క, రియాజా, కబుత్రా, చందుల్ వంటి ఇతర రకాలకు కూడా పాకిస్తాన్‌లో ఆదరణ ఉంది.