Peter Obi raise alarm of alleged planned protests by opposition in Obidients name

Live Coverage

Victor Ezeama and Helen Oyibo

1. 17 March 2023Goodnight!

   Dis na wia we go say bye-bye for our live coverage of preparations for di govnorship election. Thank you for staying wit us throughout di update.

   No forget to join us tomorrow by 7:00am, for our live coverage of di Govnorship election proper.

   Before we go, check out di summary of wetin you suppose know about di election.

   • ADC candidates step down for Rivers State to support APC candidate Tonye Cole
   • Election go happun for only 28 states of di federation

   • Opposition parties protest declaration of party members wanted by Rivers State Govnor Nyesom Wike

   • Labour Party form alliance wit PDP for Ogun State guber poll
   • Peter Obi raise alarm on allege plan to use Obidients name for protests
   • Inec say no supplementary elections go happun on govnorship election day
   • Atiku warn Lagos politicians against promoting election violence

   Una bye-bye!

2. 17 March 2023Atiku warn Lagos politicians against promoting election violence

   

   Wia dis foto come from, Twitter/@atiku

   Presidential candidate for di Peoples Democratic Party (PDP), Atiku Abubakar, don draw ear give political leaders across di kontri, especially Lagos state, make dem stop to dey promote election violence wit dia actions.

   Atiku, inside statement wey im release for Twitter, say, im dey worry about action of some leaders dey promote violence, and how some thugs of political leaders for Lagos dey intimidate voters for di state through ethnic insults.

   “I don watch wit deep contempt one video wey dey circulate wia some pipo wey dem sabi say dem get connection wit leaders of di ruling party for Lagos State dey threaten oda ethnic groups as dem dey ready for di Govnorship and State House of Assembly election for di state tomorrow.”

   “I condemn dis uncivilised behaviour and also condemn di criminal silence of di security agencies and di political leadership for Lagos State and Abuja on dis development.”

   Oga Atiku add say, “e no dey enuf to tok about di promise of free and fair election, if di tins wey occur before election day no get di integrity of a badge of honour." E tok.

   Skip X post

   Allow X content?

   Dis article contain content wey X provide. We ask for una permission before anytin dey loaded, as dem fit dey use cookies and oda technologies. You fit wan read di X cookie policy and privacy policy before accepting. To view dis content choose 'accept and continue'.

   Accept and kontinu

   Warning: Di BBC no dey responsible for di content of external sites.

   End of X post

3. 17 March 2023No supplimentary elections on govnorship elections day - Inec

   Nigeria electoral commission say dem no go conduct supplementary elections for di presidential and national assembly elections along wit di govnorship and state assembly elections wey go happun on Saturday 18 March.

   Di Indepenent National Electoral Commission release press statement on dia Twitter page to address tori wey dem say bin dey fly upandan say dem go do di supplementary elections along wit di govnorship ones on Saturday.

   Di commission say dem neva schedule di date wey dem go conduct di supplementary elections and dem go announce am afta di govnorship and state assembly elections.

   But Inec go on further to make am clear say dis supplementary elections dey different from di two national assembly elections wey dem bin suspend before but reschedule to hold along wit di govnorship elections.

   Dis two elections, Inec say, “dem no be supplementary but main elections wey bin no fit hold earlier.”

   Two elections, Enugu East Senatorial District elections and di Esan Central/Esan East/Igueben Federal Constituency election for Edo state bin dey suspended for different reasons.

   For Enugu, Inec suspend di election to allow Labour Party to replace im candidate for di Enugu East Senatorial District, wey dia shortly before di elections.

   And for Esan Central/Esan East/Igueben Federal Constituency election, Inec bin get issues wit di ballot paper for di election.

   Skip X post

   Allow X content?

   Dis article contain content wey X provide. We ask for una permission before anytin dey loaded, as dem fit dey use cookies and oda technologies. You fit wan read di X cookie policy and privacy policy before accepting. To view dis content choose 'accept and continue'.

   Accept and kontinu

   Warning: Di BBC no dey responsible for di content of external sites.

   End of X post

4. 17 March 2023Peter Obi raise alarm on allege plan to use Obidients name for protests

   

   Wia dis foto come from, Twitter/@peterobi

   Di Labour Party presidential candidate for di Nigeria 2023 general elections Peter Obi don raise alarm on an alleged plan by di opposition parties to use di name of Obidients to disturb di kontri wit nation-wide protests.

   Inside statement wey di presidential candidate Peter Obi release for im Twitter page, im say im party dey aware say di opposition dey do social media posts wey dey call for “nation-wide groundswell "#ENDINEC", "#ENDNigeria" Protest.”

   Obi emphasis say im position dey clear and say di way wey dem go take reclaim dia “stolen mandate”, na through “Courts and Due Process.”

   “Regardless of di doubts wey many get about di courts, we must try to build strong and tough institutions, of which Judiciary na one,” im add.

   Skip X post

   Allow X content?

   Dis article contain content wey X provide. We ask for una permission before anytin dey loaded, as dem fit dey use cookies and oda technologies. You fit wan read di X cookie policy and privacy policy before accepting. To view dis content choose 'accept and continue'.

   Accept and kontinu

   Warning: Di BBC no dey responsible for di content of external sites.

   End of X post

5. 17 March 2023Labour Party form alliance wit PDP for Ogun State guber poll,

   

   Wia dis foto come from, Tokunbo Peters/Facebook

   Labour Party for Ogun State don form alliance wit di Peoples Democratic Party to defeat di incumbent APC Govnor Dapo Abiodun for di gubernatorial election election wey go shele on 18 March.

   For one statement by di publicity secretary of Ogun State Labour Party Caretaker Committee, Tokunbo Peters, di chairmen and govnorship candidates of both parties sign agreement on 16 March.

   E say di choice of di PDP na sake of say di manifesto, mission and ideology of di party for Ogun State dey similar to di Labour Party own.

   “Di gubernatorial candidate of di PDP Hon Ladi Adebutu also share di same vision of running a populist, prudent and all inclusive goment just like Comrade Kehinde Sogunle, di Labour Party candidate,” im tok.

6. 17 March 2023How state funeral for Ghana footballer Christian Atsu wey die for Turkey earthquake happen

7. 17 March 2023Bayelsa Police Command deploy 5000 personnel for House of Assembly elections,

   

   Wia dis foto come from, NPF/Facebook

   Bayelsa State Police Command don deploy over 5000 Policemen and personnel from sister security agencies for di State House of Assembly Election wey go hold for di State on Saturday 18 March, 2023.

   Di Command also emphasise di ban on VIPs moving with escorts and security aides on election day.

   Security agencies also get order to enforce restriction of movement on land and waterways from 12am to 6pm on 18 March 2023, except for those on essential services.

   Commissioner of Police in charge of election Bayelsa State, CP Mohammed Dankwara charge officers wey dey deployed for di election to dey professional in di discharge of dia duties and to abide by di operational guidelines for election duties.

   E also encourage electorates to come out and exercise dia franchise by voting for candidates of dia choice.

   Di State Goment bin also declare Friday 17 March as work-free day to all civil servants so dem fit travel to dia communities to participate for di elections.

8. 17 March 2023Di states wia govnorship elections go hold on Saturday

   Nigerians go vote again on Saturday, March 18, 2023 to elect govnors and state assembly members.

   Na 18 political parties go participate for di polls and unlike di presidential election, na only 28 out of di 36 states of di federation go participate.

   Di govnorship elections for eight states - Anambra, Bayelsa, Edo, Ekiti, Imo, Kogi, Osun and Ondo dey always happun different years becos of litigations and court judgements.

   But asides di govnorship election wey go be for 28 states, elections for members of state assemblies go happun for all di 36 states of di kontri.

   According to di Independent National Electoral Commission, Inec, 993 State Houses of Assembly seats na im dey up for grabs.

   Di 28 states wia govnorship elections go happun on Saturday na:

   • Abia
   • Adamawa
   • Akwa Ibom
   • Bauchi
   • Benue
   • Borno
   • Cross River
   • Delta
   • Ebonyi
   • Enugu
   • Gombe
   • Jigawa
   • Kaduna
   • Kano
   • Katsina
   • Kebbi
   • Kwara
   • Lagos
   • Nasarawa
   • Niger
   • Ogun
   • Oyo
   • Plateau
   • Rivers
   • Sokoto
   • Taraba
   • Yobe
   • Zamfara.

9. 17 March 2023Opposition parties protest declaration of party members wanted by Governor Wike,

   

   Wia dis foto come from, Femi Ogunkilede

   Governorship Candidates of di All Progressives Congress, Tonye Patrick Cole, Social Democratic Party, Sen. Magnus Abe, Accord, Chief Dumo Lulu-Briggs and dia supporters for Rivers State storm di Rivers State Police Command headquarters Port Harcourt to protest di declaration of some pesins wanted by Rivers State Governor Nyesom Wike.

   Governor Wike for State-wide broadcast declared some 27 pesins from some opposition parties wanted on allegation say dem wan disrupt di governorship and State Assembly elections wey go hold on Saturday 18 March 2023.

   Di aggrieved opposition governorship candidates and dia supporters also raise alarm over activities of Local Goment Council Chairmen in collaboration with security agencies wey allegedly dey under instruction to execute di order to arrest members of opposition parties wey di Governor announce.

   APC Governorship Candidate, Tonye Cole tell tori pipo for di Police Command Headquarters say dia demand na for Inspector General of Police to give order so no political arrest go happen and for di immediate release of those wey dey arrested.

   Also governorship candidates of Accord, Chief Dumo Lulu-Briggs and Social Democratic Party, Sen. Magnus Abe say dem no happy wit wetin dey happen for Rivers State, come add say dem go resist evri attempt to enslave di pipo.

10. 17 March 2023Delta state don dey ready for tomorrow Governorship election - INEC

    

    All di sensitive and non sensitive materials don dey distributed to all di Local goment areas for Delta state.

    Di tok-tok pesin for INEC inside di state, Bukola Ojeme tell BBC pidgin say na on Wednesday, March 15, di different local goment areas for di state come Central Bank of Nigeria,(CBN), Asaba to pick up di election materials.

    Oga Bukola add say INEC dey well prepared for di governorship election as everi-everi don dey ready.

    Delta state wey dey South -South Nigeria, get 25 Local goment areas and some of dem dey for Riverine areas.

11. 17 March 2023Security agencies do joint show of force exercise for Rivers State,

    

    Wia dis foto come from, Ayo Odungweru

    6 Division Nigerian Army Port Harcourt don lead oda security agencies for Rivers state do joint show of force in preparation for di Governorship and State House of Assembly elections wey go hold on Saturday 18 March 2023.

    Dem dey do di exercise for local goment areas, especially volatile areas wia election thuggery and oda forms of electoral malpractices dey happen.

    General Officer Commanding 6 Division Nigeria Army Port Harcourt, Major Gen. Olufemi Oluyede as e address di troops say di show of force na to warn criminal minded pesins for di state to steer clear of di polling unit and to create peaceful atmosphere.

    Garrison commander, Brig. Gen. Suleiman Tilwan wey represent di GOC say dem go deal decisively wit anyone wey dey involved in political thuggery, arson and oda electoral offences for di state.

    “We wan tell Rivers state pipo say we dey ready for di 2023 elections and so dia security dey guaranteed. We remain apolitical and neutral to all di candidates.

    "Dis detachment of several security agencies na to show una say security dey watertight as we don ‘crime mark’ di state to keep felons at bay”.

    

    Wia dis foto come from, Ayo Odungweru

    

    Wia dis foto come from, Ayo Odungweru

    

    Wia dis foto come from, Ayo Odungweru

    

    Wia dis foto come from, Ayo Odungweru

12. 17 March 2023Police warn politicians wey dey import thugs for Nasarawa

    Di Nasarawa State Police Command for North Central Nigeria don cut warning give politicians wey dem say dey import thugs into di state wit a plan to cause kata kata during Saturday govnorship and Assembly elections.

    For statement, Police say dem dey aware of such moves and di local goments wey di ‘desperate politicians’ dey carry di thugs enta, adding dat dem no go allow any trouble or mago mago happun.

    Dem say dem ready to deal with any pesin wey dey plan to cause trouble for di election in line with provisions of di law.

    Nasarawa govnor Engr Abdullahi Sule of All Progressives Congress (APC) dey face challenge to retain im seat from Labour Party candidate Joseph Ewuga and Peoples Democratic Party candidate David Ombugadu.

    

13. 17 March 2023Political Parties sign Peace Accord for Delta State ahead of guber elections,

    

    Wia dis foto come from, Delta State Police Command

    Commissioner of Police in charge of election for Delta State, CP Mamman U. Sanda, invite leaders of di various political parties to di State Police headquarters for signing of peace accord ahead of di governorship and State Assembly elections wey go hold tomorrow.

    CP Sanda say dis dey in line wit security arrangement and e important for a hitch free elections.

    E note say wit di support of political parties, problem no go dey and so e ask for dia understanding say dem be brothers and sisters and e go remain so even afta di election.

    Di various political parties assure di Police Commissioner say dem go cooperate wit di police and do dia best to ensure say di election dey free of any wahala.

    Di Commissioner of Police also order operation show of force across di eight area commands in synergy with oda sister security agencies; strict enforcement of restriction of vehicular movement on election day from 12am to 6pm on 18 March 2023.

    Di CP Election Delta Command come direct DPOs to arrest any vigilante or any non-state actor dem catch dey meddle for di election process as dem no dey play any role during the elections, so e warn dem to steer clear of di polling units and di entire election process.

14. 17 March 2023Wike declare public holiday for Rivers workers,

    

    Wia dis foto come from, Nyeson Wike

    Rivers State Govnor Nyesom Wike don declare Friday 17 March 2023 public holiday for Rivers State, Southern Nigeria.

    Di govnor say dis na to enable private and public sector workers travel to dia communities to vote for di Govnorship and State House of Assembly elections.

    E announce di public holiday for im late evening State broadcast yesterday.

    Dis dey come as surprise to residents wey no fit get chance do bank transactions yesterday.

15. 17 March 2023'No put hand for Electoral fraud' - DIG South South zone warn police officers,

    Deputy Inspector General of Police South South zone Moses Jitoboh don warn police officers not to involve demsef for any kain election malpractices as dem no go chop punishment.

    E tok dis one wen e visit officers for Delta State Police Command to boost dia morale ahead of di governorship and State Assembly elections wey go hold on Saturday 18 March, 2023.

    Di DIG advise di officers to dey apolitical as police no suppose dey partisan at all and so e warn any officer wey fail to thoroughly supervise di personnel under dem say dem go dey liable if any policeman attached to dem dey involved in election fraud or malpractices.

    DIG Jitoboh come call on pipo of Delta State to conduct demsefs well as dem come out to cast dia votes.

    E note say di Inspector General of Police don order for di distribution and deployment of additional equipment wey include riot gunners, tear gas and oda anti-riot equipment and also 2000 police personnel on election duty and monitoring.

    

    Wia dis foto come from, Delta State Police Command

16. 17 March 2023Elections go happun for 28 States, Govnorship election no go hold for 8 states

    

    Nigerians for 28 states of di Federation go vote on Saturday 18 March, 2023 to choose dia Govnors while di House of Assembly wey be di state legislature elections go happun for all di 36 states apart from di Federal Capital Territory.

    Na 18 political parties get candidates for di govnorship elections wey residents of di states go choose from.

    Dis na becos di govnorship elections of eight states bin get k-leg wey scatter di normal calendar sake of court cases and court judgements.

    Di states wey election go hold na: Abia, Adamawa, Akwa Ibom, Bauchi, Benue, Borno, Cross River, Delta, Ebonyi, Enugu, Gombe, Jigawa, Kaduna, Kano, Katsina, Kebbi, Kwara, Lagos, Nasarawa, Niger, Ogun, Oyo, Plateau, Rivers, Sokoto, Taraba, Yobe, Zamfara.

    Di states wey elections no dey happun dis saturday na Anambra, Bayelsa, Edo, Ekiti, Imo, Kogi, Osun and Ondo.

    According to di Independent National Electoral Commission, na 993 State Houses of Assembly seats candidates dey hustle for.

17. 17 March 2023Deputy govnorship candidate Tonto Dike and ADC govnorship candidate step down for Rivers State,

    Rivers State Govnorship candidate Tonto Dike and di governorship candidate Tonte Ibraye of di African Democratic Congress ADC don step down from di governorship race.

    Dis one mean say dem dey pull out from di Rivers State Govnorship election wey go happun on Saturday 18 March, 2023.

    

    Wia dis foto come from, Tonto Dike Facebook

18. 17 March 2023Una Good morning

    Dis na our live coverage of evri tin on di governorship election.

    Follow us bumper to bumper as we bring you tori from di 28 states wia governorship election dey hold tomorrow.

19. 16 March 2023See you tomorrow!

    We thank una for staying wit us throughout today coverage.

    We go come back on Friday.Goodnight.

20. 16 March 2023‘We dey ready for govnorship elections in Rivers State’ - Police,

    

    Di Assistant Inspector General of Police in charge of elections for Rivers State, AIG Olukayode Egbetokun say police and oda security agencies don deploy massively and ready for di Governorship and State Assembly elections wey go hold dis Saturday 18 March, 2023 for di State.

    AIG Egbetokun wey also be AIG Zone 7 Abuja, tell tori pipo for Port Harcourt say di three weeks between di Presidential and Governorship elections don give dem enough time to prepare well and so e warn criminal elements to stay clear.

    Di AIG wey dey lead five oda Commissioners of Police to oversee di elections for Rivers State re-emphasise di no waka-waka order wey di IGP don order on election day from 12am to 6pm, come add say dem go strictly enforce am as dem no go spare any pesin dem arrest except essential workers and those on election duty with dia tags.

    E encourage voters to come out, conduct demsef well and vote peacefully and advise dem to shun fake news, hate speech and any oda tin wey fit cause gbege.