Abuja plane crash: Nigerian Air force personnel wey die for aircraft accident receive military burial

Di seven Nigerian Air Force officers wey die for di Sunday air crash don get military burial for National Cemetery, Lugbe, Airport Road, Abuja.

Di men bin die for DI Beechcraft King Air B350i wey crash for Bassa aviation village near di Nnamdi Azikiwe International Airport, Abuja, after dia plane engine get fault.

Di Minister of Defence, Maj. Gen. Salihi Magashi (retd.), the Chief of Defence Staff, Maj. Gen Lucky Irabor, the Chief of Army Staff, Ibrahim Atahiru, the Chief of Air Staff, Air Vice Marshal Isiaka Amao and the family members of the deceased bin dey for di burial to give dia last respect.

Di officers wey die be Captain, Fl Lt. Haruna Gadzama; Fl. Lt. Henry Piyo (Co-Pilot); Flying Officer Micheal Okpara (Airborne Tactical Observation System Specialist);

Warrant Officer Bassey Etim (ATOS Specialist); Fl. Sgt. Olasunkanmi Olawunmi (ATOS Specialist); Sgt. Ugochukwu Oluka (ATOS Specialist) and Aircraftman Adewale Johnson (Onboard Technician).

Profile of Captain Gadzama

Dem born Late Flight Lieutenant Chiroma Haruna Gadzama for 11 January 1990 for Kaduna.

E come from Askia/Uba Local Government Area of Borno State.

E join di Nigerian Air Force as member of Nigerian Defence Academy Regular Course 62 for 14 August 2010 and commissioned Pilot Officer for 12 September 2015.

Afta im course, e chop promotion to di rank of Flight Lieutenant on di 14th of August 2020.

Di late officer get Bachelor of Science Degree of Economics from Nigerian Defence Academy.

​Until im death, late officer Gadzama bin dey serve as a Squadron Pilot for 307 Executive Airlift Group, Abuja.

Di late officer conduct ISR missions extensively for all theatres of operations including the OPS LAFIYA DOLE for North East, OPS HADARIN DAJI and OPS THUNDER STRIKE for North West as well as OPS GAMA AIKI for North Central.

E also fly several VIP missions whenever e no dey participate for theatre of operations.

Sake of say di late officer sabi im job wella, e take command on the King Air 350i in October, 2020.

Di late officer bin get flying experience for Diamond 40, Diamond 42 and the King Air 350i and di total hours wey im don fly be 1,151.

Officer Gadzama bin dey single wen e die and e dey like to play volleyball, cycling and to di fly aeroplane.

Pictures from di burial