Shirka Golaha Wadatashiga Qaran oo ka furmay Muqdisho

Ku soo dhowaada tebinta tooska ee BBC Somali

Tebin toos ah

22 Maajo 2021Shiinaha oo gaari ku dul dejiyay meeraha Mars
Xigashada Sawirka, Getty Images
Gaariga lagu hago rimuudka ee uu Shiinuhu soo saaray, kaas oo meeraha Mars toddobaad kahor ku degay, ayaa caga dhigtay meeraha Guduudan.
Gaarigan oo lagu magacaabo Zhurong, ayaa ka war dooni doona inay nolol ka jirto meerahaas, iyaga oo qiimeyn ku sameynaya.
Kuxigeenka taliyaha hogaaminaya howlgalkan, ayaa sheegtay in gaarigan loogu talagalay inuu meeraha Mars ku sugnaado muddo 92 saacadood.
Waxay sheegtay in shaqada gaariga ay qayb ka tahay himilada Shiinaha ee ah in wax badan laga ogaado Mars iyo kheyraadkeeda
22 Maajo 2021Koonfur Afrika oo ay ku soo badanayaan dhaca iyo dilka loo geysto ganacsatada Soomaalida
Dalka Koonfur Afrika, ayaa waxaa waayadii danbe aad ugu soo badanayay Soomaalida lagu laylanayo halkaa, iyadoo hantidooduna dhac loo geysto.
Xalay ayaa waxaa magaalada Cape Town lagu dilay ganacsade Soomaali ah oo sida la sheegay rag hubaysani ay goobtiisa ganacsiga ku dileen, waana dilkii 7-aad ee Soomaalida lagu laynayo oo muddo 2 toddobaad gudahood ah halkaa ka dhaca.
Axmed Maxamed Sheekh Xuseen, oo ka mid ah Soomaalida deggan magaalada Cape Town ee dalka Koonfur Afrika oo BBC-da la hadlay, ayaa sheegay in iney bataan dembiyada dilka ka dhaca halkaas ay sabab u tahay, dhaqaalaha oo uu hoos u dhac ku yimid sababo la xiriira Covid-19, taasna ay keentay in burcadda ay toos u bartilmaameedsadaan ganacsatada, gaar ahaan kuwa Soomaalida.
‘‘Waxay arintan la xiriirtaa, isku dhac ay burcadda isku dhaceen, iyagoo ku dagaalamaya sidii ay dadkeena masaakiinta ah ee ganacsiyada meelaha ku heysta ay u dhici lahaayeen, oo annagaa xoolo ka qaadaneyna iyo idinku ka qaadan meysaan, ayay isugu dhaceen’’, ayuu yiri Axmed.
Booliiska dalkaas ayaa sheegay in 72 saacadood gudahood ay ku soo qabteen burcaddii geysatay dilka, haatanna ay xabsi ku jiraan.
22 Maajo 2021Gudoomiye ku xigeenka Wanlaweyn oo ka jawaabay eed loo soo jeediyay
Degmada Wanlaweyn ee gobolka Shabeellaha Hoose, oo gelinkii hore ee maanta uu dagaal ka dhacay, ayaa ku dhintay ugu yaraan saddex qof oo dhinacyadii dagaallamayay ka tirsan.
Guddoomiye ku xigeenka degmada Wanlaweyn ee arrimaha bulshada, Axmed Cabdullaahi Cabdi, ayaa ka jawaabay eed uu u soo jeediyay gudoomoomiyaha degmada, isagoona qiray in dagaalku uu u dhexeeyey asaga iyo Guddoomiyaha degmada balse beeniyey in asagu uu weerarka qaaday.
Qoraalka Codka, Gudoomiye ku xigeenka Wanlaweyn oo ka jawaabay eed loo soo jeediyay
22 Maajo 2021Dagaal ka dhacay Wanlaweyn
Wararka naga soo gaaraya degmada Wanlaweyn ee gobolka Shabeellaha Hoose ayaa sheegay in dagaal maanta gelinkii hore ka dhacay ay ku dhinteen ugu yaraan saddex qof oo dhinacayadii dagaallamayay ka tirsan.
Dagaalaka ayaa la sheegayaa in uu u dhexeeyey guddoomiyaha degmadaas iyo ku xigeenkiisa arrimaha bulshada. Si aan faahfaahin uga helno sida ay wax u dheceen iyo khasaaraha dagaalkaas ka dhashay waxaan khadka telefoonka kula xiriirnay guddoomiyaha degmada Wanlaweyn, Maxamed Siidow, Axmed Mursal Xuseen ayuuna u warramay.
Qoraalka Codka, Dagaal ka dhacay Wanlaweyn
22 Maajo 2021Afhayeenka xukuumadda oo ka hadlay shirka
Afhayeenka dowladda federaalka Soomaaliya, Maxamed Ibraahim Macalimuu, ayaa ka hadlay Shirka Shirka Golaha Wadatashiga Qaran ee Doorashooyinka dalka oo maanta ka furmay magaalada Muqdisho.
Qoraalka Muuqaalka, Afhayeenka xukuumadda oo ka hadlay shirka
22 Maajo 2021“Ma neefsan karo”: Booliiska Mareykanka oo loo heysto inay nin kale neefta ku dhejiyeen
Xigashada Sawirka, MARSHALL COUNTY JAIL/WTVF
Qoraalka sawirka, Muuqaalka ayaa muujinaya booliiska oo dhulka ku haya William
Mid ka mid ah maxaabiista jeelasha Mareykanka ayaa geeriyooday kaddib markii ay neefta ku dhegtay, xilli ay booliisku wejiga dhulka ugu qabteen, mid ka mid ah saraakiishuna uu ku leeyahay: "Waa inaadan neefsan."
Muuqaal cusub oo laga helay xabsi ku yaalla magaalada Tennessee ayaa muujinaya sida William Jennette, oo 48 jir ahaa, dhulka loo dhigay.
Dhacdadan oo sanad kahor ahayd ayaa waxaa la sheegay in ninkaasi uu mid ka mid ah shaqaalaha Xabsiga Marshall oo ku yaalla deegaanka Lewisburg uu ku lahaa
“i caawi, waxay doonayaan inay i dilaan."
Waxaa sidoo kale jirtay in sanadkii la soo dhaafay sarkaal boolis ah lagu eedeeyay in George Floyd uu ku dilay Minneapolis, Minnesota, 19 maalmood kaddib dhimashadii Mr Jennette.
22 Maajo 2021Shirka Golaha Wadatashiga Qaran oo ka furmay Muqdisho
Xigashada Sawirka, SNTV
Ra’iisul Wasaaraha Xukuumadda Federaalka Soomaaliya Maxamed Xuseen Rooble, ayaa guddoomiyay Shirka Golaha Wadatashiga Qaran ee Doorashooyinka dalka oo maanta ka furmay magaalada Muqdisho.
Shirka oo ka furmay Teendhada Afisyooni waxaa sidoo kale ka qeybgalaya madaxweyneyaasha dowlad-goboleedyada Galmudug Axmed Cabdi Kaariye Qoorqoor, Hirshabelle Cali Cabdullaahi Xuseen Guudlaawe, Jubaland Axmed Maxamed Islaam, Koofur Galbeed Cabdicasiis Xasan Maxamed Laftagareen, Puntland Saciid Cabdullaahi Deni iyo Guddoomiyaha Gobolka Banaadir ahna Duqa Muqdisho Cumar Maxamuud Maxamed Filish.
Waxaa shirka looga hadlayaa dhammeystirka Heshiiskii 17 Sep iyo xallinta khilaafka ka taagan arrimaha doorashada oo aan weli heshiis laga gaarin.
Qoraalka Muuqaalka, Shirka oo ka furmay Muqdisho
Shirkan oo ay guud ahaan bulshada Soomaaliyeed aad isha ugu hayaan ayaa dhaqdhaqaaqiisa aad laga dareemayay dhowrkii maalmood ee lasoo dhaafay magaalada Muqdisho.
22 Maajo 2021Garowe: Dad ku dhintay doox ay ku dabaalanayeen
Ilaa iyo shan carruur ah oo labo ka mid ah ay hablo yihiin oo rabay inay ku dabaashaan ceelal ku yaalla agagaaraha magaalada Garowe ayaa toddobaadyadii u dambeysay ku dhintay halkaas. Booliiska waxay digniinno ka soo saareen khatarta ka dhalan karta dhulka biya qabatinka ah ee ay roobabku ka da'een ee ay dhalintu u dabaal tagaan, iyaga oo ceelasha qaarkood ciidan ilaaliya dul dhigaya si looga gaashaanto khatarta ka iman karta. Waaliddiintuna waxay ugu baaqeen iney ubadkooda la socdaan. Axmed Cawil Jaamac ayaa warbixintan ku eegaya.
Qoraalka Codka, Dad ku qaraqmay doox ku yaalla duleedka Garowe
22 Maajo 2021
Booliska Garowe oo waalidiinta farriin u diray kaddib markii carruur dhowr ah ay ku dhinteen ceelal ku yaala nawaaxiga magaalada.
22 Maajo 2021Shirka golaha wadatashiga qaran oo Muqdisho maanta ka furmaya
Shirka Wadatashiga Qaran ee Madaxda dowladda Federaalka Soomaaliya, kuwa maamul Goboleedyada iyo Gobolka Banaadir ayaa Maanta oo sabti ah waxaa lagu wadaa inuu si rasmi ah uga furmo Magaalada Muqdisho ee Caasimadda dalka.
Afhayeenka Xukuumadda Maxamed Ibraahim Macalimuu oo Qoraal soo saaray ayaa waxaa uu ku sheegay in shirka madaxda uu maanta ka dhici doono Teendhada Afisyooni.
Afhayeenka ayaa sidoo kale sheegay in madaxda ka qeyb galeysa shirka ay soo wada xadireen, iyadoo dhinaca kale la filayo in uu madaxweynaha maamul goboleedka Hirshabeelle Mudane Cali Guudlaawe Xuseen maanta soo gaaro Muqdisho si uu oga qeyb galo shirka.
Shirkan oo ay guud ahaan bulshada Soomaaliyeed aad isha ugu hayaan ayaa dhaqdhaqaaqiisa aad laga dareemayay dhowrkii maalmood ee lasoo dhaafay magaalada Muqdisho.
22 Maajo 2021
As-salaamu Caleykum, kusoo dhawaada tebinta tooska ah ee aan idiin kuugu soo gudbinno wararkii ugu dambeeyay soomaalida iyo caalamka.
Waa Sabti taariikhda waxay ku beegantahay 22-ka bisha May 2021-ka.