còmhla ri Maureen Nicleòid

Sprechen sie deutsch? Le na mìltean mòra de luchd-leantainn na h-Alba air an slighe dhan Ghearmailt an t-seachdain sa airson taic a chuir ri ar sgioba nàiseanta, bidh facal Gearmailteach a-siud is a-seo a dhìth. Tha Crìsdean Stroemsdoerfer fileanta ann an Gearmailtis, agus bha e a' toirt leasan sa chànan do chòignear luchd-leantainn agus Maureen fhèin: Calum MacIllFhinnein, Luke MacAoidh, Harry MacNeacail, Gillies O' Hanlon, agus Daniel Moran. Saoil ciamar a chaidh dhaibh?

An Alba, 's e an t-uisge agus am fuachd a th' air aire mhòran - le sìde gu math nas fhuaire na bhiodh sinn dùil is an dòchas a bhiodh againn mun àm seo bhliadhna. O chionn dà cheud bliadhna chruthaich Teàrlach Rennie Mac an Tòisich a sheacaid ainmeil a tha cho math san uisge, agus bha Iain MacAonghais ag innse sgeulachd Mhic an Tòisich agus a sheacaidean dhuinn.

Agus le ball-coise air aire gu leòr an t-seachdain sa agus sgioba Alba air a' Ghearmailt a ruighinn airson farpais Euro 2024, b' e dithis le eòlas agus sgeulachdan gu leòr mu bhall-coise a bha a-staigh air chèilidh air Maureen - Donnchadh MacLeòid agus Seonaidh Dòmhnallach bho na Lochan.

Chuala sinn cuideachd mu phròiseact rannsachaidh air ainmean-àite Eilean Ì, an Ros Mhuileach agus Stafa, 's mar a bha na h-ainmean sin aig cridhe bàrdachd Sheonaidh Chaimbeil às an Ros.