Cloch Medi - Robat Powel

'Wyt ti'n clywed cloch Medi - yn galw
Trwy giliau'n cartrefi
A chlywed ei ‘Dere di
Yn awr cyn bod hi’n oeri?’

Arogla holl wyrddni’r glyn – cyn yr heth,
Cyn i’r rhew anhydyn
Fferru’n mêr, cyn i’r deryn
Wibio o’r nyth a’r bryniau hyn.

A llenwa o’r perllannau – y seler,
Blasa haul y dyddiau
Ir a rhithiol yn ffrwythau
Ein haf cyn i’n gaeaf gau.

Dere i weld blodau’r allt – cyn i law
Fel cân leddf ymdywallt
Ar wyneb dyn a bronnallt
A’u pwyo hwy â’i chwip hallt.

Heddiw bydd byw! Rho heibio waith – am dro,
Medi’r haul a’r afiaith
Ydyw hwn, saib ar y daith ;
Yr alaw nas ceir eilwaith.