Fear-naidheachd gu Searmonaiche - Alasdair MacAmhlaigh ( An t-Urr.)

Dh'fhag Alasdair MacAmhlaigh obair mar neach-naidheachd aig BBC Radio nan Gaidheal agus BBC Alba anns an Ògmhios 2009 agus e a' gabhail ceum às ùr na bheatha bho bhith a' lìbhrigeadh naidheachdan gu bhith a' lìbhrigeadh an t-soisgeil. Ghluais e fhèin, a bhean Màiri, agus an triùir chloinne - Luc, Emma agus Ceit - à Dail bho Dheas ann an Nis gu baile mòr Dhùn Èidinn far an do rinn iad an dachaigh airson trì bliadhna fhad 's a bha Alasdair na oileanach ann an Colaiste na h-Eaglaise Saoire.

Bha dragh air Alasdair an toiseach a' gluasad a bhean agus a theaghlach gu tìr-mòr, gu dòigh-beatha air nach robh iad eòlach agus gu saoghal gu math eadar-dhealaichte bhon chroit ann an Leòdhas. Cha leigeadh e leas dragh a bhith air, oir cha robh iad fada gus an do dh'fhàs iad eòlach agus an saoghal ùr a' còrdadh riutha gu mòr.

Airson a' chuid as motha dhan ùine a bha e so cholaiste 's e an oileanach bu shine a bha air a' chùrs' aige. 'S e dòigh-beatha gu math eadar-dhealaichte a bha seo dha fhèin cuideachd agus aige ri tòrr obair a dhèanamh, eadar a bhith a' leughadh, a' sgrìobhadh, ag ionnsachadh agus a' searmonachadh.