Taghadh de chèilichean na seachdain

Available for 27 days

'S iomadh cèiliche inntinneach a th' air a bhith air aoigheachd aig Cathy NicDhòmhnaill tron nam bliadhnaichean agus 's iomadh còmhradh tarraingeach a tha sinn air a chluinntinn. A seo tha sinn a' faighinn taghadh dhiubh bho 2024 Buinidh Dolina Ross do Bharabhas ann a Leòdhas ach tha i a' tàmh ann an Inbhir Nis. Tha i na sàr-eòlaiche ann an karate chun ìre 's gu robh i a' frithealadh, 's a' buannachadh, farpaisean nàiseanta 's eadar-nàiseanta. Tha i ag innse mar a thug tachartas na beatha oirre sgilean ionnsachadh airson i fhèin a dhìon Tha Coinneach MacLeòid à Sgalpaigh an-diugh na chomhairliche ach bha e bliadhnaichean ag obair do Roinn Cìs is Cusbainn a' riaghaltais. 'S iomadh sgeulachd inntinneach a th' aige bho làithean obrach; agus mu chuspair a tha sinn gu tric a' faicinn sna naidheachdan. 'S ann à Port nan Long, san Eilean Sgitheanach a tha Seonag NicAsgaill, ged a tha i an-diugh a' fuireach ann an Siorrachd Pheairt. Na beatha obrach, bha i a' ruith air taighean-staile air feadh na dùthcha, mar neach-sgrùdaidh. Tha Calum Fionnlasdan air a dhreuchd a leigeil dheth bho chionn ghoirid, an dèidh seòladh air feadh an t-saoghail mar chaiptein mara. Tha e fhèin 's an teaghlach air a bhith fuireach ann an iomadh ceàrnaidh dhen t-saoghal, 's iad a-nise air tilleadh a Nis ann a Leòdhas, an sgìre far an do rugadh 's a thogadh e. Choisinn Shelagh Chaimbeul duais airson ficsean aig Duaisean Litreachais na Gàidhlig san t-Sultain 2024. Eadar a h-obair aig Roinn nan Inbhean Malairt, a teaghlach aig a bheil dlùth cheangail ri sgrìobhadh, agus mar a thàinig i fhèin gu sgrìobhadh sa chiad àite, 's iomadh cuspair ris an do shuath i fhèin is Cathy.