Coinneach Diciadain

Bho chionn trì fichead is a còig bliadhna deug thòisich blàr cho fuilteach is a bh'ann an eachdraidh an Dàrna Cogaidh agus an t-saoghail gu lèir. Chaidh faisg air dà mhillean duine a chall ann am Blàr Stalingrad eadar a' Ghearmailt agus an Ruis.

Gheibh sinn cunntas air a' bhlàr fuilteach a bha seo agus mìneachadh air mar a chaidh na h-uidhir a chall ann. Bheir an t-Ollamh Mata MacÌomhair agus an t-eòlaiche eachdraidh Niall Bartlett mìneachadh air na thachair.

Cuideachd sa phrògram an-diugh sgeulachd beatha inntinneach Dhòmhnaill Mhicleòid à Cùl nan Cnoc ann an Ceann a Tuath an Eilean Sgitheanaich. Chuir Dòmhnall iomadach bliadhna seachad mar fhear-smàlaidh ann an Lunnainn gus an do thill e air ais gu eilean àraich far an do thadhail Coinneach air bho chionn ghoirid. bbc.co.uk/coinneach.