An t-Urr Siùsaidh NicDhonnchaidh, an Eaglais Bhaisteach, Longfleet

Anns an t-seirbheis cluinnidh sibh na laoidhean a leanas:
Màiri NicAonghais le Gach Nì tha Glan is Bòidheach
Clas Seinn Chille-Mhoire le Mìorbhail Gràis
Còisir Eaglais Naomh Peadar ann an Dalabrog le Failt’ Ort Aran Beò bho Nèamh
Màiri Chamshron le Ged tha mi Bochd san Fhàsach
Amy NicAmhlaigh le A Thighearna Dhia

Leughaidhean:
Ecsodus 16: 2-8 & 16-18
Eòin 6: 22-35

Thàinig Siùsaidh NicDhonnchaidh (no Siùsaidh Algie, mar a bh' oirre mus do phòs i) dhan Eilean Sgiathanach bho chionn 25 bliadhna nuair a bha i sia bliadhna deug. Dh'ionnsaich i Gàidhlig an Àrd-sgoil Phort Rìgh, 's chaidh i an uair sin gu Sabhal Mòr Ostaig. Bha i na neach-naidheachd air telebhisean agus rèidio airson ochd bliadhna deug, ag obair air prògraman leithid Telefios air Telebhisean Grampian agus Eòrpa is Aithris na Maidne air a' BhBC. Ghluais i a Shasainn ann an 2002 agus phòs i Mìcheal ann an 2005. Dìreach bliadhna às dèidh dhi pòsadh thàinig aillse broillich oirre, ach fhuair i seachad air.

Tha Siùsaidh air a bhith na Crìosdaidh fad 38 bliadhna, agus tha i ag ràdh "gu bheil Dia air rudan mìorbhaileach a dhèanamh na beatha". Bha i fhèin agus an duine aice, Mìcheal, a' fuireach ann an Lunnainn fhads a bha Siùsaidh a' trèanadh airson na ministrealachd san Eaglais Bhaisteach aig Colaiste Spurgeon.

Fhuair i cead-searmonachaidh as t-samhradh 2017 agus tha i fhèin is Micheal stèidhichte ann am Poole ann an Dorset far a bheil i na ministear air Eaglais Bhaisteach Longfleet.