Bara wedi'i blethu Elliw Gwawr

Rysait Bara wedi'i Blethu gan Elliw Gwawr

Tra oeddwn i’n byw yn Awstria roeddwn yn bwyta fy siâr o’r bara hwn. Bob dydd byddai Heinz, y perchennog a’r cogydd, yn ei baratoi i’w westeion. Dros ddeng mlynedd yn ddiweddarach, mae meddwl am y bara yma’n dal i dynnu dŵr o fy nannedd. Wir i chi, mae’n ogoneddus, y bara gorau i mi ei fwyta erioed. Nid yn unig mae’n edrych yn ddeniadol wedi’i blethu, mae’n gyfoethog, yn felys ac yn feddal – perffaith ar gyfer brecwast arbennig. Mae’r rysáit yn gwneud dwy neu dair torth, ond maen nhw’n rhewi’n dda, felly gwnewch un i’w bwyta a rhowch y gweddill yn y rhewgell.

Cynhwysion

85g o fenyn heb halen

300ml o laeth

700g o flawd bara

½ llwy de o halen

14g o furum

55g o siwgr mân

2 lwy de o groen lemon wedi’i gratio

1 llwy fwrdd o siwgr fanila

3 wy ac 1 arall i’w frwsio dros y bara

Dull

Toddwch y menyn mewn sosban ac ychwanegu’r llaeth. Cynheswch nes eu bod yn gynnes ond ddim yn boeth (37°C os oes gennych thermomedr).

Rhowch y cynhwysion sych i gyd mewn powlen, gan wneud yn siŵr nad yw’r halen a’r burum yn cyffwrdd. (Mae halen yn gallu lleihau effeithiolrwydd y burum os yw’r ddau’n cyd-gyffwrdd am yn rhy hir.)

Ychwanegwch y llaeth a’r menyn yn ogystal â’r 3 wy a chymysgu’n dda. Gan fod y toes yn reit wlyb dwi’n ei chael hi’n haws defnyddio peiriant ar gyfer y cam hwn, ond gallwch wneud hyn â llaw, er y bydd yn golygu ychydig yn fwy o lanast!

Ysgeintiwch ychydig o flawd ar y bwrdd a thylino’r toes am 10 munud nes ei fod yn llyfn.

Rhowch y toes mewn powlen wedi’i hiro ag ychydig o olew. Gorchuddiwch hi â cling film a gadael i’r toes godi am o leiaf awr, nes ei fod wedi dyblu mewn maint.

Pan fydd y toes wedi codi, ysgeintiwch ychydig o flawd ar y bwrdd a rhannu’r toes yn 2–3 darn. Fe fydd yn gwneud dwy dorth fawr neu dair torth lai.

Rhannwch bob darn yn dri, gan eu rholio i ffurfio tair sosej hir. Pinsiwch bennau’r tri darn gyda’i gilydd a’u plethu. Ar ôl plethu’r dorth gyfan, plygwch y darn pen oddi tano fel ei fod yn edrych yn dwt. (Mae’n bosib plethu gyda phedwar neu fwy o ddarnau hefyd, ac mae hynny’n gwneud torth ddeniadol iawn.)

Rhowch y torthau ar dun pobi wedi’i leinio â phapur gwrthsaim a gadael iddyn nhw godi am awr arall neu nes eu bod wedi dyblu mewn maint eto.

Cynheswch y popty i 200°C / Ffan 180°C / Nwy 6.

Pan fydd y toes wedi codi, brwsiwch y torthau ag wy a’u coginio am 20 munud, nes eu bod yn euraidd.

Gadewch iddyn nhw oeri ar rwyll fetel.