Episode 132

Bha Riaghaltas na Gearmailt airson leudachadh air obair nam bàtaichean-aigeil gu bhith a' cur fodha soithichean ospadail. Roimhe sin thubhairt Nirribhidh gu robh iadsan a' cur bacadh air bàtaichean-aigeil sna h-uisgeachan acasan agus chaidh an ceòl a chuir feadh na fìdhle air an latha mu dheireadh dhen Fhaoilleach 1917. Dh'innis na Gearmailtich na bha fa near dhaibhsan, ag ràdh gu robh iad a' maoidheadh cogadh mara gun tròcair air soithichean sam bith, co-dhiù a bhuineadh iad do dhùthchannan Co-chòmhraigeach no nach buineadh, bhon chiad latha dhen Ghearran. Rinn iad soilleir cuideachd gun toireadh iad ionnsaigh air soithichean ospadail Breatannach a bha a' siubhal air ais 's air adhart bhon Fhraing sa Bheilg, a' fàgail orra gun robh iad a' deànamh dì-meas air suaicheantas na Croise Deirge.
Tha Gilleasbuig MacDhòmhnaill ag innse mar a chuir co-dhùnadh na Gearmailt fearg air na Stàitean Aonaichte - a bha fhathast gun a thighinn a-steach dhan chogadh.