còmhla ri Fearghas MacBheathain

Available for 28 days

Anns an t-seirbheis cluinnidh sibh na sailm agus an leughadh a leanas: Salm 51: 10-12 air fonn Torwood le Lachlann MacDhùghaill os cionn na seinn agus Salm 33: 21-22 air fonn Kilmarnock le Dòmhnall Ailig Dòmhnallach os cionn na seinn, agus chaidh na sailm seo a chlàradh le taic bho choitheanal Eaglais na h-Alba ann an Loch nam Madadh. Salm 103: 08-10 air fonn London New agus 's e Dòmhnall MacSuain a tha os cionn na seinn le taic bho choitheanal Eaglais na h-Alba air an Tairbeart. Leughadh: Isaiah 1: 09-20 Ceann-teagaisg: Romanaich 12 'S ann do Chnoc an Torran ann an Uibhist a Tuath a bhuineas Fearghas MacBheathain. Fhuair e oideachadh ann am Bun-sgoil agus Àrd-sgoil Phaibil an Uibhist a Tuath. Nuair a bha e deiseil anns an sgoil, chuir e ùine seachad ag obair mar phosta. Ann an 1990 thill e air ais dhan sgoil, agus an turas seo bha e a' frithealadh Sgoil Lionacleit airson dà bhliadhna. Bha seo mar phàirt den obair ullachaidh a bh' aige ri dhèanamh agus e a' dol a-staigh airson a bhith na mhinistear. Chuir e seachad ùine ann an coitheanal Eaglais na h-Alba air an Tairbeart na oileanach agus chrìochnaich e an obair ullachaidh aige ann an Obar Dheathain. Chaidh a phòsadh ris a' chiad choitheanal aige ann an Cille-Mhoire agus Paibil an Uibhist a Tuath. Às dèidh sin ghluais e gu coitheanal a' Chnuic anns an Rubha ann an Leòdhas. Tha Fearghas agus a bhean Ella 's an dithis chloinne aca air ais ann an Uibhist a Tuath agus, ged nach eil e a' leantainn dreuchd ministeir, bidh e fhathast bho àm gu àm a' searmonachadh anns an sgìre aige fhèin. Tha e an-diugh an sàs ann an obair croitearachd agus ann an obair clèireachd. Nuair a gheibh e ùine dha fhèin, 's toil leis a bhith ag obair air a' chroit, anns a' ghàrradh agus a' gabhail beagan fois a' leughadh.