Feasgar air Dimàirt

Tha beagan agus bliadhna ann bhon a chaochail an cleasaiche comaig Ronnie Corbett ach tha daoine fhathast a' cuimhneachadh air. Bha aithrisean mu bhàs a' cuairteachadh air na meadhanan sòisealta aon uair eile an-dè a' toirt cothrom do gu leòr luaidh a dhèanamh air mar dhuine agus mar fhear a thug gàire air iomadh ginealach na bheatha-obrach. Ach carson a bha a leithid agus a cho-obraichte èibhinn Ronnie Barker cho soirbheachail? A bheil cleasaichean comaig an là an-diugh cho èibhinn ris na seann laoich?

Thòisich bliadhna ionmhais ùr aig an deireadh sheachdain ach saoil dè a tha seo a ciallachadh agus dè na h-amannan as fheàrr dhen bhliadhna airson diofar rudan a cheannach leithid carbad, fòn làimhe etc. Tha an t-eòlaiche ionmhais Dòmhnall Màrtainn a' toirt comhairle.

Chaidh a' chiad earrainn de Child of Our time a shealltainn air BBC 1 an-raoir, streath far a bheil an t-Ollamh Robert Winston air a bhith a' leantainn grunn chloinne bho rugadh iad ann an dà mhìle. Tha a' chlann seo a-nis sia bliadhna deug ach dè an seòrsa saoghal anns a bheil iad beò. Thug Catrìona Nic a' Phi a tha na pàrant agus Rory MacDiarmaid a tha sia bliadhna deug a dh' aois sùil air a' phrògram agus gheibh sinn am beachdan air. bbc.co.uk/feasgar.