le Cathy NicDhòmhnaill

Tha sinn a' cluinntinn mu Fhèis Fhilmichean Gàidhlig a tha tachairt sa Ghearmailt. Tha an Dotair Mìcheal Klevenhaus na stiùriche air an fhèis agus tha e ann an còmhradh ri Cathy mu dheidhinn.

Tha na mìltean leabhraichean còcaireachd ùr agus leabhraichean bìdh a' tighinn a-mach gach bliadhna ‘s an iarrtas as motha orra ron Nollaig. Tha an còcaire Alasdair MacLeòid a' toirt sùil tro chuid dhiubh dhuinne. An-diugh, 's e Time and Tide le Emily Scott a th' aige.

Tha taisbeanadh ùr de dhealbhan air am peantadh le John Lowrie Morrison ri fhaicinn ann an Glaschu an-dràsta. Tha Jolomo, mar is fheàrr a dh'aithneachear e, ainmeil air feadh an t-saoghail 's e air a bheò-ghlacadh le eileanan is costa an iar Alba. 'S e The Glorious Light of the West an t-ainm a th' air an taisbeanadh ùr 's chaidh Marie NicAmhlaigh ga fhaicinn.

Tha rabhadh ga thoirt seachad air feadh na dùthcha an t-seachdain sa mu fhuachd is reothadh. Tha sinn a' cluinntinn criomag bho thasglann BBC Radio nan Gàidheal, anns a bheil feadhainn a' cuimhneachadh air abairtean, sean-fhacail agus seanchasan co-cheangailte ri sneachd is reothadh.