Main content

Gorwelion 12: Telerau ac Amodau

Dyma’r telerau ac amodau ar gyfer bandiau a/neu artistiaid sy’n dymuno cael eu hystyried ar gyfer cynllun Gorwelion/Horizons (“y Cynllun”) – cynllun cerddoriaeth BBC Cymru Wales a Chyngor Celfyddydau Cymru. Rhaid i BBC Cymru Wales dderbyn ceisiadau ar gyfer y Cynllun erbyn hanner nos, 1 Mai 2019 fan bellaf.

  1. Rhaid i’r band a/neu’r artistiaid (“yr Ymgeiswyr”) sy’n cyflwyno’r Ffurflen Gais Gorwelion/Horizons (“y Ffurflen Gais”) gadarnhau bod yr wybodaeth yn y Ffurflen Gais yn wir ac yn gywir. Rhai i’r Ffurflen Gais ar gyfer bandiau gael ei llenwi gan un aelod o'r band, a bod y person hwnnw, ar ôl cael caniatâd gweddill y band i wneud y cais, yn cytuno bod yr wybodaeth ar y Ffurflen Gais yn wir ac yn gywir ar gyfer y band i gyd a bod holl aelodau'r band yn bodloni’r telerau ac amodau ar gyfer dod yn rhan o'r Cynllun.
  2. Wrth gyflwyno'r Ffurflen Gais, mae'r Ymgeisydd yn cadarnhau ei fod yn deall natur a chynnwys y Cynllun.
  3. Mae’r Ymgeiswyr yn cadarnhau nad ydynt o dan 16 oed adeg dod yn rhan o'r cynllun ac os yw'r Ffurflen Gais gan fand, eu bod yn cadarnhau nad oes yr un aelod o'r band o dan 16 oed.
  4. Rhaid i artistiaid unigol fod yn byw yng Nghymru ac wedi bod â chyfeiriad dilys yng Nghymru am 6 mis o leiaf cyn y dyddiad y byddant yn dod yn rhan o’r cynllun. Rhaid i fandiau ddangos bod nifer sylweddol o aelodau’r band yn byw yng Nghymru ac wedi bod â chyfeiriad dilys yng Nghymru am 6 mis o leiaf cyn y dyddiad y byddant yn dod yn rhan o'r cynllun. Bydd myfyrwyr sydd wedi’u lleoli mewn cyfeiriad dros dro, ond sy’n gysylltiedig â chyfeiriad parhaol yng Nghymru, yn dal i gael eu hystyried yn gymwys, ond mae’n rhaid iddynt brofi eu statws fel myfyriwr.
  5. Efallai y bydd yn rhaid i'r Ymgeiswyr ddarparu prawf o bwy ydyn nhw, eu hoedran a’u cymhwysedd.
  6. Ni fydd ymgeiswyr yn gymwys i ddod yn rhan o’r Cynllun os ydynt ynghlwm wrth label recordio mawr cyn dyddiad eu mynediad i’r Cynllun (at y diben hwn, bydd hyn yn golygu unrhyw label sy’n perthyn i unrhyw rai o’r cwmnïau recordio mwy, gan gynnwys, ond heb fod yn gyfyngedig i: Sony Music Entertainment, Warner Music Group, Universal Music Group a’u his-gwmnïau).
  7. Bydd ymgeiswyr sydd wedi rhyddhau eu deunydd eu hunain ar record fasnachol a/ neu mewn fformat i'w lawrlwytho a/neu ar label recordio annibynnol bychan, yn gymwys i gymryd rhan yn y Cynllun ar yr amod nad oes unrhyw gyfyngiadau wedi’u gosod arnynt neu eu cerddoriaeth gan y label recordio annibynnol neu unrhyw drydydd parti arall sy’n golygu na allant gydymffurfio â’r telerau a’r amodau ar gyfer bod yn rhan o’r Cynllun.
  8. Mae’r Ymgeiswyr yn deall ac yn cydnabod bod yn rhaid i’w perfformiadau a/neu eu cyfraniadau ar gyfer y Cynllun gydymffurfio â Chanllawiau Golygyddol y BBC <http://www.bbc.co.uk/editorialguidelines/guidelines> a hefyd bod yn rhaid i’w perfformiadau a/neu eu cyfraniadau beidio â chynnwys dim sy’n torri hawlfraint neu y gellid disgwyl iddo ddwyn anfri ar y BBC neu sy’n ddifenwol.
  9. Drwy lenwi a chyflwyno’r Ffurflen Gais, mae’r Ymgeisydd yn cytuno â Pholisi Preifatrwydd a Pholisi Cwcis y BBC.
  10. Bydd y Ffurflenni Cais yn cael eu hasesu gan banel o staff dethol o BBC Cymru Wales a Chyngor Celfyddydau Cymru a gwahoddedigion o blith arbenigwyr yn y diwydiant. Bydd eu penderfyniad hwy ynglŷn â phwy sy’n cael cynnig lle ar y Cynllun yn derfynol.
  11. Ni fydd aelodau staff a pherthnasau agos staff BBC Cymru Wales a Chyngor Celfyddydau Cymru yn gymwys ar gyfer y Cynllun.
  12. Bydd ymgeiswyr sy’n cael eu dewis i ymuno â’r Cynllun yn aseinio’r holl hawlfraint yn eu perfformiadau a/neu yn y cyfraniadau a roddant o dan y Cynllun. Byddant hefyd yn rhoi pob cydsyniad a all fod yn ofynnol dan Ddeddf Hawlfraint, Dyluniadau a Phatentau'r BBC 1998 (fel y’i diwygiwyd) ac yn rhoi i'r BBC unrhyw a phob hawl sy’n ofynnol i alluogi’r BBC i wneud y defnydd llawnaf o’u recordiadau heb gyfyngiad mewn unrhyw gyfrwng ar draws y byd am oes y cyfryw hawliau.
  13. Bydd yr hawlfraint sylfaenol ym mherfformiadau a/neu gyfraniad(au)’r Ymgeisydd a roddir o dan y Cynllun (e.e. cyfansoddiad cerdd, geiriau etc.) yn aros gyda deiliad yr hawliau ac mae’r BBC yn cydnabod nad yw caniatâd wedi’i gyfyngu i'r BBC, fel y gall bandiau/artistiaid barhau i ddefnyddio’r deunydd mewn unrhyw ffordd gan gynnwys caniatáu i eraill ei ddefnyddio.
  14. Mae’r Ymgeiswyr yn cytuno y caiff y BBC grybwyll, arddangos a defnyddio’u henw a/neu eu delwedd a/neu debygrwydd mewn cysylltiad â’r Cynllun ac yn cydnabod y bydd hyn yn digwydd yn gyfan gwbl yn unol â disgresiwn golygyddol y BBC.
  15. Disgwylir i Ymgeiswyr sy’n gwneud cais i ymuno â'r Cynllun lofnodi cytundeb yn dweud eu bod wedi deall ac yn cytuno â'r telerau ac amodau hyn, ac y byddant hefyd yn cyfrannu at weithgarwch cyhoeddusrwydd gan gynnwys gweithio gydag adran farchnata BBC Cymru Wales.
  16. Mae’r BBC yn cadw’r hawl i: ganslo, newid neu addasu telerau ac amodau'r Cynllun ar unrhyw adeg, at ddibenion golygyddol neu os oes unrhyw amodau y tu hwnt i’w rheolaeth; gwahardd unrhyw fand neu artist ar unrhyw adeg o'r Cynllun os byddant wedi torri’r telerau ac amodau hyn a/neu yn ymddwyn yn dramgwyddus a/neu yn dwyn anfri ar y BBC.
  17. Ni fydd y BBC yn atebol i unrhyw Ymgeiswyr nac i’w cynrychiolydd cyfreithiol am unrhyw golled neu ddifrod neu anaf a achosir i'r Ymgeisydd neu ei eiddo mewn cysylltiad â bod yn rhan o'r Cynllun oni bai fod hynny wedi’i achosi drwy esgeulustod y BBC ac yn adferadwy ar y sail honno.
  18. Mae darlledwyr y DU, gan gynnwys BBC, yn ymchwilio i amrywiaeth yn eu rhaglenni. Mae hyn yn cynnwys nodweddion amrywiaeth y bydd Ymgeiswyr llwyddiannus i'r Cynllun yn dewis dweud wrth y darlledwyr amdanynt a hefyd beth o bosib yw canfyddiad y gynulleidfa o amrywiaeth ar raglenni’r BBC. Mae Ymgeiswyr llwyddiannus yn deall y bydd y BBC yn cofnodi cyfeiriadau e-bost yr Ymgeiswyr (neu gyfeiriad e-bost rhieni/gwarcheidwad y rheini o dan 18 oed) ar system o'r enw Silvermouse ac y bydd Ymgeiswyr llwyddiannus yn cael eu gwahodd i ddarparu (a’u dewis hwy fydd gwneud) nodweddion amrywiaeth - rhywedd, ethnigrwydd, anabledd, oed ac, os ydynt dros 13 oed, hunaniaeth o ran rhywedd a chyfeiriadedd rhywiol. Bydd aelod o dîm cynhyrchu'r Cynllun hefyd yn cofnodi data canfyddedig (perceived data) ar gyfer pawb y maent yn eu gweld ar y sgrin/ar yr awyr (fel y bo’n berthnasol) gan ddefnyddio’r un nodweddion.
  19. Mae’r Telerau a’r Amodau hyn yn cael eu rheoli gan gyfreithiau Cymru a Lloegr.

Gorwelion 12: Eiddo Deallusol

Drwy gyflwyno unrhyw ddeunydd i’r BBC (gan gynnwys unrhyw destun ysgrifenedig, ffotograffau, graffeg, fideos, neu ddeunydd clywedol), mae bandiau / artistiaid Gorwelion 12 yn cytuno i roi i’r BBC, yn rhad ac am ddim, ganiatâd i ddefnyddio’r deunydd fel y myn (gan gynnwys ei newid a’i addasu am resymau gweithredol a golygyddol) ar unrhyw wasanaeth BBC mewn unrhyw gyfrwng ledled y byd (gan gynnwys ar safle’r BBC a ddefnyddir gan ddefnyddwyr rhyngwladol). Dan rai amgylchiadau penodol, gall y BBC hefyd rhannu’r deunydd gyda thrydydd partïon y mae yn ymddiried ynddynt, ac yn benodol partner y BBC, Cyngor Celfyddydau Cymru.

Bydd yr hawlfraint sylfaenol yng nghyfraniad(au) bandiau / artistiaid Gorwelion 12 yn parhau yn eiddo deilydd yr hawliau ac mae’r BBC yn cydnabod bod y caniatâd a roddir i’r BBC yn an-ecsgliwsif, ac felly y gall y bandiau / artistiaid barhau i ddefnyddio’r deunydd mewn unrhyw ffordd, gan gynnwys caniatáu i eraill ei ddefnyddio. Er mwyn osgoi unrhyw amheuaeth, bydd y BBC yn berchen ar a / neu yn cadw’r hawlfraint ar unrhyw ddeunydd ysgrifenedig, ffotograffau, cynnwys clywedol, cynnwys clyweledol, rhaglenni a deunydd darlledu a gynhyrchwyd gan y BBC.

Er mwyn i’r BBC allu defnyddio unrhyw ddeunydd a ddarparwyd gan fandiau / artistiaid Gorwelion 12 a / neu gynnwys a gynhyrchwyd gan neu ar ran y BBC fel rhan o gynllun Gorwelion 12 neu mewn cysylltiad â’r cynllun sy’n cynnwys y bandiau / artistiaid, mae’r bandiau / artistiaid yn cadarnhau’r canlynol: (i) mai eu gwaith gwreiddiol hwy eu hunain yw deunydd o’r fath, nad yw’n ddifenwol ac nad yw’n torri unrhyw gyfraith yn y Deyrnas Unedig; (ii) bod gan y bandiau / artistiaid hawl i roi caniatâd i’r BBC ei ddefnyddio at y dibenion a bennwyd uchod; a (iii) bod y bandiau / artistiaid wedi cael caniatâd gan unrhyw un y gellir ei adnabod yn y deunydd, neu ei riant neu warcheidwad, lle bo hynny’n berthnasol.

Fel arfer, bydd y BBC yn dangos enw bandiau / artistiaid Gorwelion 12 gyda’u cyfraniad, heblaw eu bod wedi gofyn fel arall, ond, oherwydd rhesymau gweithredol, nid yw hyn bob amser yn bosibl. Mae’n bosib y bydd angen i’r BBC gysylltu â bandiau / artistiaid at ddibenion gweinyddu neu ddilysu mewn perthynas â’r deunydd neu mewn perthynas â phrosiectau penodol. Ceir manylion llawn ynglŷn â’r amgylchiadau pryd a sut y byddwn yn cysylltu â’r bandiau / artistiaid ym Mholisi Preifatrwydd y BBC ynghyd ag unrhyw delerau lleol, os yn berthnasol.

Os nad yw bandiau / artistiaid eisiau rhoi’r caniatâd a nodir uchod ar y telerau hyn, ni ddylent ymgeisio ar gyfer y cynllun.

Rhaid i’r caneuon / cerddoriaeth fod yn addas ar gyfer eu darlledu (fel y nodir yn Nhelerau ac Amodau Gorwelion h.y. rhaid i’r iaith gydweddu â Safonau Golygyddol y BBC).

Disgwylir i aelodau’r panel dethol arwyddo datganiad yn dweud eu bod yn ddiduedd.

Bydd BBC Cymru Wales a Chyngor Celfyddydau Cymru’n cadw’r hawl i ganslo neu addasu’r cynllun ar unrhyw adeg os ystyrir hynny’n angenrheidiol yn olygyddol neu os yw’r amgylchiadau yn newid am resymau y tu hwnt i’w rheolaeth a bod gofyn gweithredu fel hyn oherwydd hynny.

Gweinyddir y cynllun hwn gan y BBC mewn partneriaeth â Chyngor Celfyddydau Cymru ac mae’n ddarostyngedig i gyfraith Cymru a Lloegr.

Os oes gennych chi unrhyw gwestiynau ynglŷn â thelerau ac amodau Gorwelion, neu os ydych yn gymwys ar ei gyfer, cysylltwch â’r BBC drwy gorwelion@bbc.co.uk