Sgrìob tro Shlèite

'S e sreath ùr a' comharrachadh gu bheil 70 bliadhna bho chaidh Sgoil Eòlais na h-Alba a stèidheachadh aig Oilthigh Dhùn Èideann a th' ann a Sgaoileadh an Eòlais. Tha sinn air iarraidh air grunn dhaoine taghadh a dhèanamh air clàraidhean a tha prìseil dhaibhsan à tasglann na Sgoile ge b' e daoine a bhuineadh dhaibh, sgìre air a bheil iad eòlach neo cuspair anns a bheil ùidh aca. Agus abair gun d'fhuair sinn taghadh de dhualchas agus beul-aithris na Gàidhlig!

Thogadh Nicola NicThòmais ann a Slèite, an ceann a deas an Eilein Sgitheanaich, agus tha i air a bhith 'g obair ann am buidhnean Gàidhlig airson cha mhòr fichead bliadhna, a' mhòr-chùid dhen ùine sin san eilean. Tha Slèite air a roinn na dhà leth - oighreachd Eilean Iarmain sa cheann a tuath agus oighreachd nan Dòmhnallach a chùm ceann a deas na sgìre. A seo tha Nicola a' toirt thugainn òrain às a sgìre a' tòiseachadh ann an Camas Cros an Eilean Iarmain, 's i a' leantainn oirre sìos chun Àrd agus Rubha Shlèite mus till i leinn air an taobh an ear a Tharsacabhaig 's timcheall mun Òrd.