22/09/2017

Dà uair a thìde de shàr cheòl is còmhradh còmhla ri Iain Mac 'ille Mhìcheil, a' craoladh beò à stiùdio a' BhBC ann an Glaschu. An t-seachdain-sa, bidh Iain a' cur fàilt' air an neach-ealain Iseabail Mhoireach, à Leòdhas.

Tha Iseabail glè aithnichte ann an saoghal cultarach nan Gàidheal ann an Glaschu, tron obair luachmhor a tha i a' dèanamh còmhla ri Ceòl is Craic, a tha ruith fad na bliadhna. Bidh i ag innse dhuinn mun chuirm shònraichte, Oidhche Americana, a tha a' bhuidheann sin a' cur air adhart Disathairne 23mh Sultuin aig an CCA am meadhon a' bhaile, agus mu na pròiseactan ealain eile anns am bheil i an sàs. Gheibh sinn a-mach cuideachd mu a h-obair mar oide Gàidhlig aig Colaiste Cheilbhinn Ghlaschu.

Cluinnidh sinn seanchas Iseabail, agus ceithir de na roghainnean ciùil pearsanta aice. A bharrachd air a sin, bidh sàr mheasgachadh de cheòl air a thaghadh le Iain fhèin dhuinn, a' gabhail a-steach cuid de na guthan 'Country' is fheàrr a th' ann.