Capitol Hill protest: Trump blocked from Twitter and Facebook, oda tins wey happun afta Donald Trump supporters storm Congress to protest US election result

Washington DC police say four pipo don die during di storming of di Capitol building on Wednesday.

In addition to di woman wey police shoot, three odas die as a result of "medical emergencies".

So far, more dan 52 pipo don dey arrested - 47 of dem, sake of curfew violations.

Dis one na afta Pro-Trump protesters storm Capitol Hill, wia Congress bin dey do joint session to certify di results of di 2020 election - and Joe Biden win.

Congress stop di session as di violence dey go on, but later meet again afta di violence to certify Joe Biden election win.

How di Capital Hill protest take happun

E start afta di good news for Democrats as e be like say dem go take control of di US Senate with two projected wins for Georgia

President Donald Trump address im supporters for Washington DC, say e no go concede and say now no be di time for "weakness"

As Trump wrap up im speech, Congress meet for a joint session to certify di results of di 2020 election - and Joe Biden win. Na di final step before Biden's inauguration as the 46th president on 20 January

One large group wey bin wan scata di proceedings for Congress, pro-Trump supporters by-pass di barricades, jump walls and force lawmakers to evacuate di premises. Di violence continue for hours.

Di mob - some wey wear body armour - use chemical irritants to attack police, according to Washington Metropolitan Police Chief Robert Contee.

Dem shout and waved pro-Trump and US flags as dem roam di halls, dey demand make dem overturn di results of di presidential election.

Several thousand National Guard troops, FBI agents and US Secret Service na im dem deploy to help di Capitol police wey no fit handle am alone.

Authorities recover two pipe bombs, one from di Democratic National Committee offices, not far from di Capitol, and one from di nearby Republican National Committee headquarters.

DC National Guard deploy go di Capitol, to back up law enforcement for di place.

Wednesday attack na di first time dem go break enta di US Capitol since di War of 1812, according to US Capitol Historical Society experts.

British troops, wey Vice Admiral Sir Alexander Cockburn and Major General Robert Ross lead - set fire to di still-under-construction Capitol afta dem invade DC for August 1814 (though di building survive thanks to rain).

In retaliation for di Americans burning of Upper Canada capital for York one year earlier, di British troops also set fire to oda parts of di city, including di White House.

Wetin don happun since den?

Social media giants don announce say de go bar President Donald Trump account.

Twitter announce say President Donald Trump account go dey locked for di next 12 hours due to im tweets about di election earlier today.

"As a result of di unprecedented and ongoing violent situation fo Washington, DC, we don ask for di removal of three @realDonaldTrump Tweets wey dem post earlier today for repeated and severe violations of our Civic Integrity policy," di social platform tok.

If Trump no remove di three tweets in violation, di account go remain locked.

Facebook don also tok say dem go bar President Trump from posting for di next 24 hours.

Di company cite policy violations ontop di president page.

Meanwhile di mayor of di US capital city don extend public emergency for 15 days until afta inauguration day.

Di order lasts until 15:00 on 21 January, di day afta Bid dem go swear Biden in.

Di city dey already under curfew dwey di Mayor declare from 18:00 on Wednesday to 06:00 (23:00 to 11:00 GMT).

How global leaders react

Global leaders don dey express dia shock over di attack for di US capital.

Facts of di US election results

Dis na probably good time to go over di facts of di election results, contrary to wetin President Trump dey tok.