Maamulka Hirshabeelle oo ka hadlay xil ka qaadista Cali Jayte

Tebinta tooska ah wararka BBC Somali

Tebin toos ah

19 Juunyo 2023Ninka ugu caansan mucaaradka Ruushka oo dacwad hor leh lagu soo oogay
Xigashada Sawirka, Reuters
Xulafada ninka ugu caansan mucaaradka Ruushka -- Alexei Navalny -- ayaa dhaleeceeyay go'aanka lagu joojinayo baahinta dacwadda kiiskii ugu dambeeyay ee maxkamaeed ee isaga ka dhanka ah.
Mr Navalny, oo horey xabsiga ugu jiray muddo dheer, ayaa wajahaya eedeymo cusub oo xag jir ah, iyadoo dacwadiisa lagu dhageysanayo gudaha xabsiga gumeysiga oo uu ku xiran yahay.
Saxafiyiinta waa loo diiday inay si toos ah u booqdaan, laakiin waxay awoodeen inay la socdaan bilawga dacwadda iyadoo intakale ee dacwada la damiyaya videe-ga.
Dhawaaqa ayaa la sheegay inuu aad u liito oo aan si weyn loo maqli karin.
19 Juunyo 2023Burkina Faso oo soo dhaweysay go'aankii ay Mali ka soo saartay ciidamada Qaramada midoobay
Xukuumadda militariga Burkina Faso ayaa sheegtay inay soo dhaweynayso go'aanka Mali ee ah inay ku xaqiijiso "madaxbanaanideeda… inay noqdaan kuwa kaligood ah masiirkooda katashada" ka dib markii wasiirka arrimaha dibadda Mali Abdoulaye Diop uu ugu baaqay QM inay ciidamadeeda nabad ilaalinta ah kala baxdo dalkiisa "sida ugu dhaqsiyaha badan".
Xigashada Sawirka, Reuters
19 Juunyo 2023General Ibraahim Sheekh Muxyadiin Caddoow oo loo magacaabay Taliyaha cusub ee Ciidanka Xoogga Soomaaliya
Xigashada Sawirka, SONNA
Golaha Wasiirrada Xukuumadda Federaalka Soomaaliya ayaa kulankoodii caadiga ahaa ee galabnimada isniinta dhacay waxay ku ansixiyeen soo jeedinta Wasaaradda Gaashaandhigga ee Taliyaha cusub ee Ciidanka Xoogga dalka Soomaaliya in uu noqdo, General Ibraahim Sheekh Muxyadiin Caddoow.
Sida ay sheegtay warbaahnta dawladda, kulanka oo uu guddoominayey Ra’iisul Wasaaraha Xukuumadda Federaalka Soomaaliya Xamsa Cabdi Barre, ayaa sidoo kale lagu ansixiyey Hindise Sharciyeedka Xafiiska Hanti-Dhowrka Guud ee Dowladda, Xeerka Dhismaha Xarunta Tubsan, Xeer Nidaamiyaha Ruqsadda Korontada, Xeer Nidaamiyaha Tariifada Adeegga Korontada iyo Qaraar ku saabsan Qorista Shaqaalaha Dowladda. Taliyaha cusub ee Ciidanka Xoogga dalka Soomaaliyeed Gen. Ibraahim Sheekh Muxyadiin Caddoow, ayaa horey u soo qabtay xilal ciidan oo kala duwan oo ay kamid yihiin Taliyaha Ilaalada Ciidanka Xoogga dalka ee Madaxtooyada.
19 Juunyo 2023Nin faafin jiray muuqaallada gabdha qaaqaawan oo xabsi daa'in lagu xukumay
Wiil dhalinyaro ah oo in ka badan 100 gabdho ah u galmooday, ka dibna aflagaadeeyay ayaa lagu xukumay xabsi daa’in. Arrintan ayaa ka dhacday Nagercoil, Tamil Nadu.
Ninkan dhalinyarada ah ayaa magaciisa la yiraahdaa Kashi.
Kashi wuxuu uu khiyaameeyay gabdhaha yaryar, ardayda dugsiyada iyo kulliyadaha Tamil Nadu iyo Bangalore. Gabdhaha da'da yar ee uu dhibka u geystay waxay ka badnaayeen boqol.
Xiligaas waxaa baraha bulshada lagu faafiyay muuqaalo oohin ah oo laga soo duubay dumarka qaarkood oo loo hanjabay oo uu Kashi ku madoobaynayo. Waxay dhalisay muran badan iyo xiisad.
Sida laga soo xigtay bilaysku, wuxuu haystay in ka badan 1900 oo sawir oo qaawan oo haween da'yar ah iyo in ka badan 300 muuqaallo oo qaawan oo ku jira taleefankiisa gacanta.
Xukunka kiiskan ayaa lagu dhawaaqay Arbacadii taarikhdu marakay aheyd 14.
Garsooraha Maxkamadda Joseph Joy ayaa Kashi ku xukumay xabsi daa’in sida uu qabo qaybaha 376(2), 354 C iyo 506(22) ee xeerka ciqaabta Hindiya. Sidoo kale waxaa lagu ganaaxay lacag dhan hal lakh rupees.
19 Juunyo 2023Maxay tahay arrinta uu Mareykanka aad uga xun yahay ee ay Israa’iil sameysay?
Xigashada Sawirka, Getty Images
Maraykanka ayaa sheegay in uu "aad uga xun yahay" soo jeedinta cusub ee Israa'iil ee ah in la ballaariyo deegaamaynta Daanta Galbeed ee la haysto.
Israa’iil ayaa axaddii ansixisay in Belzel Smotrich, oo ah wasiir aad u taagareesan balaarinta deegaamenta daanta galbeed la siiyo awoodda qorshaynta dejinta mustaqbalka ee Daanta Galbeed.
Wasaaradda arrimaha dibadda ee Mareykanka ayaa sheegtay in ficillada Israa’iil ay jebinayaan ballan-qaadyadii hore ee ay u sameysay maamulka Biden.
Hogaamiyayaasha Falastiin ayaa cambaareeyay talaabooyinkan cusub, waxayna ugu baaqeen beesha caalamka inay soo farageliyaan.
19 Juunyo 2023Ciidamada Israa'iil oo dilay ugu yaraan afar falastiiniyiin ah
Xigashada Sawirka, Getty Images
Ciidamada Israa'iil ayaa dilay ugu yaraan afar falastiiniyiin ah - oo uu ku jiro wiil shan iyo toban jir ah - waxayna dhaawaceen ugu yaraan afartan iyo shan kale intii lagu guda jiray weerar ay ciidanku ku qaadeen Daanta Galbeed ee la haysto.
Maleeshiyada Falastiniyiinta ah ayaa walxaha qarxa la beegsaday baabuurta Israel ee gudaha u gashay xerada qaxootiga ee Jenin.
Ciidamada Israa'iil ayaa markaa adeegsatay diyaarad nooca qumaatiga u kaca ah ee daanta galbeed markii ugu horreysay muddo labaatan sano ah si ay u fududeyso badbaadinta toddoba askari oo dhaawac ah.
Weerarkan ayaa la isku dayey in lagu soo qabto laba nin oo Falastiini ah.
Israa'iil ayaa marar badan weerartay Jenin iyo kaamamka ku dhow shan iyo tobankii bilood ee la soo dhaafay.
19 Juunyo 2023Filimka Hindiga ah ee ka careysiiyay Nepal
Xigashada Sawirka, KRITISANON
Kadib murankii ka dhashay filimka hindi ah oo lagu magacaabo Adipurush ee dalka Hindiya lagu sameeyay, duqa magaalada caasimadda ah ee Nepal Kathmandu ayaa ku dhawaaqay in la mamnuucay dhammaan filimada Hindiga ah.
Duqa magaalada Nepal Balen Shah ayaa uga digay soo saarayaasha filimka inay wax kabedelaan filimka Adipurush muddo saddex maalmood gudahood hadii ta suuragaliweydana, dhaman filimida hindiga ah ay mamnuuc kayihiin Kathmandu.
Bishan June 18-keedii ayay aheyd markii uu duqa magaalada Balen Shah uu amar ku bixiyay in dhammaan hoolalka shineemooyinka ee Kathmandu ay joojiyaan daawashada filimka Adipurush.
19 Juunyo 2023Dad loo soo xiray weerarkii ka dhacay Uganda ee dadka badan ku dhinteen
Xigashada Sawirka, EPA
Maamulka Uganda ayaa sheegay in saddex qof ay u xireen weerar Jimcihii lagu qaaday iskuul ay ku dhinteen ku dhawaad 40 qof oo kuyaalla Uganda.
Inta badan dhibanayaasha ayaa ahaa arday wax ka baranaysay iskuulka Lhubiria ee ku yaala galbeedka magaalada Mpondwe.Arday badan badan ayaa lagu gubay guryihii ay jifeen.
Guddoomiyaha degmada Joe Walusimbi ayaa sheegay in xariga uu daba socday xog ay heleen dadka deegaanka oo lasoo wadagen ciidamada amaanka.
19 Juunyo 2023Madaxweynaha Ugandha oo ka caafimaaday cudur laga helay
Xigashada Sawirka, Yoweri Museveni/Twitter
Qoraalka sawirka, Yoweri Museveni
Madaxweynaha dalka Uganda Yoweri Museveni ayaa sheegay inuusan hadda qabin cudurka Covid-19 oo dhawaan laga helay. Dhowr iyo toban maalmood ka hor ayaa xanuunka laga helay Museveni, waxasae uu hadda sheegay inuu ka caafimaaday wax uu ku tilmaamay “cadow”.
Markii la shaaciyay dhawaan madaxweynaha Uganda inuu cudurku qabo ayaa siyaabo kala duwna looga falceliyay.Wuxuu ku booriyay dadka dalkiisa in ay raacaan tillaabooyinka caafimaad ee looga hortagayo cudurka isla markaana ay iska ilaaliyaan cabista sigaarka iyo waxyaabaha kale ee maanka dooriya.
Sidoo kale wuxuu sheegay in ay sameeyaan jimicsi ayna cunaan cuntooyinka caafimaadka leh ee Afrikaanka.Inkastoo ururka caafimaadka Adduunka ee (WHO) uu shaaciyay in Covid ka dhamaaday dunida haddana wali waa xaalad caafimaad oo taagan oo khatarteeda leh.
19 Juunyo 2023Maamulka Hirshabeelle oo ka hadlay xil ka qaadista Cali Jayte
Xigashada Sawirka, SOCIAL MEDIA
Qoraalka sawirka, .
Maamulka Hirshabeelle ayaa ku eedeyay guddoomiyihii xilka laga qaaday ee gobolka Hiiraan Cali Jayte Cismaan, in isaga iyo siyaasiin kale ay ka horyimaadeen mideynta canshuurta gobolka Hiiraan iyo Hirshabeelle inteeada kale.
Sidoo kale mamaulka ayaa sheegay in tillaabo ay ka qaadi doonaan haddii Cali Jayte u hoggaansami waayo xil ka qaadista lagu sameeyay.
Halkaan ka dhageyso warayso BBC-du la yeellatay wasiir ku xigeenka war-faafinta mamaulkaasi Cabdishakuur Cabdullaahi Axmed (Shaashaa):
Qoraalka Codka, Maamulka ayaa ka hadlay sababta ay xilka uga qaadeen Cali Jeyte
19 Juunyo 2023Dowlad tillaabo ka qaadeysa dadka caanka ah ee been abuurka ku faafiya baraha bulshada
Xigashada Sawirka, ERIC FOUGERE/CORBIS VIA GETTY IMAGES
Dowladda Faransiiska ayaa qaadeysa tillaabooyin ay wax kaga qabaneyso waxyaabaha been abuurka ah ee lagu soo bandhigo baraha Online-ka.
Dadka caanka ah ee isticmaala baraha bulshada ayaa dadka qaab xayaysiin ahaan ah ula wadaago alaabo been abuur ah sida dawooyinka Kansarka iyo waxyaabo kale iyagoo dadka ka dhaadhiciya in waxyaabahaasi ay yihiin kuwo dhab ah.
Sharciga cusub ee dowladda Faransiiska ku beegsanayo dadka samaeynta ku leh baraha bulshada ayaa dhigaya ganaax lacageed oo aad u badan iyo xariga laba sano ah, oo looga golleeyahay in loogo hortago baahinta alaabaha la buunbuuniyo ee lagu soo bandhigo baraha bulshada.
Audrey, oo ah hooyo haysata laba carruur ah, ayaa sheegtay in ay aad uga naxday awoodda dadka saamaynta ku leh baraha bulshada, kuwaas oo qaarkood magacyadooda ku soo bandhigay alaabaha ay xayaysiinayaan.
Waxay sheegtay markii ay aragatay xidig hore oo Tv ku soo bandhigtay kaniini lagu sheegayo inuu daaweeyo cudurka Kansarka, taasi oo aan wax ka jirin.
Arrintaan waxaa walaac ka muujiyay dad badan oo qaarkood laga yaabo iney rumeystaan alaabaha been abuurka ah baraha Internedka lagu soo bandhigo.
19 Juunyo 2023Daryanka hub culus oo laga maqlay Garoowe
Xigashada Sawirka, PSF
Dhawaaqa hub culus ayaa laga maqlay qeybo ka mid ah magaalada Garoowe ee xarunta maamul goboleedka Puntland.
Weriyeyaal iyo dad magaalada degan oo la hadlay BBC ayaa ku sheegay in dhawaaqa hub la maqlay uu yahay hub ay tijaabo ahaan u ridayaan ciidamo gadoodsan oo kasoo horjeeda in la furo dastuurka maamulka.
Ciidamadan ayaa ku sugan aagga jidka soddonka ee magaalada. Ciidamadan ayaa la magacbaxay Danab.
Sidoo kale, ciidamo kale oo kuwa dowladda ah ayaa lagu arkayaa qeybo wadooyinka muhiimka ah ee magaalada, xarumaha dowladda iyo tan baarlamaanka.
Barlamaanka oo fadhigooda caadiga ah furmay toddobaadkii hore ayaa maanta shir ku leh xaruntooda.
19 Juunyo 2023Dadkii ugu badnaa oo ka qayb galaya aaska shan gabdhood oo Soomaali ah
Xigashada Sawirka, DAR AL FAROOQ CENTER
Aaska shan gabdhood oo Soomaali ah dhawaanna ku geeriyooday shil gaari oo ka dhacay gobolka Minnesota, ayaa maanta salaadda duhur kadib xilliga Mareykanka lagu wadaa inuu ka dhaco gobolkaas, iyadoo la filayo iney ka qayb galaan dadkii ugu badnaa. Geerida gabdhahaan ayaa si weyn u gilgishay Soomaalida Mareykanka.
Wariye Siyaad Saciid Saalax oo BBC-da uga soo soo warrama Mareykanka ayaa noo haya faahfaahinta:
Qoraalka Codka, Gabdhahan ayaa ahaa saaxiibbo aan kala harin
19 Juunyo 2023Dhegeyso: Cali Jeyte oo sheegay in xil ka qaadistiisa ay kala dhantaaleyso howlgalka la dagaallanka al-Shabaab
Guddoomiyihii xilka laga qaaday ee Gobolka Hiiraan Cali Jeyte Cismaan oo waraysi siiyay BBC-da ayaa wali ku adkeysanaya inuu yahay gudoomiyaha gobolka, isagoo sheegay in wixii hadda ka dambeeya Hiiraan aanay ka sii mid ahaan doonin Maamulka Hirshabeelle.
Cali Jeyte ayaa xil ka qaadis tiisa ku tilmaamay mid loogu talagalay in lagu kala dhantaalo guulihii laga gaaray dagaalka ka dhanka ah ururka al-Shabaab.
Cali Jeyte ayaa khadka taleefanka ee Beledweyne ugu warramay weriyaha BBC-da ee Muqdisho Ibraahim Maxamed Aadan, oo marka hore weydiiyay sida uu u arko shaqo ka fariisintiisa:
Qoraalka Codka, Cali Jayte Cismaan
18 Juunyo 2023Xasilooni laga dareemayo Suudaan
Xigashada Sawirka, Reuters
Heshiiskii ugu dambeeyay ee xabbad-joojin ku meel gaar ah una dhaxeysa kooxaha isku haya Suudaan ayaa u muuqata mid degganaan abuurtay, kaddib isku dhacyo iyo duqeymo cirka ah oo xalay dhan socday.
Qof deggan caasimadda Kahtuum ayaa BBC u sheegay inay xaaladdu degganeyd, wuxuuna rajo ka muujiyay in heshiisku uu billow u yahay dhammaadka dagaalka.
Wuxuu sheegay in dadku ay ka daaleen colaad, dhimasho iyo xatooyo.
xabbad-joojintan 72 saac ah ayaa waxaa shalay ku dhawaaqay dhexdhexaadiyeyaasha Mareykanka iyo Sacuudiga.
Heshiisyadii hore ee xabbad-joojinta si buuxda uma hirgelineyn dhinacyada dagaalka ku lugta leh.
18 Juunyo 2023Madaxweynaha Uganda oo cambaareeyay weerarkii shalay iskuulka lagu qaaday
Xigashada Sawirka, Getty Images
Madaxweynaha Uganda, Yoweri Museveni ayaa cambaareeyay weerarkii ka dhacay deegaanka Mpondwe, koofur-galbeed Uganda, halkaasoo maleeshiyaad lala xiriirinayo kooxda IS ay ku dileen 41 qof.
“Gumaadkan cusub ee xubnaha ADF waa dembi, kalsooni la'aan, argagagixisannimo iyo wax ma tarnimo ah,” ayuu ku yiri qoraal uu soo saaray.
Ilaa 37 ka tirsanaa ardayda Mpondwe Lubiriha Secondary school, waardiye iyo saddex qof ayaa ku dhintay weerarkaas.
Lix la rumeysan yahay inay arday ahaayeen ayayna weerar yahannadu afduubteen lana aadeen dalka Congo.
Weli ma cadda sababta iskuulka, oo hore loo yiqiinnay Nyabugaando Peter Hunter Secondary School uu bartilmaameedka u noqday.
Madaxweynaha iyo Marwada Koowaad ee Uganda, Janet Museveni oo sidoo kale ah wasiirka waxbarashada dalkaas ayaa labadooduba su'aal geliyay maamulka iyo cidda leh iskuulka.
18 Juunyo 2023Ciraaq oo lagu soo bandhigay dhagax loox jiray labo kun iyo sideed boqol oo sano
Xigashada Sawirka, Reuters
Qoraalka sawirka, Madaxda Ciraaq ayaa sheegaya inay dib u soo celinayaan alaabihii qadiimiga ahaa
Dhagax Loox jiray muddo ku siman labo kun iyo sideed boqol oo sano ayaa lagu soo bandhigay dalka Ciraaq kaddib markii laga soo celiyay dalka Taliyaaniga oo uu yaalay afartan sano.
Waa loox dhoobo ka sameysan oo qadiimi ah oo lagu qori jiray fartii hore ee baabiliyoonka.
Madaxda Taliyaaniga ayaa labo todobaad kahor ku wareejiyay Madaxweynaha Ciraaq Cabdul Ladiif Rashiid, munaasabad ka dhacday magaalada Bologna ee wadanka Taliyaaniga.
Ma cadda sida dhagax looxan lagu helay iyo sida uu ku yimid Taliyaaniga, kaasoo boolisku qabteen kun iyo sagaal boqol iyo sideetameeyadii.
Wasiirka Dhaqanka ee Ciraaq Axmed Badrani ayaa sheegay in ay suurtagal tahay in la helay dhagax looxan xiligii qodista waxyaabaha qadiimiga ah ee Biyo Xireenka Musuul, kaasoo la dhisay xiliyadaas.
Ciraaq oo badanaaba lagu sheego hoyga ilbaxnimada ayaa lagu tilmaamaa meelihii ugu horreeyay ee far qoraaleedka.
Boobka waxyaabaha qadiimiga ah ee Ciraaq ayaa xoogeystay kaddib qabsashadii Maraykanku hoggaaminayay ee labaatan sano kahor.
Madaxweynaha Ciraaq ayaa amaanay wadashaqaynta Taliyaaniga, isagoo sheegay inuu xoogga saari doono sidii dib loogu heli lahaa alaabaha taariikhigia ah ee Ciraaq dibadda uga maqan.
18 Juunyo 2023Madaxweyne Geelle oo dhinacyada Suudaan ugu baaqay inay nabadda ka shaqeeyaan,
Xigashada Sawirka, SOCIAL
Madaxweyne Ismaaciil Cumar Geelle ayaa khadka telefoonka kula hadlay hoggaamiyaha milatariga xukuma dalka Suudaan, Cabdulfataax al-Burhaan.
Wicitaankan ayaa waxaa uu ku soo beegmayaa maalmo ka dib shir madaxeedka 14-aad ee Ururka IGAD oo ka dhacay dalka Jabuuti.
Labada hoggaamiye ayaa waxay ka waada hadleen xaaladihii ugu danbeyay ee dalka Suudaan, sida dagaallada maalmihii ugu dambeeyay dalkaas ka jiray ee sababay barakaca dadka shacabka ah.
Madaxweynaha Jabuuti oo ah guddoomiyaha urur-goboledka IGAD ayaa isaga oo fursaddan ka faa'iideysanaya waxa uu labaada dhinac ee ku dagaallamaya Suudaan ugu baaqay inay nabad iyo wada hadal ku dhammeeyaan xiisadda, una hoggaansamaan dhexdhexaadinta uu ururku wado.
Madaxweyne Gellee ayaa ka mid ah afarta madaxweyne ee IGAD ka tirsan ee loo xil saaray wax ka qabashada dhibaatada Suudaan.
18 Juunyo 2023Cali Jeyte oo sheegay in Hiiraan aanay ka sii mid ahaan doonin Hirshabeelle
Xigashada Sawirka, Mohamed ibraahin
Qoraalka sawirka, Cali Jeyte oo furimaha dagaalka jooga
Gudoomiyihii xilka laga qaaday ee gobolka Hiiraan Cali Jeyte Cismaan oo shir jaraa’id ku qabtay magaalada Beledweyne ayaa sheegay in Hiiraan aanay ka sii mid ahaan doonin Maamul Goboleedka Hirshabeelle kaddib markii uu sheegay inuu arintaasi kala tashaday waxgaradka Gobolka.
Cali Jeyte ayaa sheegay in wixii hadda ka dambeeya saraakiisha Hirshabeelle aanay iman karin Gobolka Hiiraan, isagoo ugu baaqay kuwa hadda jooga inay degdeg uga baxaan.
“Waxa ka mamnuuca gobolkan inaan dadka u cadeeyo, qof sheeganaya magaca la yiraahdo Hirshabeelle, hadduu Beledweyne joogo maaha meeshii uu ka dhoofi lahaa, malaha biyo baxdada ayuu sii raaci doonaa, mid bannaanka jirana ma imaan doono, waxa xiran garoonka Beledweyne, dhulkuna waa xiran yahay, cirkuna waa xiran yahay.”
Cali Jeyte ayaa ku hanjabay in diyaaraddii ka dhaga adeegta amarkiisa ay dhibaato la kulmi doonto.
Cali Jeyte waxa kale oo uu sheegay in la qaban doono shir lagu dhisayo maamul uu yeesho Gobolka Hiiraan, isagoo tilmaamay inuu sii wadi doono dagaalka ka dhanka ah Alshabaab.
Shirka jaraa’id ee Cali Jeyte aya yimid kaddib markii xalay wareegto ka soo baxday Madaxweynaha Hirshabeelle Cali Guudlaawe Xuseen xilka looga qaaday, taasoo sida muuqata uu aad uga carooday.
18 Juunyo 2023Madaxweyne Biixi oo mar kale ku celiyay in Gobolka Sool ay ka dagaalamayaan Alshabaab
Xigashada Sawirka, SLNTV
Qoraalka sawirka, Madaxweyne Biixi oo dhex socda ciidanka
Madaxweynaha Jamhuuriyadda iskeed ugu dhawaaqday madaxbannaanida ee Somaliland Muuse Biixi Cabdi oo saaka ka hadlayay Kuliyadda Cabdillaahi Askar ee deegaanka Dararweyne ee duleedka Hargeysa, oo tababar loogu soo xirayay ciidamo ka tirsan milatariga Somaliland, ayaa mar kale ku celiyay in gobolka Sool ay ka dagaalamayaan ururka Alshabaab iyo Puntland.
Madaxweyne Biixi ayaa yiri “huwanta laguu sheegayo waa qayb Alshabaab ah, iyo Puntland oo Soomaaliya kamid ah oo cilmi cusub oo aduunka ku cusub keentay, oo leh si qabiil ah ama hayb ah ayaan u sameynaynaa dal dhexe oo Soomaaliyana ahayn, Somaliland na ahayn, ee magac hayb leh, taasi mid suurta galaysa maaha.”
Madaxweyne Muuse Biixi Cabdi ayaa sidoo kale sheegay inaanay marnaba ogolaan doonin in Alshabaab ay xeryo ka sameysato Somaliland.
“Alshabaab ma ogolin in dalkan ay ka sameyso qas, oo ka sameyso xeryo dheeraada ee waa ka daafacaynaa.” Ayuu yiri Madaxweynaha Somaliland.