Lai Mohammed: N3.5m tok na fat lie! 'El-Zakzaky dey buy food im dey chop since goment arrest am' - Lawyer to Shia leader
Wia dis foto come from, PIUS UTOMI EKPEI
Ibrahim El-Zakzaky laywer tell BBC News Pidgin on Thursday say 'Alhaji Lai Mohammed dey lie, na El-Zakzaky dey buy di food im dey chop, and electricity card wey im dey use get light since goment arrest am'.
Haruna Magashi wey El-Zakzaky lawyer tok dis one as im dey react to Nigeria goment claim say dem dey spend N3.5 million evri month to feed di Shia leader.
"Dis na wetin I don take my eye see and wetin El-Zakzaky don tell me, since im detention, na im don dey take care of imsef, na im dey buy im own food"
'Goment suppose shame say man of dat kain status go dey tok lie lie anyhow'
Tori be say Alhaji Lai Mohammed, Nigeria Minister of Information, say di federal goment dey spend N3.5m everi month take feed Ibrahim El-Zakzaky, di leader of Nigeria Islamic Movement wey dey dia hand.
Tori pipo Oaks TV na dem release video of press conference wit tori pipo wia oga Mohammed tok dis wan on Wednesday afta Federal Executive Council meeting.
Dis article contain content wey Google YouTube provide. We ask for una permission before anytin dey loaded, as dem fit dey use cookies and oda technologies. You fit wan read di Google YouTube cookie policy and privacy policy before accepting. To view dis content choose 'accept and continue'.
End of YouTube post
Even card unit for light and fuel for generator, na from El-Zakzaky pocket, tok di lawyer wey say im see im client last for court on 7 November, 2018, Magashi tok.
Wia dis foto come from, Getty Images
'Na lie oga Lai Mohammed dey lie, in fact na pipo from Islamic Movement of Nigeria joinbodi dey even arrange tins go carri go give El-Zakzaky', Muhammad Ibrahim Gamawa wey be one oga for di Muslim group dey tell BBC News Pidgin
End of Di one wey oda users dey read well well
"Dis no be di first time im don tell Nigerians bull****"
Gamawa wey be Resource officer for IMN say im no understand wetin or who di goment dey spend N3.5 million ontop, but no be Ibrahim El-Zakzaky.
"Even di generator for di Abuja place wia dem keep am put, na we (IMN) buy am," tok Gamawa.
Wia dis foto come from, AFP
IMN accuse goment say dem no dey treat dia leader well, say even El-Zakzaky high blood pressure melecine, goment neva give am for di past four months.
"Who ask dem to dey waste tax payers money? wen court order don sake make dem release El-Zakzaky... [Lai Mohammed] dey for Abuja dey jolly with im family inside air conditioner, no bullet dey inside im bodi," Gawama para give BBC News Pidgin.
IMN confam say Department of State Security (DSS) don move El-Zakzaky from di kontri capital Abuja, go Kaduna State but dem never grant di Shiite leader bail or release am.
