Duqaymaha diyaaradaha Israa’iil ay ka geysateen dalka Lubnaan oo ay ku dhinteen ku dhawaad shan boqol oo qof

Tebin toos ah

1. 24 Sebtembar 2024Israel ayaa sheegtay in ay kordhinayaan duqeynta Lubnaan

   

   Xigashada Sawirka, Reuters

   Militeriga Israel ayaa sheegay in ay kordhinayaan weerarka ay ku qaadeen Xisbullah ee dalka Lubnaan kaddib duqeyntii shalay ee boqolaalka qof ku dhinteen.

   Wasiirka difaaca, Herzi Halevi, ayaa sheegay in ay kordhinayaan ololahooda iyagoo dhinac kasta ka weeraya. Beirtu ayaa ah meelihii ugu dambeeyay ee la duqeeyay.

   Wasiirka caafimaadka Lubnaan Firass Abiad ayaa sheegay in ka badan 550 haween iyo carruur ah ay ka mid ahaayeen dadka dhintay.

   Ma ahan markii ugu horeysay ee dad ka qaxan dhulka u dhow xadka Isreal iyo Lubnaan dagaalka dartiis.

   Dad aad u badan ayaa ka qaxaya guryahooda koonfurta Lubnaan. Xisbullah waxay sheegtay in ay weerartay fariisimo militeri oo ku yaal waqooyiga Israel.

   Qaramada Midoobay waxay sheegtay in 200,000 dad lagu qiyaasay in ay ka qaxeen labada dhinaca ee xadka ilaa iyo markii uu xoogeystay dagaalka bilowda toddobadii Oktoobar

   Dhinaca kale, hoggaamiyayaasha caalamka ayaa isugu yimid shirka sanadlaha New York ee Qaramada Midoobay. Dadaallo looga hortagayo in dagaalka uu ku baaho gobolka bariga dhexe ayaa ah ajandaha ugu weyn ee shirkooda.

   Mas’uul sare oo ka tirsan wasaaradda arrimaha dibadda Mareykanka ayaa sheegay in Washington ay wadato fakar gaar ah oo ay dooneyso in ay kala hadasho saaxiibadeed, kuwaas oo taageeradooda ay muhiim tahay. Wuxuu sheegay in ay doonayaan in isbahysigooda ay toos ula xiriiraan Xisbullah.

2. 24 Sebtembar 2024Ruushka ayaa heshiis dayaxgacmeed la galay 3 dal oo galbeedka Afrika ku yaal

   

   Xigashada Sawirka, AFP

   Mali, Niger, iyo Burkina Faso ayaa ku dhawaaqay in ay iskaashi la galeen Ruushka si ay u helaan isgaarsiin iyo dayaxgacmeed.

   Saddaxda dal ee galbeedka Afrika ee militerigu ka taliyo waxa uu culeys ka haystay sanado sidii ay uga adkaan lahaayeen kooxaha xagjiriinta, waxayna u wareegeen dhinaca Ruushka si ay taageero uga helaan.

   Wasiiro ka socda saddaxda dal ayaa shalay madaxda hey’adda hawada sare Ruushka ee Roscosmos kula kulmay caasimadda Mali ee Bamako, waxayna ka wadahadleen sidii lagu hirgelin lahaa qorshaha.

   Wasiirka maaliyadda Mali, Alousséni Sanou, ayaa sheegay in farsamadan ay kor u qaadeyso la socoshada xadka iyo ammaanka qaranka ee saddaxda dal. Sidoo kale wuxuu sheegay in ay ka caawineyso in ay la socdaan kana jawaabaan daadadka, abaaraha, dabka iyo waxyaabaha kale ee degdegga.

   Dalalka Mali, Niger, iyo Burkina Faso ayaa sanadkii la soo dhaafay sameystay isbahaysi kaas oo ujeedkiisa hore ahaa sidii kor loogu qaadi lahaa iskaashiga militeri balse markii dambe sii balaartay.

3. 24 Sebtembar 2024Muxuu yahay walaaca Itoobiya ay ka qabto hubka la geeyay Soomaaliya?

   

   Xigashada Sawirka, Wasiirka Difaaca Soomaaliya

   Itoobiya ayaa walaac ka muujisay qalabka militeri ay Masar geysay Soomaaliya, waxayna ka digtay in ay taasi kaga sii dareyso ammaanka geeska Afrika.

   Shirka golaha loo dhan yahay Qaramada Midoobay ee New York, ayuu wasiirka arrimaha dibadda Itoobiya ka sheegay in hubkaas uu ku dambeynayo gacmaha xagjiriinta sababo la xiriira xasilloonidarada ka jirta Soomaaliya.

   Arrintan ayaa timid maalin kaddib markii Markab dagaal oo laga leeyahay dalka Masar uu keenay shixnad hub ah oo ay ku jiraan lidka diyaaradaha iyo madaafiic. Tallabadan ayaa sii kordhineysa xiisadda u dhexeysa Itoobiya iyo Soomaaliya.

   Ma ahan markii ugu horeysay ay Masar hub keento Soomaaliya. Bishii August labo diyaaradood oo ciidamada Masar leeyihiin ayaa keenay magaalada Muqdisho hub iyo rasaas.

   Qaramada Midoobay ayaa qaaday cunaqabteynta hubka ee saarneyd Soomaaliya in ka badan 30 sano bishii Desember taas oo la saaray markii uu dalka galay dagaalka sokeeye.

4. 24 Sebtembar 2024Nin u dhashay Kuuriyada Koonfureed ayaa saaxiibtii dilay kaddibna shub ku hoos aasay

   

   Xigashada Sawirka, Getty Images

   Nin u dhashay Kuuriyada Koonfureed ayaa qirtay in uu dilay gabar saaxiibtiis aheyd kaddibna uu meydkeedi ku qariyay shub 16 sano kaddib markii la sheegay in la la’yahay.

   Ninka oo jira hadda 50 sano waxaa uu booliska u sheegay in uu ku dhuftay dubbe kaddib markii ay murmeen gurigiias oo ku yaal koonfurta magaalada Geoje.

   Kaddibna waxa uu meydka geliyay sanduuq isagoo ku daboolay dhagax iyo shamiito dayrka guriga.

   Bishii la soo dhaafay ayaa la helay meydka kaddib markii nin dayactirayay guriga uu qoday halkaas sida ay sheegtay warbaahinta gudaha.

   Meydka oo ilaa marka ku jiray sanduuq ayaa la aqoonsaday in uu ahaa haweeneydii la la’aa kaddib markii la baaray. Baarista waxaa sidoo kale lagu ogaaday in ay u dhimatay jug xooggan oo kaga dhacday madaxa.

   Ninka oo booliska ay u bixiyeen Mr A, kuma nooleen guriga balse markii meydka la helay ayaa degdeg loo xiray. Wuxuu booliska u sheegay in ay isla noolaayeen ilaa shan sano ka hor inta aysan murmin bishii Oktoobar sanadkii 2008-dii.

5. 24 Sebtembar 2024Doon 30 meyd ah badda la sabeyneysay ayaa laga helay xeebaha dalka Senegal

   

   Xigashada Sawirka, AFP

   Ugu yaraan 30 meyd ah ayaa laga helay doon laga helay meel u dhow xeebta Senegal sida ay sheegeen militeriga dalkaasi.

   Ciidamada badda ayaa lagu wargeliyay in doon ay ku luntay doon meel u jirta 70 kiilomitir caasimadda Dakar sida lagu sheegay qoraal ay ciidamada soo dhigeen barta X. Doonta oo alwaax ka sameysneyd ayaa shalay la keenay dekadda.

   “Waxaa aad u adag in la aqoonsado meydadka sababtuna waa iyagoo isbeddelay” ayaa lagu yiri qoraalka ay soo saareen ciidamada.

   Waxaa socda baaris lagu go’aaminayo goorta iyo halka ay doonta ka soo baxday iyo tirada saarneyd.

   Dhawaan waxaa kordhay tahriibayaasha ka soo baxaya xeebaha Senegal ee ku socda jasiiradaha Canary ee Spain. Waa safar looga gudbayo 1,500km oo badda Atlantic ah.

   Dowlada Senegal ayaa ku dhawaaqday qorshe 10 sano ah oo wax looga qabanayo muhaajiriinta sida sharcidarada ku socda.

   Ciidamada ilaalada xeebaha ayaa boqolaal muhaajiriin ku qabtay xeebaha dalka toddobaadyadii la soo dhaafay

6. 24 Sebtembar 2024Daawo sawirrada laga soo qaaday goobaha ay dadku naftooda kala baxsanayaan

   Waxaan halkaan idinkgu soo gudbinaynaa sawirro muujinaya xaaladda ka taagan koonfurta Lubnaan oo dad badan ay ka qaxayaan duqeymaha diyaaradaha Israa'iil.

   Hoos ka daawo sida xaaladdu tahay.

   

   Xigashada Sawirka, EPA

   

   Xigashada Sawirka, EPA

   

   Xigashada Sawirka, Reuters

7. 24 Sebtembar 2024Duulimaadyo badan oo tagi jiray magaalooyinka Beyruut iyo Tel Aviv oo la' baajiyay

   

   Xigashada Sawirka, EPA

   Qaar ka mid ah duulimaadyadii aadi jiray magaalada Beyruut ee dalka Lubnaan ayaa la baajiyay cabsi laga qabo badqabka rakaabka.

   Waxay hadda u muuqataa in qaar ka mid ah duulimaadyada Israa'iil ay sidoo kale xiisaddu saameysay. Diyaarada British Airways ayaa sheegtay inay joojisay duulimaadyadeedii Tel Aviv ilaa iyo Arbacada

   "Nabadgelyadu had iyo jeer waa mudnaantayada ugu sareysa, waxaanan la xiriireynaa macaamiisha si aan ugala talinno safarka," ayaa lagu yiri war ay soo saartay British Airways.

   Waxaa soo baxaya warar kale oo sheegaya in duullimaadyadii shirkadaha kale ee diyaaradaha ee Tel Aviv aadi jiray - oo ay ku jiraan Wizz Air iyo Azerbaijan Airlines - sidoo kale la joojiyay

8. 24 Sebtembar 2024Xisbullaah oo Israa'iil ku garaacday tiro badan oo gantaallo ah

   

   Xigashada Sawirka, Reuters

   Warar soo baxaya ayaa sheegaya in tobaneeyo gantaal lagu garaacay waqooyiga Israa’iil saacadihii hore ee saaka.Markii hore shan gantaal ayaa la ogaaday in la ganay "qaarkood waa la qabtay inta soo hartayna waxay ku dhaceen meelo bannaan," sida ay sheegeen ciidamada difaaca Israa'iil.

   Intaas kadib 50 gantaal oo kale ayaa laga helay aagga Sare ee Galili, sida ay milatariga Israa’iil sheegeen. Inta badan waa la qabtay gantaallada laakiin waxaa jira xoogaa burbur ah oo soo gaaray dhismayaal, dab-damiskana waxay ku hawlan yihiin daminta dabka, ay sababeen gantaalladaas.

   War qoraal ah oo ay soo saartay Xisbullah ayay ku sheegtay in ay ku duqeysay deegaanka Qiryat Shmona "gantaal badan".Qiryat Shmona waxay ku taal aagga Sare ee Galili ee waqooyiga fog ee Israa'iil.

9. 24 Sebtembar 2024Madaxweynaha Ukraine oo khudbad uu taageero ku dalbanayo ka jeedin doona shirka Qaramada Midoobay ee Mareykanka ka dhacaya

   

   Xigashada Sawirka, Reuters

   Madaxweynaha Ukraine, Volodymyr Zelensky, ayaa lagu wadaa in gelinka dambe ee maanta uu khudbad ka jeediyo fadhi gaar ah oo Golaha Ammaanka ee Qaramada Midoobay uu ku yeelanayo magaalada New York, kaasoo uu ku boorin doono taageero weyn oo dalkiisa laga siiyo dagaalka uu kula jiro Ruushka.

   Isagoo ka hadlayay wareysi uu siiyay ABC News, Mr Zelensky wuxuu sheegay in "qorshihiisa guusha" ay ku jiraan xirmo lacag, hub iyo dammaanad amni oo uu ka doonayo reer galbeedka, taasoo uu rajeynayo inay u soo jiido Ruushka dhanka miiska wadahadalka.

   Mr Zelensky ayaa sidoo kale lagu wadaa in uu hadal ka jeediyo shirka golaha loo dhan yahay ee Qaramada Midoobay oo ka furmaya New York galinka dambe ee Talaadada. Madaxweyne Biden ayaa lagu wadaa inuu khudbadiisii ​​ugu dambeysay u jeediyo Qaramada Midoobay ee madaxtinimadiisa iyadoo la filayo inuu ka hadlo colaadda Ukraine.

10. 24 Sebtembar 2024Iran oo ka hadashay duqeymaha Israa'iil ka waddo Lubnaan

    

    Xigashada Sawirka, Getty Images

    Madaxweynaha Iran Mascuud Pezeshkian ayaa sheegay in Israa’iil ay raadinayso inay abuurto “isku dhac ballaaran” wuxuuna si kulul u cambaareeyay duqaymaha ay Israa’iil ku hayso Lubnaan.

    "Reer Galbeedku waxay Iran ku boorinayeen inaysan ka jawaabin si aysan khatar u gelin dadaallada xabbad joojinta ee Qasa," ayuu raaciyay hadalkiisa Pezeshkian. Isaga oo hadalkiisa sii wata ayuu yiri:"Waxay noo sheegeen inaan qarka u saarnay nabad, laga yaabee toddobaad ama wax ka badan. Laakiin waligeen halkaas ma aanaan gaarin,".

    Dhinaca kale, afhayeenka wasaaradda arrimaha dibadda ee Iran ayaa uga digay Israa’iil “cawaaqib xumada” ka dhalan karta weerarka ay ku qaaday Lubnaan.

11. 24 Sebtembar 2024Mareykanka oo sheegaya inuu qaadayo tallaabo lagu joojinayo dagaalka Israa'iil iyo Xisbullaah

    Mareykanka ayaa sheegay in uu soo bandhigi doono fikrado la taaban karo oo lagu joojinayo xiisadda sii kordheysa ee u dhaxeysa Israa’iil iyo Xisbullah ee Lubnaan marka ay la kulmaan xulafada shirka Golaha loo dhan yahay ee Qaramada Midoobay ee New York toddobaadkan.

    Sarkaal sare oo ka tirsan waaxda arrimaha dibedda ayaa sheegay in Washington ay rabto inay ku 'cadaadiso' qorshayaasheeda qaar ka mid ah dalalka ay isku aragtida yihiin.

    Sarkaalkan oo magaciisa qariyay ayaa sheegay in qorshayaashaan ay ku jiraan xulafada xiriirka tooska ah la leh Xisbullaah. Isu imaatinka Golaha loo dhan yahay, oo bilaabmaya galinka dambe ee maanta, waxa uu dhacayaa iyada oo ay taagan yihiin wadahadallada la doonayo in lagu gaaro xabbad joojin ka dhacda Qasa ah iyo cabsi sii kordheysa oo laga qabo in dagaalka sii kordhaya ee u dhexeeya Israa’iil iyo Xisbullaah uu isu badelo dagaal saameeya gobolka oo dhan.

12. 24 Sebtembar 2024War deg deg ah, Wararkii ugu dambeyay duqeymaha khaasaraha badan gaystay ee diyaaradaha Israa'iil ay ka gaysteen Lubnaan

    

    Xigashada Sawirka, Getty Images

    Dadka ku dhaqan koonfurta dalka Lubnaan ayaa ka qaxaya guryahooda kadib duqeymo ba’an oo ay geysteen diyaaradaha Israa’iil.Wasaaradda caafimaadka ee Lubnaan ayaa sheegtay in ku dhawaad ​​shan boqol oo qof la dilay halka dhaawucuna uu gaarayo kun iyo shan boqol oo qof.

    Waddooyinka waqooyiga Lubnaan ku yaalla ayaa laga dareemayaa saxmad iyo ciriiri fara badan dadka baxsanaya awgeed. Dadka rayidka ah ayaa isku dayaya in ay naftooda kala baxsadaan xiisadda u dhaxeeysa Israa’iil iyo Xisbullaah oo lagu tilmaamay tii ugu dhimashada badneed muddo labaatan sano ah.

    Milateriga Israa’iil ayaa sheegay in ay duqeeyeen ku dhawaad ​​kun iyo saddex boqol oo bartilmaameed kuwaas oo ay ku tilmaameen in ay ahaayeen gantaalada cruise-ka ee Xisbullah, iyo diyaaradaha aan duuliyaha lahayn. Maamulka Lubnaan ayaa sheegay in inta badan goobaha la beegsaday ay ahaayeen dad rayid ah. Israa'iil, millatarigu wuxuu sheegay in hal milyan oo qof oo ku nool waqooyiga magaalada Haifa iyo nawaaxigeeda ay gabaad ka dhigteen goobaha Xisbullaah ay ku xoogganyihiin.