Na politicians dey put fire inside Kano drug problem - Cleric
Wia dis foto come from, Jordi Bernabeu Farrús
- Author, Mansur Abubakar
- Role, BBC News Pidgin, Kano
Di oga of Kano State religious police (Hisbah) don put di drug abuse problem wey di state dey face on top politicians head.
Popular cleric, Sheik Ibrahim Daurawa talk say na politicians dey contribute pass for di mata.
On Monday, di Nigerian Drug Law Enforcement Agency (NDLEA) release report wey show say e reach two million bottles of codeine syrup and oda drugs wey pipo dey use evri day for Kano.
Wia dis foto come from, Kano State Government
Sheik Daurawa add say im no gree wit di amount wey NDLEA release because di number too high.
"Di number one pipo wey I go blame for dis mata na our politicians because na dem dey mostly supply our youth with drugs especially now wey elections dey close."
According to NDLEA, for di last three years, na Kano dey top list of states wey dey use drugs pass for Nigeria.
Wia dis foto come from, AMINU ABUBAKAR/AFP/Getty Images
Neighbouring states dey contribute - Police
Meanwhile, Kano State Police Public Relations Officer, Magaji Musa Majia tell BBC Pidgin say neighbouring states dey contribute for di drugs palava wey dey disturb di northern state.
Oga Majia say some of di pipo wey dem catch no be from Kano but from oda states.
End of Di one wey oda users dey read well well
"Last time we catch one man wey come from Katsina State, di man carry bags of drug enta Kano."
