Dis go be di 15th time wey African women go battle am out to be crowned continental champions.

However, di history and formats of previous competitions no dey straightforward like dat. 

Di 2024 Women’s Africa Cup of Nations (Wafcon) - wey Caf postpone until dis year becos of problems wit scheduling - go see 12 nations compete for di title for Morocco, wia 26 games go take place for six venues wey spread across five cities.

Di HISTORY

Di first African Women’s Championship take place for 1991 to determine who go be di continent representative for Fifa first ever Women’s World Cup. Eight teams bin suppose take part for knockout format using home-and-away ties, but four nations withdraw and Cameroon reach di final without playing a game.

Nigeria thrash di Indomitable Lionesses 6-0 on aggregate to become di first champions of Africa. Four years later, di Super Falcons triumph again as dem waya South Africa 11-2 over two legs for di final.

However, those first two competitions no traditionally dey considered part of Wafcon history (and therefore dem no dey included for di statistics inside dis article). We begin from 1998 wen di tournament become eight-team event wey one country go host every oda year, wit di introduction of group stages.

Nigeria welcome di continent for di first edition and reign supreme - and no-one else fit topple di West Africans for 2000, 2002, 2004 and 2006 either. Na for 2008 wia hosts, Equatorial Guinea, finally dethrone di Super Falcons.

Na for 2016 di tournament name change to di Women’s Africa Cup of Nations, to rhyme wit di men’s competition.

Di 2020 edition no ever take place becos of di coronavirus pandemic. Wen Wafcon return for 2022 Caf expand di tournament, now wey e dey feature 12 teams, new winner appear in di form of South Africa, wey beat hosts Morocco to wipe away di pain of four previous defeats for di final.