25/01/2019

Dà uair a thìde de cheòl air leth agus còmhradh inntinneach cuide ri Iain Mac'illeMhìcheil, a' craoladh beò à stiùidio a' BhBC ann an Glaschu. Còmhla ris an t-seachdain sa, air mìos Celtic Connections, tha an seinneadair Anna Mhàrtainn. Rugadh agus thogadh Anna ann an Cille Mhoire san Eilean Sgitheanach, agus tha i air a bhith a' seinn agus an sàs ann am mòran diofar riochdan ciùil fad a beatha. Nochd a’ chiad chlàr aice ann an 2002, fon tiotal Cò? Tha ùidh agus eòlas mhòr aig Anna ann an cultar dùthchasach. Anns na bliadhnaichean mu dheireadh, tha i air a bhith gu sònraichte ag obair le luchd-ealain is luchd-ciùil eile às na h-Ìnnseachan, ann am pròiseactan leithid Ceumannan, a thug i gu bailtean Delhi agus Lucknow agus a chaidh a choileanadh le clàr fon aon ainm ann an 2017. Tha dlùth cheanglaichean obrach aice cuideachd ann an Èirinn agus Astràilia. An ath sheachdain, bidh Anna mar phàirt de bhuidheann de luchd-ciùil air an àrd-ùrlar aig Gaels Le Chèile ann an Glaschu, mar phàirt de dh’fhèis Celtic Connections na bliadhna sa.