Diyaarad ay leedahay shirkadda diyaaradah Hindiya oo dhacday

Tebin toos ah

1. 12 Juunyo 2025War deg deg ah, Madaxweyne Donald Trump oo ka hadlay shilkii diyaaradeed ee Hindiya ka dhacay

   Madaxweynaha Mareykanka, Donald Trump, oo ka hadlayay Aqalka Cad, ayaa sheegay inuu u soo bandhigay dowladda Hindiya “ In wax kasta oo ay la qaban karaan ay la garab taaganyihiin” kaddib “shilka argagaxa lahaa.”

   “Qofna ma ogayn waxa dhacay,” ayuu yiri. “Waxay u muuqatay in diyaaraddu si caadi ah u duuleysay.”

   Madaxweyne Trump wuxuu sidoo kale sheegay inuu aaminsan yahay in shilkaani uu yahay “mid ka mid ah shilalkii ugu xumaa ee taariikhda duulista.”

2. 12 Juunyo 2025War deg deg ah, Sawirro cusub oo laga soo qaaday goobta shilku ka dhacay

   Waxaa ka muuqanaya goobta baaxadda burburka diyaaradda dhacday ee ay laheed shirkadda diyaaradaha dalka Hindiya.

   Sawirradaan ayaa hadda naga soo gaaray goobta musiibadu ka dhacday.

3. 12 Juunyo 2025War deg deg ah, Ninkii ka badbaaday shilka diyaaradda oo xog dheeraad ah laga helay

   Waxaan haatan la hadalnay ehelka Vishwash Kumar Ramesh, Ajay Valgi, oo ku sugan magaalada Leicester.

   Wuxuu sheegay in Vishwash uu qoyska horey u wacay, isla markaana uu u sheegay inuu "wanaagsanyahay".

   Vishwash wuxuu sheegay inuusan garanayn halka uu ku sugan yahay walaalkiis Ajay, oo isna saarnaa diyaaradda.

   Ehelkooda ayaa isugu yimid guriga qoyska ee Leicester si ay u muujiyaan taageero iyo baroor-diiq. Waxay sugayaan xog dheeraad ah.

   Vishwash wuxuu leeyahay xaas iyo ilmo. BBC-da ayaa fahamsan in Vishwash uu ku dhashay Hindiya, balse uu sanado badan ku noolaa UK.

4. 12 Juunyo 2025War deg deg ah, Mas'uuliyiin Hindiya horey xilal uga soo qabtay oo ka mid noqday dadka shilka ku dhintay

   Guddoomiyihii hore ee gobolka Gujarat, Vijay Rupani, ayaa ku dhintay shilka diyaaradeed, sida uu warbaahinta u xaqiijiyay wasiirka duulista rayidka ee Hindiya.

   Rupani, oo 68 jir ahaa, wuxuu ahaa guddoomiyaha gobolka galbeedka Hindiya ee Gujarat intii u dhaxaysay 2016 ilaa 2021.

5. 12 Juunyo 2025Hal nin oo ka badbaaday diyaaraddii dhacday oo hadlay

   Waxaan helaynaa warar sheegaya in muwaadin u dhashay dalka Ingiriiska uu ka badbaaday shilkii diyaaradeed.

   Taliyaha Booliska Ahmedabad, Malik, ayaa u sheegay wakaaladda wararka ee ANI in hal qof uu ka badbaaday shilka, kaasoo fadhiyay kursiga 11A ee diyaaradda Boeing 787-8 Dreamliner.

   Wuxuu u sheegay wakaaladda ANI in ninka badbaaday “haatan ku jiro isbitaal lana daweynayo.”

   Liiska rakaabka ee ay horey u shaaciyeen mas’uuliyiinta ayaa muujinaya in qofka fadhiyay kursiga 11A uu yahay Vishwash Kumar Ramesh, muwaadin u dhashay UK.

   Warbaahinta Hindiya ayaa sheegtay in ay la hadleen Vishwash isagoo ku jira isbitaalka. Wuxuu la wadaagay nuqul ka mid ah tigidhkiisa oo muujinaya magaciisa iyo lambarka kursigiisa.

   Wuxuu yiri: “Soddon ilbiriqsi ka dib markay diyaaradda kacday, waxaa dhacay qarax weyn, kadibna diyaaraddii way dhacday. Wax walba si degdeg ah ayay ku dhaceen.”

   Waxaan weli raadineynaa faahfaahin dheeri ah, waana idiin soo gudbin doonaa marka aan helno.

6. 12 Juunyo 2025War deg deg ah, Dolwadda UK oo ka hadashay shilkii diyaaradeed ee ay ku dhinteen dad u dhashay dalkeeda

   Hay’adda Baarista Shilalka Diyaaradaha ee UK (AAIB) ayaa sheegtay inay si rasmi ah ula xirriirtay Hay’adda Baadhista Shilalka Diyaaradaha ee Hindiya.

   Waxay sidoo kale sheegtay in AAIB-da UK ay samayn doonto baaritaanno, maadaama muwaadiniin reer UK ah ay saarnaayeen diyaaradda.

   "Waxaan u direynaa khuburo Hindiya si ay gacan uga gaystaan baaritaanka ay hoggaaminayaan mas’uuliyiinta Hindiya. Waxaan dareenka murugada leh la qaybsanaynaa dhammaan dadka uu shilkan saameeyay."

7. 12 Juunyo 2025War deg deg ah, Degdeg: Muuqaal laga helay diyaaraddii dhacday ee dalka Hindiya

   Waxaa isa soo taraya wararka ku saabsan shilka diyaaradeed ee ka dhacay dalka Hindiya oo dadka badan ay ku dhinteen, iyadoo goobta ay ka imaanayaan warar kala duwan oo ku saabsan sida shilku u dhacay.

   Muuqaalkan kooban ayaa laga helay diyaaradda xilliga ay dhacaysay, waxaana aad ka arki kartaa diyaaradda oo markii ay dhacday uu cirka isku shareerayo holac iyo uuro.

8. 12 Juunyo 2025Daawo sawirro horleh oo laga helay goobta diyaaraddu ku burburtay

   Goobta shilku ka dhacay ayaa laga helay cadad ka mid ah diyaaradda dhacday maanta, waxaana ka muuqanaya burbur xooggan, iyadoo la sheegay in aaney cidi ka badbaadin shilkaan.

   Hoos ka daawo sawirrada.

9. 12 Juunyo 2025War deg deg ah, Dowladda Hindiya oo ka hadashay shilka diyaaradeed ee khasaaraha badan dhaliyay

   Afhayeenka Wasaaradda Arrimaha Dibadda ee Hindiya, Randhir Jaiswal, oo ka hadlayay shir jaraa'id oo toddobaadle ah, ayaa shilkii diyaaradda ku tilmaamay "shil aad u murugo badan".

   "Weli waxaa socda howlaha samatabbixinta. Waa in aynu wax yar sugnaa si faahfaahinta rasmiga ah loo helo," ayuu yiri.

   Laakiin wuxuu sidoo kale intaa ku daray: "Waxaan waaynay dad badan. Waxaan tacsi tiiraanyo leh u diraynaa dhammaan dadkii ay ka baxeen dadka dhintay."

10. 12 Juunyo 2025War deg deg ah, Ma jirto cid ka badbaadday shilka diyaaradeed

    Taliyaha booliska ee magaalada Ahmedabad ayaa sheegay in aysan jirin cid ka badbaaday shilka diyaaradeed ee ka dhacay galbeedka dalka Hindiya, sida ay sheegeen wakaaladaha wararka ee AFP iyo AP.

    Warark ayaa sheegaya in diyaaradda ay saarnaayeen 242 qof oo ay ku jiraan 12 shaqaalaha diyaaradda ahaa.

11. 12 Juunyo 2025War deg deg ah, Sawir laga helay diyaaradda Hindiya ee burburtay

    Waa sawir muujinaya qayb ka mid ah diyaaradda burburtay ee ay laheed shirkadda diyaaradah Hindiya.

    Waxaa ka muuqanaya sawirka in diyaaraddu ku dhacday qayb ka mid ah dhisme.

    Halkaan kala soco wararka la xiriira shilka diyaaradeed.

12. 12 Juunyo 2025War deg deg ah, Dalalka ay u dhasheen dadkii saarnaa diyaaradda dhacday oo la shaaciyay

    Diyaaradda Air Hindiya ee duulimaadkeedu ahaa AI171 waxay shaacisay tirada iyo dhalashooyinka rakaabkii saarnaa diyaaradda dhacday maanta.

    Waxay sheegtay in diyaaradda ay saarnaayeen 169 muwaadiniin oo u dhashay dalka Hindiya, 53 muwaadiniin Ingiriis ah, hal muwaadin oo u dhashay Kanada, iyo toddoba qof oo u dhalatay Boortaqiis.

    Shirkadda diyaaradda ayaa sidoo kale sheegtay in dadkii dhaawacmay loo qaaday isbitaallada ugu dhow halka shilku ka dhacay.

13. 12 Juunyo 2025Diyaarad ay leedahay shirkadda diyaaradah Hindiya oo dhacday

    Diyaarad xamuul ah oo ay leedahay shirkadda diyaaradah Air India nuuceeduna yahay Boeing 787-8 Dreamliner ayaa ku dhacday magaalada Ahmedabad ee dalka Hindiya.

    Diyaaraddan oo siddey in ka badan 200 oo rakaab ah, kuna sii jeeddey magaalada London ayaa soo dhacday wax yar ka dib markii ay ka kacday gigida Ahmedabad.

    Diyaaradda oo summadda duulimaadkeedu ahaa AI171, ayaa u muuqata in ay ku dul habsatay deegaan lagu nool yahay.

    Wasiirka Duulista hawasda ee Hindiya Kinjarapu Ram Mohan Naidu ayaa sheegay in ay socdaan hawlaha gurmadka degdegga. Illaa hadda lama hayo khasaaraha ka dhashay shilkan diyaradeed, waxaase meesha diyaaraddu ku dhacday ka muuqda uuro madow muujineysa in diyaaradda dab qabsaday.

14. 12 Juunyo 2025Mareykanka iyo Shiinaha oo heshiis ka gaarey mid ka mid ah murankooda ganacsi

    Madaxweynaha Mareykanka Donald Trump ayaa sheegay in wadahadallo lagu doonayey in xal loogu helo muran dhanka ganacsiga ah ee indhaweydba dhex yiilley dalalka Shiinaha iyo Mareykanka ay ku dhammaadeen ‘heshiis’.

    Mr. Trump ayaa sheegay in Shiinuhu ogolaaday in shirkadaha Mareykanka uu ka iibiyo birlabka iyo macdanta kale ee macduunka ah, taas beddelkeedana Mareykanku ka laabanayo xayiraaddii uu ku soo rogey fiisayaasha ardayda Shiinaha.

    “Heshiiska aan la gaarney Shiinahu waa mid siku dhan, wuxuuna keliya oo sugayaa in aniga iyo Madaxweyne Xi aan sixiixno oo qudha,” ayuu yiri Trump oo qoraal soo dhigay bartiisa bulshada ee Truth Social.

    Heshiiskan ayaa yimid ka dib labo maalmood oo labada dhinac ay magaalada London uga socdeen wadahadallo lagu doonayey in lagu far iyo suuliyo dagaalka dhanka canshuuraha ah oo cuuryaamiyey ganacsigii ka dhexeeyey labadan dal ee dhaqaale ahaan dunida ugu tunka weyn.

15. 12 Juunyo 2025Askeri Ingiriis ah oo lagu eedeeyey in uu haweeney British ah ku kufsaday Kenya

    Askeri ka tirsan ciidamada UK oo lagu eedeeyey in uu haweeney ku kufsaday meel u dhow saldhig ciidamada ku leeyihiin dalka Kenya, ayaa la ogaadey in haweeneyda loo haysto ay tahay British.

    War ka soo baxay Wasaaradda Gaashaandhigga UK ayaa lagu sheegay in askeriga la xiray, dibna dib loogu celiyey dalkiisa ka dib markii eeddu soo baxday bishii la soo dhaafay.

    Falkan ayaa wuxuu ka dhacay meel u dhow xero tababar oo ciidamada Ingiriisku ku leeyihiin Kenya oo la yiraahdo (Batuk).

    Dhacdadan ayaa waxaa baaraya militariga UK oo awood u leh, wax ka khuseeya booliska Kenyana ma jiro.

    Eeddan kufisga la xiriirta ayaa noqoneysa tii ugu dambeysey falal dhaqan xumo wax laga saaray askarta British-ka ee Batuk oo u dhow magaalada Nanyuki oo qiyaastii 200km waqooyiga uga beegan caasimadda Nairobi.

16. 12 Juunyo 2025Ciidamada Israa'iil oo Qasa ka helay maydka labo lahayste

    Ra’isul Wasaaraha Isra’il Benjamin Netanyahu ayaa sheegay in ciidamadisa ku sugan Qasa ay heleen maydka labo la hayste oo Isra’iliyiin ah.

    Mid ka mid ah labada la hayste ee maydkooda la helay ayuu ku sheegay Yair (Yaya) Yaakov oo 59 sano jir ahaa, kaaas oo lagu diley gurigiisa oo ku yiil deegaanka Nir Oz, markii kooxo hubeysan oo ka tirsan ururka Xamaas ay u daateen koonfurta Isra’il 7-dii Oktober 2023.

    Labo wiil oo uu dhalay iyo xaaskiisi aya sidoo kale halkaas laga afduubtay, ka hor intii aan lagu sii deyn heshiis xabad-joonjin oo Isra’il iyo Xamaas dhex maray Nofember 2023. 53 lahaysteyaal reer Isra'il ah ayaa weli ku haray gacanta kooxaha Falastiiniyiinta.

17. 12 Juunyo 2025Sarkaal CIA ah oo fashiliyey qorshe weerar oo ay Israa’iil damacsaneyd oo xabsi lagu xukumay

    Sarkaal horey uga tirsanaan jirey Hay’adda Dhexe ee Sirdoonka Mareykanka (CIA) oo dusiyey xog xasaasi ah oo ku saabsan qorshe Israa’iil ku weerari rabtay ayaa lagu xukumay 3 sano oo xarig ah.

    Asif William Raxmaan oo 34 sano jir ah ayaa qirtay in uu bishii Jannaayo si kas ah u kaydsaday islamarkaana u faafiyey xog sir ah oo taabaneysa amniga qaranka, sida uu qabo xeerka basaasnimada.

    Mas’uuliyiinta ayaa sheegay in Raxmaan oo adeegsanaya ruqsad heerkeedu sarreeyo uu daabacday, sawirtay, dabadeedna diray qoraal sireed xasaasi ah, ku waas oo markii dambe la wareejiyey baraha bulshada.

    Isra’il ayaa bishii Oktoobar fulisey weerarro ay la beegsatay goobo ‘militari’ oo ku yaal dalka Iran, taas oo jawaab u ahayd gantaallo Tehran ku garaacday Isra’il todobaad ka hor.

18. 12 Juunyo 2025Kumannaan Falastiiniyiin ah oo lagu diley Qasa xilli ay gargaar doonanayeen

    Tiro Falastiiniyiin ah ayaa ku geeriyoodey duqeyn lagula eegtay goob ay cunto u doonteen oo ku taal marinka Qasa, sida laga soo xigtey hawlwadeennada caafimaadka. Labo Isbitaal oo ku yaal magaalada Qasa ayaa sheegay in 25 ruux lagu diley meel u dhow goob lagu qaybinayey cunto gargaar oo ku taal dhabbaha Netzarim.

    Hay’adda difaaca madaniga ah ee Xamaas mamusho ayaa sheegtay in ciidanka Israa’iil ay rasaas ku fureen dad gargaar ka sugayey hay’ad ay taageero ka haysata Israa’iil iyo Mareykanku Humanitarian Foundation (GHF). Israa’iil waxay sheegtay in ciidankeedu ay xabado kor ugu rideen dad ku soo dhawaadey goob ay ku sugnaayeen.

    14 qof oo kale ayaa lagu diley goobo kale oo cunto qaybin oo ay maamusho isla hay’adda GHF oo ku yaal Rafah sida laga soo xigtey shaqaalaha caafimaadka.