Là Fèill Brìghde gu Là Fèill Mìcheil

Fad 2021 tha sinn a' comharrachadh 70 bliadhna bho chaidh Sgoil Eòlais na h-Alba a stèidheachadh aig Oilthigh Dhùn Èideann. Tron bhliadhna, cluinnidh sinn taghaidhean de chuid de na chaidh a chlàradh le luchd-cruinneachaidh na Sgoile, a' mhòr chuid dheth sna 50an agus na 60an, bho dhaoine a bh' air am bogadh ann an dualchas agus beul-aithris na Gàidhlig. Chaidh an t-sreath sa a chraoladh an toiseach nuair a bha an Sgoil a' comharrachadh 50 bliadhna ann an 2001.

A seo tha Jo NicDhòmhnaill a' toirt thugainn cuid de na sgeulachan agus beul-aithris mu làithean fèille a bh' air a chumail leis na Gàidheil. Cluinnidh sinn mu Là Fèill Brìghde, Là Fèill Moire nan Coinneal, Là Fèill Mìcheil, Là Fèill Pàdraig, A' Chàisg, Là Fèill Briannan agus Là Bealltainn.

Tha am fiosrachadh aig Ciorstaigh Dhòmhnaill Sheumais à Gèirinis, an Uibhist a Deas, Nan Eachainn Fhionnlaigh à Bhatarsaigh, Aonghas Mac Aonghais ’Ic Iain Mhòir à Cille Pheadair, agus Dòmhnall Mac Alasdair Mhòir 's Peigi Aonghais ’Ic Eachainn à Loch Aineort.