You’re viewing a text-only version of this website that uses less data. View the main version of the website including all images and videos.
விமான நிலைய வளாகத்திலோ அதன் வெளியிலோ தாக்குதல் நடத்தப்படலாம் என்று மேற்கு நாடுகள் இன்று காலையில் எச்சரிக்கை விடுத்திருந்தன. இந்த நிலையில், தற்போது வெடிச்சத்தம் ஏற்பட்டிருப்பதை அமெரிக்க பாதுகாப்புத்துறை உறுதிப்படுத்தியிருக்கிறது.
வணக்கம் நேயர்களே.
இன்றைய நேரலை பக்கத்தில் இணைந்திருந்த அனைவருக்கும் நன்றி. இத்துடன் இந்த பக்கத்தை நிறைவு செய்கிறோம்.
பிபிசி தமிழின் புதிய நேரலைப் பக்கம் நாளை காலை மீண்டும் தொடங்கும். மேலதிகச் செய்திகளுக்கு பிபிசி தமிழ் இணைய தளத்தின் முகப்புபக்கம் செல்லவும்.
பிபிசி தமிழின் பேஃஸ்புக், ட்விட்டர், இன்ஸ்டாகிராம், யூடியூப்
பக்கங்கள் வாயிலாகவும் செய்திகளை அறியலாம்.
இந்த நேரலை பக்கத்தில் சற்று முன்பு நீங்கள் இணைந்திருந்தால், ஆப்கன் தாக்குதல் தொடர்பான சமீபத்திய தகவல்களின் சுருக்கத்தை இங்கே பார்க்கவும்.
காபூலில் தாக்குதல் நடைபெற்ற இடம் அமெரிக்க ராணுவத்தின் கட்டுப்பாட்டில் இருந்தது என்றும் தாக்குதலுக்கு தாங்கள் கண்டனம் தெரிவிப்பதாகவும் தாலிபனின் செய்தி தொடர்பாளர் தெரிவித்துள்ளார்.
“காபூல் விமான நிலையத்தில் பொதுமக்களை குறிவைத்து நடத்தப்பட்ட தாக்குதல் குறித்து இஸ்லாமிய எமிரேட் கண்டனம் தெரிவிக்கிறது” என அதன் செய்தி தொடர்பாளர் சாபியுல்லா முஜாஹித் டிவிட்டரில் தெரிவித்துள்ளார்.
“மேலும் இந்த குண்டுவெடிப்பு அமெரிக்க பாதுகாப்பு படைகளின் பொறுப்பில் இருந்த இடத்தில் நடைபெற்றுள்ளது” என செய்தி தொடர்பாளர் தெரிவித்துள்ளார்.
தாலிபனின் மற்றொரு செய்தியாளர், சுஹைல் ஷாஹீன், “தனது மக்களின் பாதுகாப்பு குறித்து தீவிரமாக கண்காணித்து வருவதாக” டிவிட்டர் பதிவில் தெரிவித்துள்ளார்.
ஆப்கானிஸ்தானில் உள்ள பிரிட்டிஷ் மக்களையும் அங்கிருந்து வெளியேற தகுதி பெற்றுள்ள ஆப்கானியர்களையும் மீட்கும் நடவடிக்கை தொடரும் என்று பிரிட்டன் பிரதமர் போரிஸ் ஜான்சன் தெரிவித்துள்ளார்.
"எங்களுடைய நடவடிக்கை இடைநிறுத்தப்படாது. மக்களை வெளியேற்றும் நடவடிக்கை தொடரும்," என்று காபூல் தாக்குதல்களுக்குப் பிந்தைய நிலைமை குறித்து விவாதிப்பதற்காக கூட்டப்பட்ட அவசரகால கூட்டத்துக்கு பிறகு போரிஸ் ஜான்சன் தெரிவித்தார்.
"பயங்கரவாதம் மற்றும் சந்தர்ப்பவாத பயங்கரவாத தாக்குதல்களுக்கு எப்போதுமே சேதாரங்கள் இருக்கும். தாக்குதல் நடத்தியவர்களை நாங்கள் கண்டிக்கிறோம், அவர்கள் இழிவானவர்கள் என்று நான் நினைக்கிறேன், ஆனால் இதுபோன்ற காட்சிகளுக்கும் நாம் தயாராக இருக்க வேண்டியிருக்கிறதே என நான் பயப்படுகிறேன்," என போரிஸ் ஜான்சன் கூறினார்.
காபூல் விமான நிலையம் அருகே வியாழக்கிழமை மாலையில் நடந்த இரு தாக்குதல் சம்பவங்களுக்கு ஐக்கிய நாடுகள் சபையின் பொதுச் செயலாளர் அன்டோனியோ கூட்டரெஷ் கடும் கண்டனம் தெரிவித்துள்ளார் என்று அவரது செய்தித்தொடர்பாளர் தெரிவித்துள்ளார்.
"இந்த சம்பவம் ஆப்கானிஸ்தானில் உள கள நிலை ஸ்திரமற்று இருப்பதை அடிக்கோடிட்டுக் காட்டுகிறது, ஆனால் ஆப்கானிஸ்தான் மக்களுக்கு ஆதரவாக நாடு முழுவதும் அவசர உதவிகளை நாங்கள் தொடர்ந்து வழங்க வேண்டும் என்ற எங்களுடைய தீர்மானத்தை இந்த தாக்குதல்கள் வலுப்படுத்துகின்றன," என்று அன்டோனியோ கூட்டரெஷின் செய்தித்தொடர்பாளர் ஸ்டீஃபேன் டுஜாரிக் தெரிவித்துள்ளார்.
ஆப்கானிஸ்தான் தலைநகர் காபூலில் உள்ள விமான நிலைய வாயில் அருகே நடத்தப்பட்ட இரு தாக்குதல்களில் அமெரிக்க படையினர் சிலர் பலியானதாக அமெரிக்க பாதுகாப்புத்துறையான பென்டகன் தெரிவித்துள்ளது.
அமெரிக்கன் மெரைன்ஸ் எனப்படும் கடற்படை அதிரடிப்படை வீரர்களும் வேறு சில வீரர்களும் இறந்திருப்பதாக அமெரிக்க ஊடகங்கள் செய்தி வெளியிட்டுள்ளன.
இன்று காபூல் விமான நிலையத்திற்கு அருகே நடைபெற்ற தாக்குதல்கள் குறித்து ஏற்கனவே பல்வேறு நாடுகள் எச்சரிக்கை விடுத்திருந்தன. மேலும் ஆப்கானிஸ்தானை விட்டு வெளியேற ஆயிரக்கணக்கானவர்கள் அங்கு குவிந்துள்ளதால் தாக்குதல் நடைபெறும் ஆபத்து இருப்பதாக அமெரிக்கா பிரிட்டன் உள்ளிட்ட பல்வேறு நாடுகளும் தெரிவித்திருந்தன.
தாக்குதல் நடைபெறுவதற்கு சில மணிநேரங்கள் முன்னர், அங்கு `மிக கொடிய` பயங்கரவாத தாக்குதல் எந்த நேரத்திலும் நடைபெறலாம் என பிரிட்டன் எச்சரிக்கை விடுத்திருந்தது.
முன்னதாக காபூல் விமான நிலையத்திற்கு வெளியே தாக்குதல் நடைபெறும் அச்சுறுத்தல்கள் இருப்பதால் ஆப்கானிஸ்தானில் உள்ள அமெரிக்கர்கள், விமான நிலையத்திற்கு செல்ல வேண்டாம் என அமெரிக்கா எச்சரிக்கை விடுத்திருந்தது.
விமான நிலையத்திற்கு வெளியே உள்ளவர்கள் உடனடியாக அங்கிருந்து செல்ல வேண்டும் என ஆஸ்திரேலியாவும் தெரிவித்திருந்தது.
இருப்பினும் ஆப்கானிஸ்தானை விட்டு எப்படியாவது தப்பிச் செல்ல வேண்டும் என எண்ணிய ஆப்கன் மக்கள் பல்வேறு எச்சரிக்கைகளுக்கு மத்தியிலும் விமான நிலையத்தில் காத்திருந்தனர்.
ஆப்கானிஸ்தான் வான் பரப்பில் 25 ஆயிரம் அடி உயரத்துக்கு கீழே கட்டாயமாக பறக்கக் கூடாது என்று தமது நாட்டில் இயங்கி வரும் விமான நிறுவனங்களுக்கு பிரிட்டன் அரசு உத்தரவிட்டிருக்கிறது.
காபூலில் இன்று மாலையில் நடத்தப்பட்ட இரண்டு தாக்குதல்களுக்கு நேட்டோ அமைப்பின் செகரட்டரி ஜெனரல் யென்ஸ் ஸ்டோல்டென்பெர்க் கடும் கண்டனம் தெரிவித்துள்ளார்.
இது தொடர்பாக அவர் தமது ட்விட்டர் பக்கத்தில், "காபூல் விமான நிலையத்துக்கு வெளியே நடந்த தாக்குதலை நான் வன்மையாக கண்டிக்கிறேேன். பாதிக்கப்பட்டவர்கள் மற்றும் அவர்களின் நேசமிக்க உறவுகளுடன் எனது சிந்தனை இருக்கிறது. எவ்வளவு சீக்கிரம் முடியுமோ அவ்வளவு விரைவாக அங்கு எத்தனை பேரை வெளியேற்ற முடியுமோ அதில் மட்டுமே எங்களுடைய கவனம் இருக்கும்," என்று அவர் கூறியுள்ளார்.
காபூல் நகரில் இன்று மாலையில் நடத்தப்பட்ட இரண்டு தாக்குதல்களில் 52 பேர் காயம் அடைந்திருப்பதாகவும், பலர் பலியாகியிருப்பதாகவும் தாலிபன் செய்தித்தொடர்பாளர் ஜபியுல்லா முஜாஹித் தெரிவித்துள்ளதாக ஆப்கன் உள்ளூர் தொலைக்காட்சியான டோலோ நியூஸ் செய்தி வெளியிட்டுள்ளது.
சம்பவ பகுதியில் எத்தனை பலியானார்கள் என்ற துல்லியமான தகவல் தன்னிடம் இல்லை என்றும் அவர் தெரிவித்துள்ளார்.
ஆப்கானிஸ்தான் தலைநகர் காபூலில் இன்று மாலையில் நடத்தப்பட்ட இரண்டு தாக்குதல்களில் குறைந்தபட்சம் 13 பேர் இறந்திருக்கலாம் என்று தாலிபனை மேற்கோள்காட்டி ராய்ட்டர்ஸ் செய்தி முகமை செய்தி வெளியிட்டிருக்கிறது.
அங்கு தாக்குதல் நடந்த இடத்தில் பாதிக்கப்பட்டவர்களை மருத்துவமனைக்கு அழைத்து செல்லும் காணொளி ஒன்றை ஆப்கன் உள்ளூர் தொலைக்காட்சியான டோலோநியூஸ் அதன் சமூக ஊடக பக்கத்தில் வெளியிட்டிருக்கிறது.
இந்த காட்சி உங்களுக்கு சங்கடத்தை தரலாம் என எச்சரிக்கிறோம்.
ஆப்கானிஸ்தானில் இஸ்லாமியவாதிகள் கையில் அதிகாரம் வந்தால் அங்கு பயங்கரவாதமும் தொடரும் என்று கூறியிருக்கிறார் பிரிட்டன் கன்சர்வேட்டிவ் எம்.பியும் வெளியுறவு விவகாரங்களுக்கான நாடாளுமன்ற நிலைக்குழு தலைவருமான டாம் துகென்தாட்.
தாலிபன் ஆளுகையின் விளைவால் ஏற்பட்ட குழப்பத்தின் அடையாளமே இந்த தாக்குதல்கள் என்று அவர் கூறி்யிருக்கிறார்.
காபூலில் இன்று மாலையில் நடத்தப்பட்ட இரு தாக்குதல்களில் குறைந்தபட்சம் 11 பேர் பலியாகியிருக்கலாம் என்று தகவல் வெளியான நிலையில், அந்த எண்ணிக்கை மேலும் அதிகமாகலாம் என் எச்சரிக்கிறார், அந்நாட்டில் இருக்கும் பிபிசி செய்தியாளர் சிக்கந்தர் கெர்மானி.
அங்கு பலியானவர்களின் சடலங்கள் இடம்பெற்ற காணொளியை பார்க்கும்போது, அதிகாரிகள் தெரிவிக்கும் எண்ணிக்கையை விட பலி எண்ணிக்கை அதிகமாக இருக்கலாம் என தெரிய வருகிறது.
ஆப்கானிஸ்தான் தலைநகர் காபூல் விமான நிலைய வளாகத்தின் அப்பி வாயில் பகுதியில் நடந்த தாக்குதலில் சில அமெரிக்கர்கள் மற்றும் பொதுமக்கள் இறந்திருக்கலாம் என அமெரிக்க பாதுகாப்புத்துறையான பென்டகன் தெரிவித்துள்ளது.
அப்பி வாயில் பகுதியில் ஒரு தாக்குதலும், அந்த வாயில் பகுதியில் இருந்து சில அடி தூரத்தில் உள்ள பேரன் விடுதி அருகே மற்றொரு தாக்குதலும் நடந்துள்ளதாக பென்டகன் செய்தித்தொடர்பாளர் ஜான் கிர்பி வாஷிங்டனில் தற்போது நடத்தி வரும் செய்தியாளர் சந்திப்பில் தெரிவித்துள்ளார்.
காபூல் விமான நிலையத்தின் அப்பி வாயில் பகுதியை விட்டு விலகியிருக்குமாறு அங்குள்ள பொதுமக்களுக்கு பாதுகாப்புப்படையினர் உத்தரவிட்டுள்ளனர்.
இந்த வாயில் பகுதியின் வெளிப்புற பாதுகாப்பை தாலிபன்களும், உள்புற பாதுகாப்பை அமெரிக்க தலைமையிலான வெளிநாட்டுப் படையினரும் மேற்காண்டுள்ளனர்.
இந்த வாயில் பகுதியில்தான் ஆப்கானை விட்டு வெளியேற தகுதி பெற்ற ஆப்கானியர்கள், வெளிநாட்டுப் பயணிகள் காத்திருக்கின்றனர். மற்றவர்கள் வேறு வாயில் பகுதியில் பிரித்து வைக்கப்பட்டுள்ளனர்.
முறையான கடவுச்சீட்டு, விசா போன்ற ஆவணங்கள் உள்ளவர்கள் மட்டுமே இந்த வாயில் பகுதியில் இருப்பதாக அங்கிருந்து வரும் தகவல்கள் தெரிவிக்கின்றன.
அவர்களை இலக்கு வைத்தே இந்த தாக்குதல் நடத்தப்பட்டிருக்கலாம் என்று தெரிய வருகிறது. ஆனால், இந்த தாக்குதலை நடத்தியது யார் என்பது இன்னும் உறுதிப்படுத்தப்படவில்லை.
காபூல் விமான நிலையத்து்ககு வெளியே நடந்தது இரண்டு தாக்குதல்கள் என்று பிபிசியின் பாதுகாப்பு விவகாரங்கள் செய்தியாளர் ஜோனாத்தன் பீல் தெரிவித்துள்ளார்.
இரண்டு தாக்குதல்களும் விமான நிலையத்தின் அப்பி வாயில் பகுதியிலேயே நடந்தது என்றும் அங்குதான் கடந்த சில நாட்களாக ஏராளமான ஆப்கன் அகதிகள் காத்திருந்ததாகவும் ஜோனாத்தன் கூறுகிறார்.
காபூல் விமான நிலையத்துக்கு வெளியே தற்கொலை குண்டுவெடிப்பு தாக்குதல் நடந்தபோது காயம் அடைந்தவர்களை உள்ளூர் மருத்துவமனைகளுக்கு அழைத்துச் செல்ல நடவடிக்கை எடுக்கப்பட்டுள்ளதாக உள்ளூர் தொலைக்காட்சியான டோலோ நியூஸ் தெரிவித்துள்ளது.
அங்கு இரண்டு தாக்குதல்கள் நடந்ததாக தகவல்கள் வருகின்றன. ஆனால், அதை பிபிசி இன்னும் சுயாதீனமாக உறுதிப்படுத்தவில்லை.
சம்பவம் நடந்தபோது நூற்றுக்கணக்கான மக்கள் விமான நிலைய வாயில் பகுதிக்கு எதிரே நின்றிருந்ததாக கூறப்படுகிறது. அவர்களை வாயில் பகுதியில் இருந்த தாலிபன்கள் உள்ளே செல்லுமாறு வற்புறுத்தி வானை நோக்கி துப்பாக்கியால் சுட்டபடி இருந்ததாகவும் தெரிய வருகிறது.
இந்த தாக்குதலை நடத்தியது யார் என்ற விவரமும் இன்னும் உறுதிப்படுத்தப்படவில்லை.
காபூல் விமான நிலையத்துக்கு வெளியே நடந்த தாக்குதலில் குறைந்தபட்சம் 11 பேர் பலியாகியிருக்கலாம் என்று தாலிபன் தெரிவித்துள்ளது.
சில வெளிநாட்டினர், பெண்கள், குழந்தைகள், தாலிபன் போராளிகள் சிலர் காயம் அடைந்துள்ளதாக தாலிபன் அதிகாரிகள் தெரிவித்துள்ளனர்.
காபூல் விமான நிலையத்தில் பாதுகாப்புப் பணியில் ஈடுபட்டுள்ள நேட்டோ படையில் அங்கம் வகிக்கும் பிரிட்டிஷ் துருப்புகளுக்கு காயம் ஏற்பட்டதாக தகவல் இல்லை என்று பிரிட்டன் பாதுகாப்புத்துறை தெரிவித்துள்ளது.
காபூல் ஹமீத் கர்ஸாய் சர்வதேச நிலையத்தின் அப்பே வாயில் பகுதியில் பிரிட்டிஷ் படையினர் பாதுகாப்புப் பணியில் ஈடுபட்டுள்ளனர்.
அதே சமயம், அமெரிக்க பாதுகாப்புப் படையைச் சேர்ந்த மூன்று வீரர்களுக்கு காயம் ஏற்பட்டதாக அங்கிருந்து வரும் தகவல்கள் தெரிவிக்கின்றன.
