Iran plane crash: Ukraine International jet with 176 pipo don crash
Wia dis foto come from, AFP
One Ukrainian Boeing-737 with 176 pipo onboard don crash for Iran, according to local tori pipo.
Di aircraft wey belong to Ukraine International Airlines crash just afta take-off from Iran Imam Khomeini airport inside Tehran, according to di Fars state news agency.
Tori be say di plane bin dey fly go di Ukrainian capital of Kyiv.
Ukraine embassy for Tehran first say na engine failure cause di crash but dem later remove di statement.
Ukraine President Volodymyr Zelensky say im dey cut shut im visit to Oman to go Kyiv. E don draw ear say make pipo no carry dey assume wetin happun until official report come out.
"My sincere condolence to di relatives and friends of all di passengers and crew," im tok inside statement.
Who bin dey on board?
Among di victims na 82 Iranians, 63 Canadians, 11 Ukrainians including all nine crew, 10 Swedes, four Afghans, three Britons and three Germans, Ukrainian Foreign Minister Vadym Prystaiko tok.
Ukrainian officials say 169 passengers na im buy tickets for di flight but two no later board.
End of Di one wey oda users dey read well well
Wia dis foto come from, Getty Images
Ukraine International Airlines don suspend flights wey dey go Tehran indefinitely, di airline say na Monday dem schedule di aircraft last for maintenance.
Although dem send rescue teams go di site of di crash, Iran Red Crescent organisation say di chance say dem go find any survivors no dey.
