walwal soo food saaray dadka Soomaalidu kamid tahay ee sida sharci darrada ku jooga Mareykanka

Tebin toos ah

1. 8 Nofembar 2024Taageerayaasha Isra’iil oo looga digay in ay ka qaybgalaan ciyaar kubadda koleyga ah oo caawa ka dhacaysa dalka Taliyaaniga

   Golaha Amniga Qaranka ee Isra’iil ayaa kula taliyay taageerayaasha kooxda kubbadda koleyga ee Maccabi Tel Aviv in ay ka baaqdaan kulan ciyaareed ay caawa kula leeyihiin dalka Taliyaaniga kooxda Virtus Bologna.

   Qoraal la soo dhigay barta X ayay dawladdu ku sheegtay in kadib dhacdadii habeen kii la soo dhaafay, ay jiraan oraahyo lagu baahiyay internet-ka oo loogu hanjabayo dadka Isra’iiliyiinta ah, iyadoo laga cabsi qabo in ay dhacaan weerarro lamid ah kuwii xalay.

   Natiijada ka dhalatay dhacdadii xalay, Isra’iil waxay ku boorisay dadkeeda in aanay xaadirin kulan ciyaareedkaa kubadda koleyga ee ka tirsan tantanka EuroLeague ee ay la leeyihiin kooxda Taliyaaniga ah ee Bologna.

   Golaha Amniga Qaranka waxa kale oo uu kula taliyay dadka in aanay qaadan calaamado muujinaya ama astaamo muujinaya yuhuudnimadooda ama Isra’iilnimadooda.

   Warbaahinta Taliyaaniga ayaa sheegaysa in kooxda kubadda koleyga ee Maccabi Tel Aviv ay haystaan gabaadka booliska kahor kulanka caawa dhacaya.

2. 8 Nofembar 2024Kanada oo filaysa qulqulka muhaajiriin ku soo jaba dalkeeda kadib guushii Trump

   Xili Madaxweynaha la doortay ee Maraykanka Donald Trump uu ku adkeysanayo in uu diyaar u yahay in malaayiin muhaajiriin uu ka tarxiili doono Maraykanka ayaa dalka dariska la ah ee Kanada, waxa uu booliskiisu sheegayaa in la arki doono qulqulka dadka magangalyo doonka ah ee imaanaya wadankooda.

   Taliyaha booliska Kanada Charles Poirier ayaa weriyayaasha u sheegay in bilo kahor doorashada ayba u diyaar garoobeen imaanshiyaha dadka ka baqdinta qaba in laga musaafuriyo Maraykanka.

   “Bilo kahor ayaan ogeyn in aan isu diyaarino qorshe labo dhinac le ah, maxaa yeelay haddii uu Trump xafiiska yimaado, ooh adda bilo uun kadib uu imaan doono, waxay keeni doontaa muhaajiriin sharci darro ah oo ku soo jaba Quebec iyo Kanada,” ayuu u sheegay wakaaladda warrarka ee Reuters.

   Trump markii uu xafiiska yimid 2017-kii kumannaan magangalyo doon ah ayaa u talaabay dalka Kanada.

3. 8 Nofembar 2024Ku dhawaad 70% dadka lagu dilay dagaalka Qasa waa haween iyo caruur, sidaa waxa sheegay xafiiska xuquuqda aadamaha ee Qaramada Midoobay

   Xafiiska xuquuqda aadamaha ee Qaramada Midoobay ayaa maanta oo Jimce ah sheegay in ku dhawaad 70% dadka lagu dilay dagaalka Qasa ay yihiin haween iyo caruur, wuxuna cambaareeyay waxa uu ku tilmaamay xadgudubyada ka dhanka ah mabaadiida aasaasiga ee xeerka caalamiga ah ee xuquuqda aadamaha.

   Wasaaradda Caafimaadka Falastiiniyiinta ayaa sheegtay in tan iyo markii uu dagaalku bilowday lagu dilay Qasa dad gaaraya 43,000 qof laakiin Qaramada Midoobbay waxay sheegaysaa kaliya in ay xaqiijisay geerida 8,119 qof.

   Milatariga Isra’iil ayaa dulaan ku qaaday Qasa todobadii Oktoobar kaddib markii Xamaas ay weerar ku qaaday Isra’iil, halkaas oo ay ku dishay 1,200 kuna qafaalatay 250 qof oo kale.

4. 8 Nofembar 2024NISA oo sheegtay in dhawr iyo toban ka tirsan Al-Shabaab lagu dilay Shabeellaha Dhexe

   War saxaafadeed ka soo baxay Hay’adda Sirdoonka iyo Nabad Sugidda Soomaaliya ayaa lagu sheegay in hawlgal gaar ah lagu beegsaday koox ka tirsan Al-Shabaab oo isku urursanaysay meel qarsoodi ah oo ku taala deegaanka Yaaqle ee gobolka Shabeellaha Dhexe.

   NISA waxay sheegtay in halkaas lagu dilay 19 ka tirsan Al-Shabaab. NISA waxa kale oo ay sheegtay in lala socday xogta kooxda halkaa isku urursanaysay, deetana la beegsaday.

   Ciidamada sirdoonku kama hadlin nooca hawgalka ee ay halkaas ka fuliyeen, waxaase loo badinayaa in ay ahayd duqeyn xagga cirka ah oo lala beegsaday halka bartilmaameedku ahaa.

   Wasiirka Gaashaandhigga Soomaaliya Cabdiqaadir Maxamed Nuur ayaa todobaad kii hore sheegay in ciidamadu qaadi doonaan duqeymo culus oo ka dhan ah xoogagga Al-Shabaab, wuxuuna ugu baaqay dadka rayidka ah in ay ka fogaadaan meelaha ay joogaan kooxaha uu ugu yeeray khawaarijta.

5. 8 Nofembar 2024Muhaajiriin Soomaali ah oo dib loogu celiyay Soomaaliya

   Koox muhaajiriin ah oo gaaraysa 24 qof oo uu ku jiro ilmo yar oo 11 bilood uun jira, ayaa maanta dib loogu celiyay magaalada Muqdisho sida ay sheegtay Ergyaga Gaarka ah ee Madaxweynaha Soomaaliya u qaabilsan arimaha hijrada,soo galootiga iyo xuquuqda caruurta Maryan Yaasiin Xaaji Yuusuf.

   Kooxdan la soo celiyay ayaa laga soo qaaday dalka Tuniisiya, waxana laga soo badbaadiyay kooxo magafayaal ah oo ka doonayay madax furasho.

   Maryan ayaa sheegtay in Dawladda Federaalka ay ka go’an tahay in ay gacan ka geysato sidii muhaajriinta Soomaalida ah dib dalkooda loogu celin lahaa.

   Midowga Yurub ayaa maalgaliyay qorshaha 24 qof dib loogu celiyay Soomaaliya.

   24 kii bishii ina dhaaftay ee Oktoobar ayaa Dawladda Soomaaliya oo kaashanaysa Midowga Yurub iyo hay’addaha IOM-ta iyo UNHCR waxay dhalinyaro Soomaali ah oo tarhriibayaal ah dib uga soo celisay dalka Liibiya, waxayna kala tageen magaalooyinka Muqdisho iyo Hargeysa.

   Dhalinyaradan ayaa gaaraysay 164 qof, waxana 55 kamid ah la geeyay magaalada Hargeysa, halka 109 kale la geeyay magaalada Muqdisho.

6. 8 Nofembar 2024Taageerayaasha kooxda kubadda cagta Israa'iil oo la weeraray

   Booliska dalka Holland ayaa xabsiga u taxaabay 57 qof oo laga kaxeeyay bartamaha magaalada Amsterdam, kadib markii ay dhaceen isku dhacyo u dhaxeeya dhalinyaro u dhashay waddanka iyo taageerayaasha kooxda kubadda cagta ee Israa’iil.

   Raysal wasaaraha dalkaas, Dick Schoof, ayaa cambareeyay “weerarrada navcaybka ku saleysan ee ka dhanka ah yuhuudda”.

   Dhanka kale, raysal wasaaraha Israa’iil, Benjamin Netanyahu, ayaa sheegay in magaalada Amsterdam loo diray “laba diyaaradood oo badbaado ah” kadib markii ay dhaceen wax ay milateriga israa’iil ugu yeereen “dhacdooyin rabshado ah oo ka dhan ah Israa’iilyiinta”.

   Afhayeenka booliska ayaa warbaahinta dowladda Holland u sheegtay in rabshado ay ka dhaceen aaga Dam Square ee bartamaha caasimadda, balse ma aysan sheegin cidda ku lug lahayd.

   Taageerayaasha kooxda kubadda cagtaa Maccabi Tel Aviv, ayaa u safray magaalada Amasterdam, si ay uga qeyb galaan kulan ka tirsanaa koobka Europa League, oo ay la lahaayeen kooxda Ajax.

   Cayaartaas ayaa waxay ku soo idlaatay 5-0 oo koxda Israa’eel ee Maccabi Tel Aviv Israa’iil looga adkaaday.

7. 8 Nofembar 2024Ninka lagu naaneyso "quruxlowga" ee muqaallada anshax xumada laga faafiyay oo tallaabo laga qaaday

   Waxaa tallaabo laga qaaday sarkaalka sare ee ka soo jeeda dalka Equatorial Guinea, kaas oo lagu helay fadeexad galmo.

   Baltasar Ebang Engonga, madaxa hay'adda baarista dambiyada la xiriira maaliyadda qaranka, oo ah nin xaas ah, ayaa waxaa baraha bulshada ku baahay muuqaallo boqolaal gaaraya oo uu kula galmoonayo haween kala duwan.

   Haweenka uu la galmoday, waxaa ku jira xaasaska qaar kamid ah mas'uuliyiin jagooyin sare ka hayya dowladda.

   Waxaa uu ku xirnaa xabsiga Black Beatch ee ku yaala caasimadda Equatorial Guinea ee Malabo, isagoo loo heysto edeymo musuq maasuq markii muuqaallada galmada lagu faafiyay baraha bulshada.

   Weli si fagaare ah ma uusan uga hadlin arrintan. Wararka la xirriira ceyrinta Baltasar Ebang Engonga, ayaa yimid kadib wareegto uu saxiixay adeerkii, oo ah madaxweynaha dalkaas Equatorial Guinea, Obiang Nguema.

   Ninkan ayaa lagu naaneysaa "Bello" oo ah erey af Spanish ah oo micnaheedu yahay qurux.

   Falalkaas ayaa qaarkood waxaa uu ku dhex sameeyay, gudaha xafiiskiisa oo ka tirsan wasaaradda maaliyadda.

   Tani ayay dadka qaar la xirririnayaan loolan awoodeed, oo ah qofka noqonaya madaxweynaha xiga ee dalkaas, kaas oo aabaha dhalay Engonga loo arko madaxweynaha xiga.

   Fadeexaddan ayaa laga yaabaa inay dhanka kale dhisto sumcadda ninka ay xafiiltamaan, ee ah madaxweyne ku xigeenka dalka Equatorial Guinea, kaas oo sidoo kale ah wiil uu dhalay hoggaamiyaha hadda xilka hayya.

   Faahfaahin dheeri ah halkan hoose ka akhriso:

   Muxuu ahaa ninkan reer Equatorial Guinea ee caalamku hadal hayo waxa uu xafiiskiisa ku dhex sameeyey

8. 8 Nofembar 2024wasiirka cusub ee difaaca Israa'iil oo la dhaariyay

   Waxaa xilka loo dhaariyay wasiirka cudub ee difaaca Israa'iil, Katz, laba maalmood kadib markii si kedis ah xilka looga qaaday wasiirkii isaga ka horreeyay, Yoav Gallant.

   Raysal wasaaraha Israa'iil, Benjamin Netanyahu, ayaa shaqada ka eryay Mr Gallant sababo la xirriira is -mari waa ku aaddan dagaalka Qasa.

9. 8 Nofembar 2024Waa kee cayaartoyga Soomaaliyeed ee la saadaalinayo inuu ku biiro horyaalka Premier league

   Daaha Cabdi Cali waa cayaartoy Kubadda cagta cayaara oo 26 jir ah. Wuxuu ku dhashay caasimadda Sweden ee Stockholm 1 Luulyo 1998. Waalidkiis waxay ka soo qaxeen Soomaaliya sannadihii 90-meeyadii. Wuxuu hadda u cayaaraa kooxda Malmo FF ee ka cayaarta Europa League.

   Laakin waxaa isha ku haysa koox ka cayaarta horyaalka Ingiriiska ee Premier League. Sababaha ay ku doonayaan cayaartoygan ayaa lagu sheegay in uu yahay nin difaacyada ka soo horjeeda jebiya oo balka ka dheela.

   Wuxuu ka mid yahay Daaha cayaartoyda durba la safo ee kooxda Malmo ku xisaabtanto, wuxuuna ku fiican yahay dhalinta iyo dhigidda goolasha, taana waxay keentay inuu qayb muhiim ah ka qaato kaalinta ay kooxdiisa kaga jirto horyaalka Sweden ee 2024 oo ay ku hogaaminayso 61 dhibcood, waxaana kooxda ku soo xigta ee Hammarby ay leedahay 53.

   Maalmo FF waa kooxdii uu cayaaraha ka soo bilaabay laacibka reer Sweden ee Zlatan Ibrahimovic, waana kooxda hadda difaacanaysa horyaalka.

   sii akhri:

10. 8 Nofembar 2024Putin diyaar ma u yahay inay Trump wada hadlaan?

    Madaxweynaha Ruushka, Vladimir Putin ayaa u hambalyeeyay Donald Trump, kadib guushii uu ka gaaray doorashada, isagoo ugu yeeray “nin geesi ah”.

    Mar uu ka hadlayay munaasabad lagu qabtay magaalada Sochi, ayaa madaxweynaha Ruushka waxaa uu sheegay in Trump “dhinac kasta laga dhibaateeyay” 5-tii sano ee hore ee uu xilka hayay.

    Putin waxaa uu sidoo kale sheegay in ballan qaadki Trump ee ah inuu gacan ka geysan karo in la soo af-jaro dagaalka Ukraine ay “ugu yaraan u baahantahay in la tixgeliyo.

    Xiligii u uku guda jiray ololahiisa, Donald Trump, waxaa uu dhowr mar ku celceliyay inuu “maalin gudaheed” ku joojin karo dagaalka Ukraine, balse wax faahfaahin ah kama uusan bixin sida ay taasi suurtagal u tahay.

    Mar wax laga weydiiyay inuu diyaar u yahay wadahadal uu la galo Trump, Putin wxaa u uku jawaabay: “Diyaar ayaan nahay, diyaar baan ahay”.

    Trump aya hore khamistii u sheegy, inuu qorsheynayo inuu la hadlo Putin.

    Ruushka ayaa si weyn loogu eedeeyay inuu farageliyay doorashadii madaxtinimo ee Mareykanka ee 2016-kii oo uu Donald Trump kaga adkaaday Hilary Clinton.

    Ruushka ayaa marar badan beeniyay inuu faragelin ku sameeyay doorashada Maraykanka.

    Halkan ka akhriso warbixinno dheeraad ah:

    Putin oo lagu eedeeyay in markale uu "farageliyay" doorashada Maraykanka

    Trump: Putin ayaa ka hoggaan fiican Obama

    Trump iyo Putin oo markii ugu horreysay fool ka fool u kulmay

11. 8 Nofembar 2024Donald Trump awood ma u leeyahay inuu tarxiilo dadka sida sharci darrada ku jooga Mareykanka?

    Doorashadii Donald Trump ee xilka madaxtinimo ee Mareykanka, ayaa waxaa uu walwal ku abuuray, qaar kamid ah dadka ku nool waddanka Mareykanka, gaar ahaan dadka soogaalootiga ah ee sida sharci darrada ku jooga dalka.

    Dadkaas waxaa kamid ah dad badan oo Soomaali ah, oo muddooyinkii u dambeeyay siyaabo kala duwan ugu qulqulayay Mareykanka, kuwaas oo qaarkood aanan weli helin wax sharci ah.

    Madaxweynaha la doortay ee Mareykanka, Donald Trump, ayaa laba jibaaray ballan qaadkiisii ​​ololaha doorashada ee ahaa masaafurinta tirada badan ee muhaajiriinta sharci darrada ah, isagoo sheegay in qarashka ku baxaya arrintaas uusan noqon doonin mid hor istaaga.

    Dadka uu Trump ama maamulkiisu tarxiili karo waxaa kamid ah dadka aan sharciga heysan ama u xareysnayn. Madaxweynaha ayaa awood sharci u leh dib u celinta dadkan maadaama uu xukumo laanta fulinta.

    Warbixinno kale:

    Trump oo mar kale xoojiyay balanqaadkiisii ahaa in uu dad badan tarxiilayo

    Toddobo tallaabo oo qaarkood Soomaalida saameynaya oo uu Trump sheegay in uu qaadi doono

    Wax ka ogow sida Trump iyo Harris ay ka yeeli doonaan arrimaha ay ka midka yihiin socdaalka, xashiishka iyo hubka