Òrain Luaidh

Fad 2021 tha sinn a' comharrachadh 70 bliadhna bho chaidh Sgoil Eòlais na h-Alba a stèidheachadh aig Oilthigh Dhùn Èideann. Tron bhliadhna, cluinnidh sinn taghaidhean de chuid de na chaidh a chlàradh le luchd-cruinneachaidh na Sgoile, a' mhòr chuid dheth sna 50an agus na 60an, bho dhaoine a bh' air am bogadh ann an dualchas agus beul-aithris na Gàidhlig. Chaidh an t-sreath sa a chraoladh an toiseach nuair a bha an Sgoil a' comharrachadh 50 bliadhna ann an 2001.

'S i Mòrag NicLeòid, an t-eòlaiche air òrain luaidh aig Sgoil Eòlais na h-Alba, a tha a' toirt dhuinn a roghainn an-diugh.

Tha i a' tòiseachadh le Iain MacAonghais, Iain Pheadair à Dalabrog a ghabh 'Gura mis’ tha fo mhulad' do dh' Ailean Bruford, agus a' leantainn le Sìne NicPhàil à Uibhist a Tuath a' gabhail 'Latha dhomh ’s mi siubhal Ghleannaibh' do Dhòmhnall Eàirdsidh Dòmhnallach agus Mòr NicIllEathain à Griomasaigh an Uibhist a Tuath ag innse mar a bhiodh iadsan a' luadh agus i a' seinn fear a bhiodh aca, 'Chunnaic mi tighinn seachad suas thu'.

Tha taghadh cuideachd aice às an Òb sna Hearadh bho Chatrìona Laing, Ceiteag Fhionnlaigh Aonghais Ruaidh agus 's e 'Mhòrag sna horo gheallaidh' a th' aicese dhuinn agus às an Eilean Sgitheanach tha Ciorstaidh Nicleòid à Borgh na Sgiotaig an Cille Mhoire le 'Chall eile, Chall o'. Gheibh sinn iomradh air luadh-chas, rud nach robh ac' sna Hearadh idir, ann an còmhradh a bh' aig Mòrag fhèin le Anna Chaimbeul agus Mairead NicIllEathain à Eòrapaidh a Nis a Leòdhas agus iad a' seinn 'Ille bhòidheach, faire faire' agus bheir Nan NicLeòid agus a peathraichean à Liurbost a Leòdhas 'Haoi aro hù ill a u' dhuinn. Tha Màiri NicIain à Barraigh aice le Dhìrich mi suas Gual an t-Slèibhe, òran air a bheil sèist annasach, agus Ceit NicDhòmhnaill, bean Eàirdsidh Raghnaill à Gearraidh Sheilidh an Uibhist a Deas le 'O, 's e mo ghaol an Anna'.

Tha i a' crìochnachadh le òran luaidh bho Tommy Dòmhnallach bhon Chladach a Tuath an Ceap Breatainn.