còmhla ri Cathy NicDhòmhnaill

Tha dà fhichead bliadhna a-nochd fhèin bho thòisich prògram ainmeil do dh'òigridh air BBC Radio nan Eilean - Caithris na h-Oidhche. Bha Caithris na h-Oidhche a' cluiche ceòl pop, dùrachdan is eile, beò gach oidhche à Steòrnabhagh agus abair gun do shoirbhich leis. An-diugh, tha sinn a' cluinntinn bho thriùir den chiad fheadhainn a bha an sàs ann - Neen NicAoidh, Iain X MacÌomhair agus Dòmhnall Ruadh Mac a' Ghobhainn.

Tha Calina NicDhòmhnaill a' leantainn oirre le sreath air na rudan a tha sinn a' cur air ar biadh airson blas a chur ris. An-diugh tha i a' toirt sùil air diofar sheòrsachan ola.

An t-seachdain a chaidh, thòisich sinn air sreath ùr, far a bheil Cathy a' bruidhinn ri feadhainn a th' aig tràth-ìre de dhreuchd saidheansail. Cluinnidh sinn mun deidhinn fhèin agus dè direach an cuspair a thagh iad. An-diugh, tha sinn a' cluinntinn bho Fhionnlagh Cunniffe, a tha dèanamh rannsachadh biomedigeach.