21/07/2017

Dà uair a thìde de shàr cheòl is còmhradh còmhla ri Iain Mac 'ille Mhìcheil, a' craoladh beò à stiùdio a' BhBC ann an Glaschu. An t-seachdain-sa, bidh Iain a' cur fàilt' air fear de phrìomh phìobairean an t-saoghail, Ailean Dòmhnallach.'S ann à Gleann Uige a tha Ailean agus thòisich e a' cluich na pìoba nuair a bha e naoi bliadhna a dh' aois. Fhuair e oideachadh an tòiseach le Màidsear na Pìoba Iain MacCoinnich (Ceann Loch Chille Chiarain) agus pìobaireachd le Bob Nicol (Bealadair) is Ruaraidh Dòmhnallach (Uibhist a Deas). Am measg nan iomadh duais a choisinn e ann am farpaisean, ghlèidh e an "Clasp" an Inbhir Nis dà thuras. Ach ged a bhitheadh e a' gabhail pàirt ann am farpaisean, rinn e obair mhòr airson dòighean cluiche ùra is diofraichte a thoirt a-steach do shaoghal nam pìobairean anns na 1970an 's na 1980an. A bharrachd air obair rannsachaidh ann am pailteas, tha Ailean air dà chruinneachadh de phuirt pìoba, sean is ùr, a chur an clò: The Moidart Collection (A' Chiad Cheud) is The Moidart Collection II (An Dara Ceud). Tha fèill mhòr air Ailean mar phìobaire, mar sheinneadair agus mar fhear-teagaisg aig fèisean is sgoiltean air feadh an t-saoghail. Tha e air a bhith a' teagasg aig Conservatoire Rìoghail na h-Alba agus ann an Ionad na Pìobaireachd an Glaschu. Cluinnidh sinn seanchas Ailein, agus ceithir de na roghainnean ciùil pearsanta aige. A bharrachd air a sin, bidh measgachadh math de cheòl air a thaghadh le Iain Mac 'ille Mhìcheil fhèin dhuinn, a' gabhail a-steach cuid de na guthan 'Country' is fheàrr a th'ann.
John welcomes one of the world's most respected pipers, Allan MacDonald, from Glenuig. Allan has received many prestigious awards over the years and has recorded 2 albums of pipe music. During the show, he will reveal his 4 favourite pieces of music.