Euslaintean is Ìocshlaintean
Airson faighinn cuidhteas gartan
Lorgar gartain ann am fraoch no feur agus greimichidh iad ri do chraiceann airson fuil a dheocadh asad.
Tha e coltach gur e aon dòigh air faighinn cuidhteas gartan pailteas ìm a liacradh timcheall air. Bu chòir gun tuiteadh an gartan dheth an uairsin.
No faodaidh tu aftershave a dhòrtadh air. Cha chòrd seo ris a bharrachd.
Gith / Githir
Seo an seòrsa goirteas a thig, gu h-àraidh an caol do dhùirn, ma tha thu a' dèanamh cus obair le leithid deamhais no speal airson a' chiad uair ann an ùine. Thig e ort ma tha thu a' dèanamh cus sgrìobhaidh cuideachd is canar writer's cramp ris sa Bheurla.
Bàrr a' bhrisgein
Bha cuimhne aig Dòmhnall Eardsaidh Dòmhnallach à Uibhist a Tuath air duine a thàinig dhan a' sgìre acasan a bhiodh a' cur na cloinne a-mach airson taghadh agus airson cruinneachadh an lus, bàrr a' bhrisgein. Bhiodh e ga tiormachadh agus ga smocadh sa phìob!
Trìthean
A' sealgair math a mharbhas gèadh is corra-ghritheach is guilbneach
'S iad sin trì eòin a tha uabhasach faiceallach agus geur.
Seanfhacail agus Abairtean
Taobh nan tarraigean dhen doras
Nan canadh tu ri duine gu robh thu a' dol a thoirt dha taobh nan tarraigean dhen doras bhiodh tu a' ciallachadh gu robh thu a' dol ga thilgeil a-mach.
Tha seo a' dol air ais chun an àm nuair a bhite a' dèanamh dorsan às aonais an seòrsa tarraigean a tha ann an-diugh. 'S e pìosan fiodha a bhiodh aca le ceann rudeigin ceàrnagach orra agus 's ann an còmhnaidh bho taobh a-muigh an dorais a bhite gan cur a-steach dhan fhiodh. Le sin chitheadh tu na ceàrnagan beaga fiodha a bha seo air taobh a-muigh an dorais. Bhiodh iad cuideachd a' bruidhinn air taobh na tarraigean dhen doras airson an taobh a-muigh.
'S e as fhaide dhuinn
Seo dòigh eile air "'S e as miosa dhuinn" a ràdh.
Bho Sheonaidh MacChoinnich, Steinnseal, An t-Eilean Sgiathanach
Nuair a thig tionndadh na sìde tillidh gach eun ri ealtan
BBC iD
BBC iDStiùireadh a’ BhBC
Ceangalaichean BBC
BBC © 2014Chan eil uallach air a' BhBC airson na th' air làraich-lìn eile.
Gheibhear sealladh nas fheàrr den duilleig seo le sealladair lìn nas ùire agus na duilleagan stoidhle (CSS) air. Ged a chithear susbaint na làraich leis an t-sealladair lìn a th' agaibh, tha sinn a' moladh an dreach as ùire den bhathar-bhog ur sealladair a thoirt a-nuas, no ur duilleagan-stoidhle a chur air ma ghabhas sin dèanamh.
