Òrain Sheumais 'an Sheumais à Tobhta Sgòir

Chaill saoghal na Gàidhlig fear de churaidhean an dualchais agus fìor dhuine uasal aig deireadh na seachdain, le bàs Eòin Dhòmhnallaich à Cille Mhoire san Eilean Sgitheanach. Bha am prògram sa, a rinn e ann an 2001, sa chlàr airson a chraoladh an-diugh agus tha sinn a' dèanamh sin mar chuimhneachan air.

'S ann air cuid de na h-òrain a chaidh a chruinneachadh anns a' sgìre aige fhèin a bha Eòin a' coimhead a seo. B' ann à Tobhta Sgòir a bha Seumas Dòmhnallach, Seumas 'an Sheumais, croitear agus seinneadair, mar a tha Eòin ag ràdh, 'dha nach robh an saoghal mòr mun cuairt a' dèanamh a bheag de dhragh dha'. Seinneadair air leth a bh' ann agus fear a bha cuideachd a' pìobaireachd agus a' cluich an fheadain na òige.

Cluinnidh sinn bhuaithe na h-òrain Àirigh Luachrach Ùige, ’S toigh leam an tè Dhìleas Dhonn, na puirt-a-beul Maoileas Mòr na Guailne/ Seoc Dubh on Bhail’ ud Thall, an t-òran annasach Mur Bhiodh an Crodh cha Ghabhainn thu, Fàilte dhut is Deoch-slàinte Leat ( mu Sheasaidh Bhaile Ràghnaill ), Ho mo Leannan He mo Leannan agus an t-òran iomraidh, Iomairibh Eutrom o ho.