Yn Ysbyty Poona - Jim Parc Nest

Neithiwr, ni filwriwn dros gwsg;

gydol nos arhoswn ar ddi-hun tra suddai’r cread

gan bwyll i gynnwrf ei bwll o dywyllwch diwnïad

nes imi deimlo dy fod tithau, fy annwyl gariad,

yn rhannu’r un wyliadwriaeth nos â minnau.

Ac mewn amrantiad, darfu’r gagendor rhyngom

fel petai i alarch gorawenus rychwantu’r pellter

nes dwyn cytundeb ei gymundeb atom.

Ac fel at olau lloer neu wynder alarch, fe hudwyd

Cymru gyfan o fewn plwyf fy ngofal,

y llanw’n glaslamu ar draethau Ceredigion,

dy gwch hwylio coch â chanddo chwedl i’w chynnal.

A mynyddoedd ysblennydd Dafydd a Llewelyn,

Pumlumon, Cader Idris a chewri Eryri

wrthi’n dyrnu’n ddiderfyn yn y fagddu,

ynghyd â’r cwm glofaol na wnaf mo’i enwi

â’i lethrau wedi’u sgathru gan dai rhesog a beddi

plith draphlith ymhlith coed pîn penuchel,

lle y disgwyliet ar dy orwedd yn gwrando ar y tonnau -

twtshodd fy nwylo twym â dy ysgwyddau gwyn, penisel

- ac yna lledodd deng mil milltir o wawl dyddiau

rhyngom, pan ddaeth i’m clyw, grawc gwyllt y brain

yn llwnc llwglyd India, a’r datgeliad,

er y gall Amser hollti calonnau,

na all gwenwyn y sarff ffyrnicaf ddifa cariad.

JIM PARC NEST