Cèilidh, ceòl agus craic gu leòr

Dà uair a thìde de shàr cheòl is còmhradh cuide ri Iain Mac 'ille Mhìcheil a' craoladh beò à stiùidio a' BhBC ann an Glaschu. Cuide ri Iain an t-seachdain 'sa tha Eilidh Scammell à Inbhir Nis ach a tha a-nis a' fuireach ann an Caol Àcain san Eilean Sgitheanach. Tha Eilidh ag obair mar Mhanaidsear Pròiseict airson Ainmean-Àite na h-Alba. An uiridh, dh'fhoillsich iad leabhran ann an co-bhanntachd ri SNH agus le taic bho Shoillse air a' chuspair "Ainmean-Àite an t-Sratha, An t-Eilean Sgitheanach". Bhuannaich an obair a rinn iad air an leabhran an Duais Coimhearsnachd, Dualchais is Turasachd aig Duaisean Gàidhlig na h-Alba san t-Samhain 2015.
Tha dà cheum aig Eilidh, BA (le urram) ann an Graphic Design agus BA (le urram) ann an Gàidhlig agus Ceòl Traidiseanta. 'S e fìdhleir a th' innte agus tha ùidh mhòr aice ann an rannsachadh ciùil, gu sònraichte fìdhlearachd ann an Sgìre Athall ann an Siorrachd Pheairt.
Cluinnidh sinn seanchas Eilidh a thuilleadh air ceithir de na taghaidhean ciùil pearsanta aice fhèin. Mar is àbhaist cuideachd tha measgachadh math de cheòl is òrain air an taghadh le Iain a' toirt a-steach cuid de na guthan 'country' is fheàrr a th'ann.