Queen Elizabeth: British monarch mark 95 birthday today - See why di Queen get two birthdays
Wia dis foto come from, European Photopress Agency
Di Queen of England clock 95-years-old on Wednesday 21 April dis year, but she also get anoda birthday later in di year.
Dem born di Queen on 21 April 1926 - wey make that day her real birthday.
She come get di second one - wey be di official celebration - and that one dey happen on di second Saturday of June.
So why di Queen get two birthdays, and how dey celebrate dem?
Wia dis foto come from, PA
History of two birthdays
No be today official celebrations to mark di King or Queen birthday for UK don dey happen on day wey no be dia real birthday.
Na King George II begin dis double birthday celebration more than 250 years ago for 1748.
Dem born am for November, wey be period for UK wey no dey get good weather.
End of Di one wey oda users dey read well well
But because im real birthday no be good time of di year to take do birthday parade, King George choose anoda day to mark am - di annual military parade day for di summer, when di weather dey fine.
And na so di tradition wia monarch go get real birthday and official birthday begin.
Wia dis foto come from, Royal Family
How di Queen dey mark her two birthdays
For her real birthday, di Queen dey dey with her family.
Every 21 April, 41-gun salute go fire for Hyde Park, 21-gun salute for Windsor Great Park and 62-gun salute for di Tower of London.
But dem cancel am dis year because of di coronavirus pandemic.
Di Queen and di Royal Family still dey mourn di death of Prince Philip, so even celebrations inside di family no go dey like e dey be.
Wia dis foto come from, Getty Images
Meanwhile on her official birthday, wey dey happun for June, na Trooping The Colour parade dem dey do.
Dem cancel that one too dis year - and na di third time for her reign wey e no go ahead.
Wetin be Trooping The Colour?
Trooping the Colour don mark di official birthday of di British monarchs for more than 260 years.
More than 1400 soldiers, 200 horses and 400 musicians dey usually take part for di event!
Many pipo go gada outside with clothes wey get Union Jacks design, and wit flags in order to watch di parade outside of Buckingham Palace.
Also di Royal Air Force (RAF) go also go do display with planes for sky above in di presence of di royal family for di palace.
