A' comharrachadh 75 bliadhna bho Latha VE

Chaidh dà mhionaid de shàmhchair a chumail air feadh na rìoghachd an-diugh aig 1100 mar chomharra air Latha VE.

An-diugh, an t-ochdamh Latha den Chèitein, thàinig an Dàrna Cogadh gu crìoch bho chionn 75 bliadhna.

Chaidh pàrtaidhean mòra an cumail air na sràidean air feadh na rìoghachd, le faochadh, toileacheas agus aoìbhneas gu robh bliadhnaichean fada, goirt a' chogaidh seachad. Bha gàirdeacheas nach gabh innse ga dhèanamh, brataichean dearg, geal is gorm an Aonaidh gan sgèith agus cuirmean seinn is dannsan a' dol.

Tha e cudromach cuimhneachadh ge-tà, am measg a’ ghàirdeachais, bha iomadh cridhe is spiorad briste tro àmhgharan a bhuail cearcaill theaghlaichean agus nach fhàgadh fois gu bràth ann an cuimhne an fheadhainn a thàinig às.

An-diugh, tha sinn air aoighean a chruinneachadh gus cuimhneachadh air na sgeulachdan teaghlaich aca fhèin agus dè tha Latha VE a ciallachadh dhaibhsan an-diugh. Cluinnidh sinn bho Dhòmhnall Iain Mac an t-Saoir, Sandra Corbett, Niall Bartlett, Norma Parkinson, Coinneach Mac a' Ghobhainn agus Shona Nic IllFhaoilein. www.bbc.co.uk/feasgar