Tahriibayaal khayaano cusub ku gali lahaa UK oo la qabtay

Tebin toos ah

1. 11 Agoosto 2025Trump oo qab-qabanaya dadka aan guryaha haysan

   Madaxweynaha Maraykanka Donald Trump ayaa maanta sheegay inuu amray in Ciidanka Ilaalada Qaranka (National Guard) loo diro magaalada Washington, D.C., isla markaana uu hoos keeni doono ciidanka booliska caasimadda Maraykanka gacanta dowladda federaalka.

   Warbixintan, oo laga sheegay shir jaraa’id oo ka dhacay Aqalka Cad, ayaa timid ka dib markii madaxweynuhu ku tilmaamay magaalada mid ka mid ah kuwa ugu khatarta badan gudaha Maraykanka, isla markaana uu ku booriyay dadka hoy la’aanta ah inay u guuraan meelo kale.

   “Qofna ma rabo in la dhacdo, la kufsado, la toogto, ama la dilo,” ayuu yiri madaxweynaha, isaga oo xusay in heerka dilalka ee magaalada Washington, D.C. uu ka sarreeyo qaar ka mid ah “meelaha ugu xun adduunka” isla markaana ay kordheen dhacdooyinka gaadiid la boobay iyo tuugada hubaysan.

   Si kastaba ha ahaatee, diiwaannada booliska magaalada ayaa muujinaya in sanadkan ilaa hadda ay 7% hoos u dhacday guud ahaan dambiyada magaalada, halka dambiyada rabshadaha wata ay 26% hoos u dhaceen guud ahaan. Dilalka ayaa sidoo kale hoos uga dhacay 12% isla muddadaas.

2. 11 Agoosto 2025Caqabad haysata badeecadaha Maraykanka ka dib canshuurtii uu Trump ku soo rogay Hindiya

   Laga soo bilaabo McDonald's iyo Coca-Cola ilaa Amazon iyo Apple, shirkadaha waaweyn ee Maraykanka ayaa wajahaya baaqyo lagu doonayo in lagu joojiyo adeegsiga gudaha Hindiya, maadaama hoggaamiyeyaasha ganacsiga iyo taageerayaasha Ra’iisul Wasaare Narendra Modi ay kicinayaan dareen ka dhan ah canshuuraha Maraykanka.

   Sida ay sheegtay Reuters, Hindiya oo ah dalka ugu dadka badan caalamka, waana suuq muhiim u ah badeecadaha Maraykanka. Waa suuqa ugu weyn ee adeegsada WhatsApp, sidoo kalena shirkadda cuntada ee Domino’s ayaa leh makhaayadaha ugu badan ee ka jira dalka marka la barbar dhigo shirkad kasta oo kale.

   Cabitaannada sida Pepsi iyo Coca-Cola ayaa badanaa ka muuqda meelaha wax lagu iibiyo, waxaana dadku ay safaf u galaan marka la soo bandhigo alaabo cusub oo Apple ah ama marka laga furayo kafateeriyada Starbucks.

   In kasta oo aanay jirin calaamado muujinaya hoos u dhac ku yimid iibka, haddana waxaa baraha bulshada iyo meelaha kale ka socda fariin ku boorinaysa in la iibsado alaab maxalli ah la iskana daayo badeecada Maraykanka, kadib markii Donald Trump uu ku soo rogay canshuur ah 50% badeecadaha ka yimaada Hindiya.

   Canshuurta ayaa gilgishay xiriirka u dhexeeya New Delhi iyo Washington.

3. 11 Agoosto 2025Suxufiyiintii ay Israa'iil ku dishay Qasa oo la aasay

   Aas ayaa loo sameeyay shan wariye oo ka tirsan Al Jazeera, kuwaas oo ka mid ahaa toddobo qof oo lagu dilay weerar ay Israa’iil ka fulisay magaalada Gaza, sida uu sheegay telefishanka Al Jazeera.

   Milatariga Israa’iil ayaa sheegay inay beegsadeen weriyaha 28 jirka ah ee Anas al-Sharif, iyagoo ku eedeeyay inuu ahaa “madaxii unug argagixiso” oo ka tirsan Xamaas, balse ma aysan bixin caddayn badan oo taageerta sheegashadaas. BBC-da waxay fahansan tahay in Sharif uu la shaqeyn jiray koox warbaahineed oo Xamaas ah gudaha Gaza ka hor dagaalka hadda socda – qaar ka mid ah qoraalladiisa baraha bulshada ka hor geeridiisana wuxuu ku dhaliilay Xamaas. Al Jazeera waxay ku tilmaantay dilkiisa “khaarijin si gaar ah loo beegsaday” iyo “weerar kale oo cad oo horay loo qorsheeyay oo ka dhan ah xorriyadda saxaafadda”. Suxufiyiinta kale ee la dilay waxaa ka mid ahaa Mohammed Qreiqeh, iyo filim qaadeyaasha kala ah Ibrahim Zaher, Mohammed Noufal iyo Moamen Aliwa – sidoo kale waxaa ku dhintay weerarka wariyaha madaxa-bannaan ee Mohammad al-Khaldi. Qaramada Midoobay waxay cambaareysay dilalkooda iyagoo ku tilmaamay “jab weyn oo ka dhan ah sharciga caalamiga ah ee bini’aadantinimada”, halka Ururka Difaaca Wariyeyaasha (Committee to Protect Journalists) uu sheegay in 186 wariye la dilay tan iyo markii ay Israa’iil bilowday weerarka militari ee Gaza bishii Oktoobar 2023. Dowladda Israa’iil ma ogola hay’adaha wararka caalamiga ah, oo ay ku jirto BBC, inay si xor ah uga warbixiyaan gudaha Gaza, sidaas darteed warbaahinta badankeed waxay ku tiirsan yihiin wariyeyaasha ku sugan gudaha Gaza si ay u helaan macluumaad.

4. 11 Agoosto 2025Tahriibayaal khayaano cusub ku gali lahaa UK oo la qabtay

   Waxaa la soo werinayaa in tiro dad Eriteriyaan ah la helay iyaga oo si halis leh ugu dhuumanaya gaari qaboojiye ah oo khudaar daabulayey.

   Dadkan Eriteriyaanka ah oo tiradooda lagu sheegay 15 qof oo uu ku jiro ilmo yar ayaa ku dhuumaalaysanayay gaari qaboojiye ah, waxayna ku sii jeedeen dalka Ingiriiska, ayagoo ka yimid Faransiiska, sida ay ku warrantay wakaaladda wararka ee Faransiiska ee AFP.

   Qaxootiga Eriteriyaanka ah ayaa laga helay qeybta qaboojiyaha ee gaariga Sabtidii, waxaana darawalka gaariga uu sheegay inay u waceen qabowga daran awgiis.

   Wakaalada wararka ayaa sheegtay in xirfadlayaal caafimaad oo Faransiis ah ay gargaar caafimaad u fidiyeen dadka sharci darada ah ee la ildaran qabowga daran.

   Gaarigan khudaarta siday oo u rarnaa dalka Ingiriiska ayaa ku hakaday waqooyiga Faransiiska markii uu darawalku sheegay in uu maqlay oohin iyo qaylo ka dibna uu farriin u diray maamulka deegaanka.

   Warbixin ay soo saartay wakaalada wararka ee AFP ayaa lagu sheegay in darawalkii waday gaariga xamuulka ah ee siday khudaarta barafaysan oo ay ku dhex dhuumanayeen dadka Eriteriyaanka ah aysan boolisku baarin.

5. 11 Agoosto 2025War deg deg ah, Maxaa ka soo kordhay xaaladda Balad-Xaawo oo saaka dagaal ka dhacay?

   Warar kala duwan ayaa ka soo baxaya dagaalka saaka ka dhacay duleedka magaalada Balad-xaawo ee gobalka Gedo, kaasoo u dhaxeeyay ciidamada dowladda federaalka ah iyo kuwa maamulka Jubaland.

   Inkastoo hadda aanu dagaal socon, haddana wararka ayaa sheegaya in khasaare uu jiro oo dhimasho iyo dhaawacba ay ka dhasheen dagaalka saaka.

   Tirada rasmi ah lama oga ilaa iyo hadda oo ku saabsan dhimashada hase-yeeshee waxaa la xaqiijiyay in dagaalka waxyeello ka dhalatay.

   Dadka deegaanka oo BBC-da la hadlay ayaa sheegay in saraakiil deegaanka ah ay dagaalka ku dhinteen, balse BBC-du weli ma xaqiijin warkan.

   Wararka qaar ayaa sheegaya in ay jiraan dhaawacyo loo qaaday magaalada Mandheere ee dalka Kenya oo xadka ku taalla.

6. 11 Agoosto 2025Toogasho ka dhacday dalka Ecuador

   Booliiska Ecuador ayaa sheegay in sideed qof lagu dilay rasaas ay fureen rag hubeysan oo weeraray dad isugu soo baxay bannaanka goob lagu caweeyo oo ku taalla gobolka Guayas. Lama oga sababta rasmiga ah ee ka dambeysa weerarka ka dhacay magaalada Santa Lucia. Qofka ka mid ah dadka la dilay wuxuu ahaa milkiilaha goobta weerarku ka dhacay.

   Guayas waa mid ka mid ah afarta gobol ee xeebaha leh ee uu Madaxweyne Daniel Noboa geliyay xaalad degdeg ah, si loola tacaalo rabshadaha ay kooxaha burcaddu ka wadaan halkaas.

   Madaxweynaha ayaa sheegay in Ecuador ay dagaal kula jirto kooxo dambiilayaal ah oo isku heysta gacan ku haynta marinnada tahriibinta daroogada.

7. 11 Agoosto 2025Donald Trump oo dadka darbijiifka ah ka saaraya Washington

   Donald Trump ayaa sheegay inuu doonayo in uu ka saaro dadka hoy la’aanta ah ama darbijiifka ah magaalada Washington isla markaana uu xiro kuwa dambiyada galay. Isagoo soo dhigay sawirro muujinaya teendhooyin iyo qashin, Mr. Trump wuxuu sheegay in dadka hoy la’aanta ah “loo wareejin doono meel ka fog caasimadda” si looga dhigo “goob ammaan ah oo qurux badan.”

   Warbaahinta Maraykanka ayaa soo warinaysa in Aqalka Cad uu soo jeedinayo in ilaa kun askari oo ilaalada qarank ka mid ah loo diro magaalada, inkasta oo duqa magaalada, Muriel Bowser, ay ku adkaysanayso in dambiyada rabshaduhu sababeen ay hadda marayaan heerkii ugu hooseeyay muddo 30 sano ah.

   Kooxaha u dooda xuquuqda aadanaha ayaa walaac ka muujiyey in dadka hoy la’aanta ah laga yaabo in loo raro xarumo xiran oo la mid ah kuwa lagu hayo muhaajiriinta. Mr. Trump ayaa la filayaa inuu qabto shir jaraa’id oo ku saabsan arrintan Isniinta maanta ah.

8. 11 Agoosto 2025Dagaal saaka ka dhacay duleedka Balad-Xaawo iyo faahfaahin ka soo baxaysa

   Wararka imaanaya magaalada Balad-Xaawo ee gobolka Gedo ayaa sheegaya in duleedka magaaladaas uu saaka ka dhacay dagaal u dhaxeeya ciidamada dowladda federaalka Soomaaliya iyo kuwa maamulka Jubaland.

   Dagaalka oo bilowday sida wararku sheegayaan waaberigii hore ee saaka ayaa hadda istaagay sida ay BBC-da u sheegeen dadka deegaanka.

   Halka uu dagaalku ka dhacay waa xadka ay wadaagaan magaalooyinka Mandheere oo ka tirsan Kenya iyo Balad-Xaawo oo Soomaaliya ah.

   Dadka deegaanka ayaa BBC-da u sheegay in ciidamada dowladda federaalku ay la wareegeen halkii dirirtu ka dhacday, hase-yeeshee ma jirto cid si madax bannaan u xaqiijin karta arrintaa.

   Sidoo kale ilaa iyo hadda ma jirto cid ka tirsan labada dhinac oo dagaalka ka hadashay.

9. 11 Agoosto 2025War deg deg ah, Australia oo aqoonsaneysa Falastiin

   Australia ayaa ku dhawaaqday qorshe ay ku aqoonsanayso dowlad Falastiini ah bisha September, ka dib tilaabooyin la mid ah oo ay qaadeen UK, Faransiiska iyo Canada.

   Ra’iisul wasaaraha Australia Anthony Albanese ayaa sheegay in tallaabadani ay ka dhici doonto golaha guud ee Qaramada Midoobay iyo ka dib markii ay ballanqaadyo ka heleen maamulka Falastiiniyiinta.

   "Xalka labo dawladood waa rajada ugu wanaagsan ee bini'aadmigu ka qabo in la jebiyo qulqulatooyinka rabshadaha ee Bariga Dhexe iyo in la soo afjaro colaadda, dhibaatada iyo gaajada Qasa," ayuu yiri Isniintii.

   Israa’iil oo cadaadis badan lagu saarayo joojinta dagaalka Qasa ayaa sheegtay in aqoonsiga dowlad Falastiiniyiintu leedahay ay “abaal marin u tahay argagixisada”.

   Maamulka Falastiin, oo gacanta ku haya Daanta Galbeed ee ay Israa'iil ay heysati, ayaa goor hore sheegay in loo aqoonsado dal madax bannaan ay muujineyso taageerada sii kordheysa ee loo hayo ka go'naanshaha madax-bannaanida dadkooda.

10. 11 Agoosto 2025Israa'iil oo wajahaysa cambaareyn adag oo kaga imaanaysa Golaha Ammaanka

    Israa’iil ayaa wajahaysa dhaleeceyn xooggan oo uga imaanaysa Golaha Ammaanka ee Qaramada Midoobay ee magaalada New York, kadib markii ay ballaarisay weerarkeeda ka dhanka ah marinka Qasa, Mas’uuliyiinta Golaha ayaa ka digay in tallaabadani ay furi doonto cutub kale oo naxdin leh oo dagaalka ah. Wakiilka Falastiiniyiinta ayaa ku baaqay in la saaro cunaqabateyn adag, halka Britain ay ka digtay daadinta dhiig hor leh.

    Hase yeeshee, Mareykanka ayaa difaacay xaqa Israa’iil u leedahay in ay go’aansato istiraatiijiyaddeeda amniga, isaga oo dhaliilaha ku eedeeyay in ay taageerayaan borobogaandada Xamaas.

    Ra’iisul Wasaaraha Israa’iil, Benjamin Netanyahu, oo horey u qabtay shir jaraa’id oo aan caadi ahayn, ayaa sheegay in weerarka uusan kaliya ku koobnayn magaalada Qasa, balse uu gaari doono xeryaha ay ku barakaceen in ka badan nus milyan Falastiiniyiin ah. Netanyahu ayaa ku andacooday in tani tahay dariiqa kaliya ee lagu jebin karo Xamaas.

11. 11 Agoosto 2025Faahfaahin ka soo baxaysa wariyaal ka tirsanaa Telefishinka Al Jazeera oo Qasa lagu dilay

    Wariye caan ah oo ka tirsan Telefishinka Al Jazeera ee laga leeyahay dalka Qadar ayaa lagu dilay duqeyn ay Israa’iil ka geysatay Qasa, taasoo sidoo kale lagu dilay ilaa afar ka mid ahaa saaxiibbadii la shaqeynayay.

    Anas al Sharif ayaa lagu weeraray isagoo ku sugnaa teendho u dhow isbitaalka al Shifa ee Qasa. Wuxuu si weyn uga soo warramayay dagaalka Israa’iil ee Qasa, gaar ahaan waqooyiga. Israa’iil ayaa ku celcelisay eedeyn ah inuu ka tirsanaa Xamaas, taasoo uu si xooggan u beeniyeen isaga iyo hay’adda uu u shaqeynayey.

    Dhawaan ayuu sheegay in uu wajahayo aflagaado kaga imaanaysa mas’uuliyiin Israa’iiliyiin ah. Tifaftire sare oo ka tirsan Al Jazeera oo l ayiraahdo Maxamed Moawad ayaa u sheegay BBC-da in kanaalkooda uu weli yahay mid ka mid ah kuwa yar ee ka warbixin kara xaaladda Qasa, balse ay saaxiibadood iyo qoysaskooda si joogto ah u dhimanayaan.

    Duqeymaha Israa’iil ayaa ilaa hadda lagu dilay ku dhowaad 200 suxufiyiin ah tan iyo markii dagaalku bilowday.