21/09/2018

Dà uair a thìde de chòmhradh agus ceòl air leth, còmhla ri Iain Mac 'ille Mhìcheil, a' craoladh beò à stiùdio a' BhBC ann an Glaschu. 'Se an seinneadair cliùiteach Iain MacAoidh a bhitheas a' tadhal air an t-seachdain-sa. 'S ann à Pabail Uarach San Rubha ann an Leòdhas a tha Iain agus tha e air a bhith a' seinn bho 's cuimhne leis. Rinneadh aithne air na tàlantan aige an toiseach ann an 1972, nuair a choisinn e Bonn Òir an t-Seann Nòis aig a' Mhòd Nàiseanta an Inbhirnis agus, beagan bhliadhnaichean às a dhèidh, prìomh fharpais an t-seann nòis aig an Fhèis Phan Ceilteach ann an Cill Àirne.
Thar iomadh bliadhna tha e air a bhith aithnichte bho phrògraman radio is telebhisein, agus tha fèill mhòr air mar sheinneadair aig cuirmean is cèilidhean air feadh na dùthcha. Bidh e cuideachd a' teagasg seinn aig fèisean mar Ceòlas is Fèis Bharraigh.
Cluinnidh sinn seanchas Iain, agus ceithir de na roghaineann ciùil pearsanta aige. Mar is àbhaist cuideachd, bìth measgachadh math de sheinneadairean is còmhlain aig Mac ílle Mhìcheil fhèin dhuinn. Tha iad sin uile air an taghadh eadar Country, Americana is ceòl Ceilteach, le seann òrain agus feadhainn a tha buileach ùr air an clàradh.