Kogi supreme court judgement: Election tribunal wey Gov. Yahaya Bello win for Kogi State dey legit
Wia dis foto come from, YAHAYA BELO/FACEBOOK
Kogi State supreme court judgement don pass verdict say Yahaya Bello win 16 November, 2019 governoship election.
Supreme Court for Nigeria on Monday troway di petition wey di Peoples Democratic Party appeal to challenge di victory of Govnor Yahaya Bello afta months of legal case from election tribunal and appeal court.
Di seven-man panel wey di Chief Justice of Nigeria, Justice Tanko Muhammad lead affirm Bello election on di platform of di All Progressives Congress.
For di lead judgement, Justice Uwani Abba -Aji say di supreme court agree wit di earlier July 4, 2020 judgment wey Court of Appeal give for Abuja
And di May 23, 2020 majority verdict wey di election petition tribunal, give and all of dem declare Bello winner.
Di highest court resolve all di five issues and complain wey di PDP and im candidate, Musa Wada bring come court in favour of governor wada.
Wia dis foto come from, YAHAYA BELLO/FACEBOOK
Di court say all dia complain no hold water and e dey lack in merit.
"Afta we don resolve all the five issues against the appellants, e dey clear say di appeal no get merit and we don dismiss am', the court ruled.
End of Di one wey oda users dey read well well
Aside from di CJN, Justices Okoro and Abba-Aji, and oda members of di panel wey agree wit di judgement be Justices Olabode Rhodes-Vivour, Sylvester Ngwuta, Kudirat Kekere-Ekun, and Amina Augie.
Di Supreme Court also throway di appeal file by Social Democratic Party's candidate, Natasha Akpoti, against di election of Governor Yahaya Bello.
Natasha bin cry go di highest court to ask am make e set aside di judgement of di lower court wey bin declare govnor Bello winner of di November 16 govnorship election.
Natasha bin say di election bin get wuru-wuru plus dem no follow electoral act but di Supreme court say SDP candidate no fit prove beyond any doubt say di election get wuru wuru.
