Madaxweynaha Maraykanka ayaa sheegay in aanu jiri doonin wax heshiis ah ilaa ay Iiraaniyiintu is dhiibayaan, madaxweynaha Iiraan oo u mahadceliyay Ruushka
Nimaan Osman
AFP ayaa sheegtay in saaka qaraxyo laga maqlay Dubai iyo Manama, caasimadda dalka Baxrayn.
Manama gudaheeda, shiidhiga digniin ah ayaa la maqlay, waxaana Wasaaradda Arrimaha Gudaha ee Baxrayn fariin ay ku daabacday barta X ay ku boorrisay dadka magaalada deggan “inay u tagaan goobta ugu dhow ee ammaan ah.”
Xigashada Sawirka, Getty Images
Ciidammada millatariga Iiraan ayaa ku dhawaaqay weerarro cusub oo loo adeegsaday diyaarado aan duuliye lahayn oo lagu qaaday saldhigyo Mareykanku ku leeyahay gobolka.
Milatarigu wuxuu sheegay in saaka ciidammada badda ay duqeymo drone ah ku beegsadeen saldhigyo Mareykanku ku leeyahay Abu Dhabi iyo saldhigga Al-Adiri oo ku yaalla dalka Kuwait.
Weerar loo adeegsaday diyaarado aan duuliye lahayn ayaa lagu qaaday garoonka diyaaradaha ee Baqdaad, iyadoo la beegsanayay saldhig militari oo Mareykanku leeyahay iyo xarun diblomaasiyadeed.
Sida ay sheegeen ilo dhinaca ammaanka ah, weerarka drone-ka ah oo dhacay wax yar kaddib saqdii dhexe ee Jimcaha ayaa lagu bartilmaameedsaday dhismaha garoonka Baqdaad, halkaas oo ay ku yaallaan saldhig militari iyo xarun diblomaasiyadeed oo Mareykan ah.
Sarkaal amni ayaa u sheegay AFP in “garoonka diyaaradaha lagu weeraray dhowr jeer” iyadoo la isticmaalayo diyaarado aan cidi wadin iyo gantaallo.
Mas’uuliyiinta Dubai ayaa sheegay in ay xakameeyeen “dhacdo yar” oo ay sababtay burbur ka soo dhacay gantaal ama qalab hawada lagu qabtay.
Waxay sidoo kale sheegeen in wax dhaawac ah aan la soo sheegin.
Bogagga lagu raadraaco duulimaadyada ayaa muujinaya in in ka badan lix diyaaradood oo isu diyaarinayay inay ku degaan garoonka diyaaradaha ee Dubai ay hadda hawada ku wareegayaan iyagoo sugaya oggolaansho ay ku degaan.
Xigashada Sawirka, AFP via Getty Images
Ciidammada Israa'iil ayaa sheegay in ay xalay qaadeen weerar culus oo ka dhan Iiraan iyaga oo bartilmaameedsaday xarumaha maamulkaasi.Muuqaallo ay baraha bulshada ku baahiyeen dad goobjoogayaal ah ayaa muujinaya diyaarado gubanaya iyo qiiq weyn oo ka kacaya Garoonka Diyaaradaha Mehrabad oo ah garoonka ugu mashquulka badan Iiraan islamarkaana ah xarunta ugu weyn ee duulimaadyada gudaha.
Sawirro dayax-gacmeed oo la qaaday Jimcihii ayaa muujinaya diyaarado dhowr ah oo ]yaalla goobta ay diyaaraduhu ka haadaan ee garoonka.
Warbaahinta dawladda Iiraan ayaa sidoo kale sheegtay in qaybo ka mid ah garoonka la beegsaday.
Qarax ayaa laga maqlay Quddus kaddib digniin laga bixiyay weerar gantaal oo ay Iiraan soo qaadday.
Wariye ka tirsan AFP oo ku sugan Quddus ayaa sheegay inuu maqlay qarax.
Arrintan ayaa dhacday kadib markii la maqlay siidhiga digniinta duqeyn xagga cirka ah kaas oo ka digayay weerar gantaal oo ka imanaya Iiraan.
Ciidammada Israa’iil ayaa hore u shaaciyay in nidaamyada difaaca cirku ay shaqaynayeen si ay u qabtaan gantaalladaasi.
Xigashada Sawirka, Getty Images
Wasaaradda Arrimaha Gudaha ee Baxrayn ayaa sheegtay in dalka laga shiday siidhiga digniinta si dadka loogu wargeliyo khataro jira.
Wasaaraddu waxay tiri: “Muwaadiniinta iyo dadka deggan dalka waxaa laga codsanayaa in ay is dejiyaan oo ay u guuraan goobta ugu dhow ee ammaan ah, isla markaana ay la socdaan macluumaadka laga helo ilo rasmi ah.”
Ilo ka tirsan dowladda Mareykanka ayaa u sheegay warbaahinta maxalliga ah in Ruushku uu siinayo Iiraan xog sir ah oo ku saabsan goobaha ay ciidamada Mareykanku ku leeyihiin Bariga Dhexe.
Sida ay sheegtay CBS, oo ah shuraako warbaahineed la ah BBC, saddex ilo-wareed oo uu ku jiro sarkaal sare oo Maraykan ah oo sheegay inuu si toos ah uga warqabo arrintan ayaa xaqiijiyay xogtan.
Tani waa tilmaantii ugu horraysay ee la og yahay oo muujinaysa taageerada la tuhunsan yahay ee Ruushku uu siinayo Iiraan ee dagaalkeeda ka dhanka ah Mareykanka iyo Israa’iil.
Wargeyska Washington Post ayaa noqday warbaahintii ugu horreysay ee daabacda warbixin ku saabsan iskaashi la sheegay inuu ka dhexeeyo sirdoonka Ruushka iyo Iiraan, iyadoo soo xiganaysa saddex ilo oo aan magacyadooda la shaacin.
Afhayeenka Aqalka Cad, Caroline Levitt, ayaa Jimcihii sheegtay in haddii Ruushku uu la wadaagayo Iiraan xog sirdoon, taasi aysan wax saameyn ah ku yeelanayn hawlgallada militari ee Mareykanka. “Si buuxda ayaan u cidhibtireynaa,” ayay tidhi.
Xigashada Sawirka, Getty Images
Sacuudi Carabiya ayaa sheegtay in ay fashilisay weerar lagu qorsheeyay xarun shidaal laga soo saaro iyo saldhig ciidan oo cirka ah.
Sida uu sheegay afhayeen u hadlay Wasaaradda Difaaca, oo hadalkan ku qoray barta bulshada ee X, lix diyaaradood oo aan duuliye lahayn ayaa la qabtay iyagoo ku sii jeeday goob shidaal, halka gantaal ballistic ah oo ku wajahan saldhig ciidan oo cirka ah la qabtay.
Drones-ka waxaa lagu qabtay saxaraha ku yaalla koonfurta dalka. Aaggaas waxaa ku jira kayd shidaal oo aad u ballaaran, oo ay ku jirto goobta shidaalka ee Shebaa, taas oo Wasaaradda Difaacu sheegtay inay ahayd bartilmaameedka weerarka.
Xigashada Sawirka, Getty Images
Madaxweynaha Maraykanka Donald Trump ayaa qoraal uu soo dhigay bartiisa Truth Social,ku sheegay, “Ma jiri doono wax heshiis ah oo aan la galeyno Iiraan mooyee inay si shuruud la’aan ah isu dhiibto.”
“Kadib taas, iyo doorashada Hoggaamiye WANAAGSAN oo la AQBALI KARO, annaga iyo saaxiibadeen iyo xulafadeenadii geesinimada lahaa, waxaan si daal la’aan ah uga shaqeyn doonnaa sidii Iiraan looga soo celin lahaa meel halis ah, annagoo ka dhigi doona mid dhaqaale ahaan weyn, ka wanaagsan, oo ka xoog badan sidii hore.”
“IIRAAN WAXAY YEELAN DOONTAA MUSTAQBAL WANAAGSAN. ‘KA DHIG IIRAAN MID WANAAGSAN MAR KASTA (MIGA!).’”
