15/02/2019

Dà uair a thìde de cheòl air leth agus còmhradh inntinneach cuide ri Iain Mac'illeMhìcheil, a' craoladh beò à stiùidio a' BhBC ann an Glaschu. Còmhla ris an t-seachdain sa tha càraid phòsta às na Hearadh; Tormod Macleòid às an Tairbeart, sa bhean Donalda à Scalpaigh. Bha Tormod na àrd neach-stiùiridh poileis gus an do leig e dheth a dhreuchd ann an 2002. The e an-diugh ag obair aig Seirbheis Slàinte na Gàidhealtachd, mar mhanaidsear trèanaidh. Bha Donalda i fhèin aig aon àm ag obair dhan t-Seirbheis Slàinte Nàiseanta, ach tha i air a mhòr-chuid de beatha a chur seachad na màthair. An-diugh, tha iad a roinn an cuid ùine eadar còignear òghaichean agus iomadh cur-seachad a tha a' còrdadh riutha le chèile ... ged a tha Donalda ag ràdh nach eil goilf idir nam measg. ‘S e Tormod a-mhàin a tha craicte mu bhith a-muigh air an raon!
Cluinnidh sinn an cuid seanchas agus ceithir roghainnean ciùil eatarra. Agus mar as àbhaist, bidh measgachadh sgoinneil de sheinneadairean is còmhlain aig Mac‘illeMhìcheil fhèin dhuinn. Tha iad sin uile air an taghadh eadar Americana is Country/Country & Western, le seann òrain agus feadhainn a tha buileach ùr air an clàradh.