Ghana vs Nigeria play off: Black Stars 27 man squad list to face Super Eagles

Black Stars coach on Tuesday name 27 man squad who go face Nigeria in de FIFA World Cup qualifier play offs on Friday.

Ghana national football team go play Super Eagles inside de first leg of de play offs.

De Gold Coast dey host de first play off for de Baba Yara Sports Stadium inside Kumasi on March 25, 2022.

After dis game, de Black Stars go travel go Abuja on March 29 for de second leg of de World Cup play offs for Qatar mundial.

Players start dey arrive

Players for de Black Stars camp start dey arrive Ghana for trancing ahead of de clash.

AS Roma player, Felix Afena Gyan share pictures of himself as he dey inside plane dey fly to Ghana for de game.

He write, "on my way to defend my country Ghana."

Dis go be de first call up for Felix Afena Gyan who blow last year after Jose Mourinho draft am from junior team into de Senior team for AS Roma.

De team dey unveil new players, most of whom no play in de AFCON 2021 tournament.

Arsenal midfielder go lead de squad against Nigeria in de absence of Captain Andre Dede Ayew.

Deep throat sources say Thomas Partey, Afena Gyan den other players arrive already.

Meanwhile, hopes be say de Black Stars players go arrive Ghana fully by close of today.

Ghana dey hope say dem go fit show better performance after dem show poor performance in de 2021 AFCON.

Asamoah Gyan dey para

Veteran striker of Ghana national football team don criticize di decision of di kontri coach to drop Majeed Ashimeru from di squad wey go play against Nigeria.

Di Black stars captain Asamoah Gyan take to social media to call out di FA say e understand why dem leave out Ashimeru from di squad.

Ashimeru wey dey play for Anderlecht football club for Belgium dey in form and some Ghana fans including Gyan expect say FA for invite am afta e miss out of di 2021 Africa Cup of Nations.

However, di 24-year-old no follow for Otto Addo 27-man squad wey dem release on Tuesday.

"I still insist say Ashimeru deserve to dey dis current Black Stars," Gyan post for Twitter.

Super Eagles squad

Augustin Eguavoen, coach of Nigeria national team invite 25 players for di game against Ghana.

E release di list since 4 March wit seven oda players on standby - incase any tin happun to any of di players on di main list.

Ademola Lookman, Emmanuel Denis, Calvin Bassey and Innocent Bonke fit get chance to play dia first game for di national team.

On Tuesday di Nigeria Football federation announce say dem don drop di first choice goalkeeper, Maduka Okoye sake of say e no well. Dem replace am wit Enyimba FC goalkeeper, John Noble.

Already, many of di players don arrive di team camp for di Federal capital territory, Abuja.

Ghana-Nigeria performance for Afcon 2021

Di 2021 African cup of Nations end for Cameroon for February 2022.

Senegal win di competition afta dem beat Egypt for di final.

But many fans bin dey put eyes for both Ghana and Nigeria for di tournament, howeva dem no go far.

Ghana performance for Afcon dey very poor as dem leave di competition without winning any match. Dia captain Andy Ayew even chop red card for di final group match.

Nigeria on di oda hand bin show some strength as dem qualify from di group stage afta topping dia group.

But di Super eagles no go beyond di second round as dem lose 1-0 to Tunisia. Nigeria midfielder Alex Iwobi also chop red card for di match.

Ghana vs Nigeria head to head

For di last 71 years, Ghana and Nigeria don meet plenti times for senior level.

Records show say Ghana and Nigeria don meet 49 times.

Ghana win 21 while Nigeria win 10 and dem draw 18.

Ahead of di play off on Friday both teams dey go as under performers - e dey hard to predict who go win.