Ganduje Video: Jafaar Jafaar don ready to help Kano lawmakers
Jaafar Jaafar, editor of tori pipo Daily Nigerian, wey break tori say Kano State govnor Umar Ganduje dey 'collect' don say im dey ready to honour Kano State House of Assembly invitation to help dia investigation.
Kano State House of Assembly investigative panel bin invite Jaafar to come show face for di assembly for inside letter on Thursday.
Jaafar say im lawyers dey "currently study di invitation letter wey dem give dem and dem go soon reply dem wit certain conditions wey concern im safety."
Di invitation by di Kano State House of Assembly na for di oga of di tori company to come tell di committee wey dey investigate Ganduje allegations wetin dem see and wetin dem really know.
Wia dis foto come from, Getty Images
"All di hearing go dey public... you go get chance to tok as you see di mata, show evidence and ask questions," na so di letter tok.
House majority leader, Bappa Dan Agundi bin tok on Monday say dem fit impeach dia govnor if di investigation prove say true true Ganduje way no dey pure.
Wia dis foto come from, Kano State House of Assembly
We neva see di video
On Monday, when BBC News Pidgin tori pesin Mansur Abubakar follow EFCC spokespesin Wilson Uwujaren tok, e say di agency no dey aware of di video.
"I no dey aware of any video, I neva see am." Na wetin Uwujaren tell BBC Pidgin for telephone.
End of Di one wey oda users dey read well well
Na EFCC dey in charge of a investigating anything wey resemble corruption for Nigeria and many pipo dey expect say since di video don dey public domain, dem go start dia work.
Under Nigeria law, govnors follow for those wey dey enjoy immunity, so notin fit happun to govnor Ganduje wen im still dey office.
