a' cèilidh air Griogair MacCarmaig

Tha Coinneach Mac a' Ghobhainn air turas dhan Apainn, far a bheil e a' cèilidh air Griogair MacCarmaig, fear dhen fheadhainn mu dheireadh sa sgìre aig a bheil a' Ghàidhlig. Ged 's ann à Lios Mòr a tha e bho thùs, tha e air a bhith ag obair air a' chroit aige anns an Apainn a-nise airson còrr air 60 bliadhna, is e air leth comasach le innealan a chumail is a chàradh.

Eadar sgeulachdan an teaghlaich mu bhràthair athair, a chaidh a mhuirt le tùsanaich ann an Afraga; innealan àiteachais agus tractaran còrr air 100 bliadhna a dh' aois; agus mar a tha a' Ghàidhlig air tilleadh dhan teaghlach aige le bhan-ogha Ciorstaidh ag ionnsachadh na Gàidhlig, tha cèilidh air leth inntinneach aig Coinneach còmhla ri Griogair ann an Gàidhlig mhath na sgìre.