Y Rhuban Glas

Mae'n dipyn o fraint ennill Côr yr Ŵyl yn yr Eisteddfod Genedlaethol. Elin Llywelyn sy'n cofio Côr y Cwm yn cipio'r wobr ac mae Branwen Gwyn a Huw Foulkes o Côrdydd hefyd yn hel atgofio am dderbyn yr anrhydedd.

Mae’r Eisteddfod Genedlaethol wedi comisiynu fersiwn rhithiol o gymanfa telynau teires ac mae bron i 30 o gefnogwyr brwdfrydig wedi cytuno i gymryd rhan. Mae rhai hyd yn oed wedi anfon fideos o’r Almaen, yr Alban a’r Unol Daleithiau gan ei wneud yn ddigwyddiad cwbl hanesyddol. Cafodd y cerddor Sioned Webb y syniad i ddod â’r telynau at ei gilydd yn Eisteddfod Meifod 2015, ac mae statws y delyn Gymreig wedi mynd o nerth i nerth ers hynny.

Mae aelodau o gymuned bro Caron wedi dod ynghyd i rannu syniadau ar gyfer creu gwefan straeon lleol newydd sbon i’r ardal, ac erbyn diwedd Gorffennaf 2020 roedd Caron360 yn fyw. Mae Enfys Hatcher Davies yn esbonio mwy.

A chyfle i glywed pigion o gystadleuaeth y Rhuban Glas efo’r pâr priod, Aled Edwards ac Eleri Owen Edwards, Cil y Cwm. Mae'r ddau wrth gwrs wedi ennill Gwobr Goffa David Ellis - Aled yn 1997 ac Eleri yn 2013 (a Shân Cothi wedi ennill hefyd yn 1995 gyda llaw!).