An t-Urr Tormod Dòmhnallach, Bhaltos 2/2

'S e sreath ùr a' comharrachadh gu bheil 70 bliadhna bho chaidh Sgoil Eòlais na h-Alba a stèidheachadh aig Oilthigh Dhùn Èideann a th' ann a Sgaoileadh an Eòlais. Tha sinn air iarraidh air grunn dhaoine taghadh a dhèanamh air clàraidhean a tha prìseil dhaibhsan à tasglann na Sgoile ge b' e daoine a bhuineadh dhaibh, sgìre air a bheil iad eòlach neo cuspair anns a bheil ùidh aca. Agus abair gun d'fhuair sinn taghadh de dhualchas agus beul-aithris na Gàidhlig!

'S e duine a dh'fhàg dìleab phrìseil dha-rìreabh againn a th' aig Jo NicDhòmhnaill dhuinn a seo. B' ann à Bhaltos san Eilean Sgitheanach a bha an t-Urr Tormod Dòmhnallach 's bha e na mhinisteir san Eaglais Chlèireach ann an Canada agus ann an Eaglais na h-Alba ann an grunn àiteachan an Alba, nam measg Càirinis an Uibhist a Tuath agus Gleann Eilg. Taisgte ann a Sgoil Eòlais na h-Alba tha uairean a thìde de chlàraidhean a rinn e air iomadh cuspair - creideasan is leigheasan, gèamaichean is gearradh-cainnt, nithean os-nàdarra, bàird ionadail, seanfhacail is abairtean, rannan is òrain, agus a rosg agus a bhàrdachd fhèin.

Cluinnidh sinn a seo eisimpleirean den raon farsaing sa robh ùidh aige, cho cudromach 's a bha a' Ghàidhlig dha agus an obair mhòr a rinn e 's an saothair gun deach e airson a gleidheadh dhan ath ghinealach.